вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Тараққиёт юксак масъулият талаб этади

28.02.2017 15:11:15

Бугунги кунда юртимизда амалга оширилаётган жадал ислоҳотлар жараёнида танқидий таҳлил, қатъий тартиб-интизом ва шахсий жавобгарлик ҳар бир раҳбар фаолиятининг мезонига айланган экан, бу омил мамлакатимизда инсон манфаатларига ҳар жабҳада эътибор кучаяётганлигини ҳам кўрсатмоқда.

Президентимизнинг турли йиғилишлардаги маърузалари ҳамда вилоятларга ташрифи чоғида билдираётган фикрларини чуқур англаган ҳолда биз ҳам Қизилтепа туманидаги "Зарафшон" бўрдоқичилик МЧЖда бир қатор ишларни олиб бормоқдамиз. 100 нафардан ортиқ ходим меҳнат қилаётган корхонамиз нафақат чорвачилик, балки деҳқончилик, асаларичилик, балиқчилик йўналишларида ҳам иш олиб боради. Айни пайтда 6345 бош майда шохли мол ҳамда 505 бош қорамол бўрдоқига боқилмоқда. Ҳар йили 50-60 тоннагача гўшт маҳсулотларини қайта ишлаб, халқимиз дастурхонига туҳфа этаяпмиз. Ўртачўл ҳудудининг тасарруфимиздаги 300 гектар экин майдонидан ҳам самарали фойдаланиб, унинг 100 гектарида беда, 200 гектар майдонида арпа етиштирилади. Ўриб олинган арпа майдонларига такрорий экин сифатида экилаётган шолидан йилига 50 тоннагача, шунингдек, сабзи, шолғом ва бошқа сабзавот экинларидан ҳам мўл ҳосил олинмоқда. Шу билан биргаликда, жамиятимиздаги мавжуд 30 та асалари оиласидан йилига 600 килограмм асал, битта балиқ ҳавзасида 3 тоннагача балиқ маҳсулоти етиштириш ишлари жадал олиб борилмоқда. Жорий йилда фаолиятимизда янги тармоқ — иссиқхоначиликни ташкил қилишни режалаштирдик. Жумладан, 50 сотих майдонга эга янги иссиқхона барпо этилади. Натижада қиш ойларида ҳам помидор, бодринг етиштириш имкони пайдо бўлади. Умуман олганда, ишчи-ходимларимиз томонидан фидойилик, катта масъулият билан меҳнат қилинаётгани корхонамизда барча йўналишларда тараққиётга, юксалишга эришишда муҳим аҳамият касб этмоқда.

Бугунги кунда барқарор фаолият юритишга эришиш осон кечгани йўқ, албатта. Аввало, юртимизда тадбиркорлар учун яратилган имкониятлардан кенг фойдаланиб, ҳар доим жавобгарлик ҳисси билан ишлаш орқали ана шу даражага эришдик. Биз бугунги ютуқларимиз билангина чекланиб қолмаймиз, албатта. Ҳали олдимизда ҳал этилиши лозим бўлган вазифалар ҳам кўп. Соҳага кўрсатилаётган ғамхўрлик ва эътиборга жавобан янада масъулият билан ишлашни юксак ватанпарварлик бурчимиз, деб биламиз.

Азамат НАБИЕВ,

МЧЖ раиси.