вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
19.07.2017 13:31:13
Ҳурматли деҳқон-фермерлар!
Ўтаётган ҳар бир кунимиз энг улуғ ва энг азиз шодиёна, миллий истиқлолимизнинг 26 йиллик тантаналарига тобора яқинлаштирмоқда. Мустақиллик ҳаётимизнинг маъно-мазмунини бутунлай ўзгартиргани, мамлакатимиз ҳаётида янги саҳифа очиб, буюк бир тарихий воқеага айлангани, Ватанимизни, халқимизни эски мустабид тузумдан озод қилгани, дунё халқлари билан тенг қилиб, фаровон ҳаёт барпо этиш йўлини очиб бергани билан қадрли ва мўътабардир. Шу ўтган тарихан қисқа фурсатда тинчлик-осойишталик ва халқимизнинг фидокорона меҳнати туфайли мамлакатимиз ҳар томонлама ривожланди. Юртимизда кенг кўламли бунёдкорлик ҳамда ободонлаштириш ишлари амалга оширилиб, аҳолининг турмуш тарзи кун сайин юксалиб бормоқда.
Шундай экан, ўзимиздан келажак авлодларга фаровон ҳаёт, унумли, ҳосилдор ва экологик тоза тупроқ, умрбоқий озод, обод ва жаннатмакон Ватан қолдириш йўлида улкан ишларга, аниқ режаларга қўл урилаётган юртимизда энг аввало, давлатимиз раҳбариятининг кучли ва доноларча сиёсати, барча соҳаларда олиб борилаётган тизимли ислоҳотларининг бир-бири билан чамбарчас боғлиқлиги ва беминнат азму шижоати ётибди. Энг асосийси, бу жараёнлар юрт тинчлиги, Ватан тараққиёти ва халқ фаровонлигига хизмат қилаётгани фарзандларимизнинг эртанги бахтиёр куни учун тўла кафолатдир.
Муҳтарам Президентимиз Шавкат Мирзиёевнинг қабул қилган Фармонларидан келиб чиқиб, ҳаётга татбиқ этилаётган 2017-2021 йиллар давомида 5 та йўналишдаги Ҳаракат стратегиясининг ўзиёқ фақат ва фақат халқимиз истиқболи, тўкин ҳаёти ва порлоқ келажагига қаратилганлиги билан қувонарлидир. Давлатимиз раҳбари такрор ва яна такрор таъкидлаганларидек: "Халқ бой бўлса, давлат ҳам бой ва қудратли бўлади". Ушбу шиор айнан сиз деҳқон ва фермерларга қарата айтилаётгани бежиз эмас. Тажрибангиз боис кучли билимга ва катта маҳоратга эга бўлдингиз. Энди, ўз навбатида, халқимизнинг фаровон яшаши, катта даромад эгаси бўлиши сизнинг янада фидойи меҳнатингиз самарасида кўриниши зарур.
Қадрли юртдошлар!
Давлатимиз раҳбарининг 2017 йил 1 июндаги "2017 йилда бошоқли дон экинларидан бўшайдиган майдонларга такрорий экинларни жойлаштириш, экиш учун талаб этиладиган моддий-техника ресурсларини ўз муддатида етказиб бериш чора-тадбирлари тўғрисида"ги қарори халқимиз турмуш фаровонлигини юксалтиришга, фермерлар даромадини оширишга, пировардида озиқ-овқат маҳсулотлари хавфсизлиги ва тўкинлигини таъминлашга хизмат қилади.
Президентимиз Шавкат Мирзиёевнинг "Дала маданияти — фермер мажбурияти"деган умрбоқий шиори эса сизу биздек барча фермерларнинг қалбимизга метиндек муҳрланиб қолгани ҳеч кимга сир эмас. Биз, навоийлик фермерлар, ушбу шиорни ҳамиша ўз фаолиятимизга дастуриламал қилиб белгилаймиз ва албатта, унга муносиб тарзда дала-деҳқончилик ишларини ташкил этасизлар, ҳақиқий фидойилик намуналарини кўрсатасизлар, деб ишонамиз. Бундай дейишимизнинг боиси шуки, Навоий замини лафзи ҳалол, кўнгли тоза, меҳнаткаш, меҳмондўст, асл соҳибкорлар, боғбонлар, сабзавоткорлар, бир сўз билан айтганда миришкор деҳқонлар юртидир.
Вилоятимиз меҳнаткашларининг қишлоқ хўжалик маҳсулотларини етиштириш ва қайта ишлаш бўйича ҳам жуда катта имкониятларга, тажрибага, иш маданиятига эга эканлиги эса салоҳиятимизни янада оширмоқда. Сир эмас, вилоятимиз қишлоқ хўжалигининг етакчи тармоқларидан саналган пахта ва ғаллачилик, боғдорчилик, узумчилик, сабзавотчилик, картошкачиликни ривожлантиришда кўп йиллик бой тажрибага ҳамда юксак деҳқончилик маданиятига эга.
Таъкидлаш жоизки, фермерлар бугунги кунда мамлакатимиз тараққиётининг ҳал қилувчи, ҳаракатлантирувчи кучидир. Қишлоқ хўжалиги соҳасида улкан ишларни, катта ютуқларни қўлга киритиш баробарида халқимизнинг озиқ-овқат, мева-сабзавот маҳсулотларига бўлган талабини қаноатлантириш каби муҳим масалаларга ҳам масъулдир.
