вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

КАСБ-ҲУНАР МАКТАБЛАРИГА ҚАБУЛ ДАВОМ ЭТМОҚДА

05.07.2022 15:25:07

Мамлакатимизда 2022-2023 ўқув йили учун касб-ҳунар мактабларига қабул жараёни бошланди. Бу йил вилоятимиздаги 11 та касб-ҳунар мактабларига 24 та йўналишдаги касб-ҳунар бўйича умумтаълим мактабларининг 9-синфини битирган 2310 нафар ўқувчиларни қабул қилиш режалаштирилган.

Таъкидлаш керак, бугунги кунга қадар умумтаълим мактаблари ва касб-ҳунар мактаблари ҳамкорлигида ўқувчиларнинг касбий қизиқишларини аниқлаш ва касбга йўналтириш мақсадида очиқ эшиклар куни, учрашувлар ҳамда турли тадбирлар ўтказилди. Ўтказилган тадбирларда ўқувчилар ва уларнинг ота-оналари иштирокини таъминлаш натижасида 4 минг нафардан ортиқ ўқувчилар касб-ҳунар мактабларида ўқиш истагини билдирган.

Навбаҳор туманидаги касб-ҳунар мактабида қабул жараёни намунали тарзда ташкил этилмоқда. Таълим муассасасида ўқиш истагини билдирган ўқувчилар ўз ота-оналари ёки мактаб психологи ҳамроҳлигида келишиб, ҳужжатларини топширишмоқда.

– Бу йил мактабимизга 6 та йўналиш бўйича 210 нафар ўқувчи қабул қилиниши режалаштирилган, – дейди касб-ҳунар мактаби директори Жасурбек Шомуродов. - Ташриф буюрувчилар учун барча шарт-шароит яратилган. Қабул комиссияси аъзолари улар билан бафуржа суҳбатлашиб, ўқувчилар қизиққан йўналиш учун ҳужжатларни қабул қилиб олишяпти.

Касб-ҳунар мактабларига қабул жорий йилнинг 1 июлидан Вазирлар Маҳкамасининг 2020 йил 11 ноябридаги “Ўзбекистон Республикасининг профессионал таълим муассасаларига ўқишга қабул қилишни ташкил этиш чора-тадбирлари тўғрисида”ги қарори асосида ишлар амалга оширилмоқда ва бу жараён 2022 йил 20 июлга қадар онлайн тарзда Олий ва ўрта махсус таълим вазирлиги томонидан яратилган kasb.edu.uz платформа орқали амалга оширилади.