Шундай экан, ҳукуматимиз раҳбариятининг бошоқли дон экилган майдонлардан бўшаган ерларга такрорий экинлар экиб, ер ва сув ресурсларидан, она заминимизнинг саховатидан самарали фойдаланиш ҳақидаги даъватларини ҳам навоийлик деҳқон ва фермерларимиз астойдил қўллаб-қувватлайдилар. Ва бу топшириқни ҳам биринчилардан бўлиб адо этишиб, янада кўпроқ даромад олиш чора-тадбирларини кўрадилар. Бошқача қилиб айтганда, ризқ-рўзимиз бўлган ғалладан бўшаган майдонларга сабзавот, полиз ва дуккакли экинлар экишни уюшқоқлик билан ниҳоясига етказадилар ва уларни меҳр билан парваришлайдилар.
Қуйидаги ҳисоб-китобларга эътибор қаратадиган бўлсак, жорий йилда вилоятимиз бўйича 1457 та фермер хўжаликларининг 40600 гектар ғаллазорларидан бўшаган 38 минг 752 гектарлик майдонига такрорий экинлар экиш режалаштирилган. Шундан, 5940 гектарига турли сабзавотлар, яъни 3327 гектарига сабзи, 167 гектарига карам, 1186 гектарига шолғом, 334 гектарига турп, 705 гектарига кўкатлар, 222 гектарига ош лавлаги, шунингдек 20 минг 700 гектар майдонга полиз ва дуккакли экинлар, 233 гектарига картошка, 11 минг 879 гектарига бошқа турдаги экинлар экиб, мўл ҳосил олишимиз лозим. Биз бу ишларни сизлар билан биргаликда жуда қисқа фурсатда бажаришимиз шарт. Бугун ҳар бир деҳқон, ҳар бир фермер масъулиятни дилдан ҳис қилган ҳолда бир кундан, керак бўлса бир дақиқадан унумли фойдаланиши керак. Шундагина биз кўзлаган мақсадимизга эришамиз. Давлатимиз ва элу юрт олдида юзимиз ёруғ бўлади.
Азиз фермерлар! Сиз бугун оддий фермер эмас, қишлоқдаги етакчи куч, иқтисодий бақувват мамлакат таянчисиз!
Шундай бўлсада, сизнинг янада иқтисодий бақувват бўлишингиздан давлатимиз, халқимиз манфаатдор. Барчамизга маълумки, сизнинг бугунги халқимиз дастурхони тўкин-сочинлиги йўлидаги фидокорона заҳматингиз, ўз фароғатингиздан кечиб, далангизда экин-тикинларингиз атрофида парвона бўлиб айланишингиз замирида ҳам фарзандларимиз бахт-иқболи, фаровон турмуш ва тинч-осойишта ҳаёти турганлиги айни ҳақиқат.
Бўшаган ергарга такрорий экинларни экиб қўйиш билан иш битмайди. Уларни яхши парваришлаш, ўз вақтида агротехник тадбирларини ўтказиш, жумладан суғориш, чопиқ қилиш, озиқлантириш ва турли зараркунанда ҳамда касалликларга қарши курашиш учун зарурий чораларни кўринг!
Айниқса, маҳаллий ўғитлардан самарали фойдаланишга алоҳида эътибор қаратинг!
Бу борада Давлатимиз томонидан шакллантирилган янги тизим имкониятларидан самарали ва тўла фойдаланинг!
Ўзингизга яхши маълум, полиз ва сабзавот маҳсулотлари, дуккакли экинлар кони фойда ва парҳез маҳсулотлардир. Бугун маҳаллангиз аҳолисини бой-бадавлат қилиш учун томорқаларидан унумли фойлаланишларида кўмак бераяпсиз. Уй бекаси бўлган аёлларни, ёшларни иш билан таъминлашда жонбозлик кўрсатяпсиз, атрофингиздагиларнинг ишсиз юришига барҳам беряпсиз. Улар ҳовлисида товуқ, курка, ғоз сингари парранда боқишида намуна кўрсатяпсиз.
Сизларнинг беминнат меҳнатларингиз самараси ўлароқ, сўнгги йилларда мамлакатимиз иқтисодиётининг ўсиш суръатлари энг нуфузли халқаро минбарлардан эътироф этилмоқда. Бу, ўз навбатида, Ўзбекистонда аҳоли фаровонлигини юксалтиришга қаратилган кенг кўламли ислоҳотларни амалга ошириш, маҳаллий ва хорижий инвестицияларни фаол жалб қилиш, юртимизни, маҳаллаларимизни, ён-атрофимизни обод қилиш, меҳнатга лаёқатли кишиларга, айниқса ёшларга янги иш ўринлари яратиш, бозорларимиз тўкинлигини, оилаларимиз фаровонлигини таъминлаш имконини бермоқда.
Шукрки, давлатимизда узоқни кўзлаб олиб борилаётган доно ва оқилона сиёсат дунё ҳамжамияти олдида қудратимизни янада оширмоқда. Бири-бирини тўлдириб, мустаҳкамлаб бораётган қарорлар, фармонлар сабаб, ўз меҳнат фаолиятингизни янада эркинлаштириб, янада мукаммалаштириб бораётганингиз боис, бутун дунёга хавф солиб турган озиқ-овқат тақчиллиги мамлакатимизни четлаб ўтмоқда.
Азиз фермерлар!
Хўжалик аъзолари ва мавсумий ишчилар учун қулай шарт-шароитлар яратинг. Уларга эътиборли бўлинг!
Ушбу хайрли ишларда барчангизга Яратгандан соғлик-саломатлик, куч-қудрат ва қут-барака сўраймиз!
Навоий вилояти Фермерлар Кенгаши.
Манбаа: dustlikbayrogi.uz