вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
14.06.2016 12:14:31
Истиқлол йилларида барча соҳалар каби иқтисодиётимизда ҳам сезиларли ўсиш кузатилди. Хусусан, кичик бизнес ва хусусий тадбиркорликка кенг йўл очилгани ишбилармонлик муҳитини янада яхшилаш билан бирга мамлакатимиз иқтисодий фаровонлигига муносиб ҳисса бўлиб қўшилмоқда. Қувонарлиси, "Ҳаракатда баракат" нақлига амал қилган юртдошларимиз яратилган имкониятлардан оқилона фойдаланиб, самарали меҳнат қилишмоқда. Натижада хусусий сектор фаолияти кундан кунга кенгайиб бораётир.
Мамлакатимиз Президентининг яқинда матбуотда эълон қилинган "Ўзбекистон Республикаси давлат мустақиллигининг йигирма беш йиллик байрамига тайёргарлик кўриш ва уни ўтказиш тўғрисида"ги қарорида таъкидланганидек, мустақилликка қадар юртимизда умуман мавжуд бўлмаган, бугунги кунда эса жамиятимизнинг қудратли таянчига айланиб бораётган мулкдорлар синфининг жадал ривожланиб, кичик бизнес ва хусусий тадбиркорликнинг ялпи ички маҳсулотдаги улуши 56,5 фоизга етгани, айни шу тармоқда иш билан банд аҳолининг 77,9 фоизи меҳнат қилиб, мамлакатимиз равнақига муносиб ҳисса қўшиб келаётгани эътирофга лойиқдир. "Қизилқум марвариди" дея таърифланган Зарафшон шаҳрида ҳам тадбиркорлар кўпчиликни ташкил этади. Вилоят марказидан олисда бўлишига қарамай, яратувчанлик ва бунёдкорлик завқи билан яшаётган ҳудуд аҳолисининг ишбилармонлигига ҳавас қилса арзийди. Политилен халта ишлаб чиқаришга мўлжалланган "Қизилқум Текстиль" МЧЖ жорий йилнинг февралида ташкил топган эди. Ҳали иш бошлаганига кўп бўлмаса-да, МЧЖда сифатли ва харидоргир халталар ишлаб чиқарилмоқда.
— "Ипотекабанк" АТИБ Зарафшон шаҳар филиалидан хом-ашё учун 300 миллион сўм кредит олгандик, — дейди МЧЖ директори Ботир Жамолов. — Зарур технологияларни эса Хитойдан келтирганмиз. Бу ерда бир ойда 400-500 мингдан ортиқ политилен халта тайёрланиб, ички ва ташқи бозорга олиб чиқилмоқда. Яқинда Қозоғистон давлати билан 190 минг АҚШ доллари миқдорида шартнома имзоладик. МЧЖ да 90 нафар ишчи меҳнат қилиб келмоқда. Уларнинг аксариятини ёшлар ва аёллар ташкил этади. Ишчиларимиз учун барча шароитлар муҳайё этилган. Иш уч сменада давом этади. Уч маҳал иссиқ овқат, транспорт, ювиниш хоналари ишчиларимиз ихтиёрида.
Маҳсулотнинг юртимиз бозорларидан ташқари четда ҳам харидорга эгалиги иш сифатли ташкил этилганидан далолат. Бунда астойдил меҳнат қилаётган барча ишчининг бирдек ҳиссаси бор. Улар орасида коллеж битирувчилари, шунингдек, амалиёт ўтаётган ўқувчилар борлиги қувонарли. Ёшларга тажрибали мутахассислар устоз сифатида бириктирилган. Бу эса иш унуми ошишига хизмат қилмоқда.
— Халта тайёрлашда асосий хомашё полипропилиен ҳисобланади, — дейди ишчи Мунира Фаттоева. — У аввал эритилиб, ип шаклига келтирилади. Кейин тўқилиб, ундан рулон ҳосил қилинади. Шундан сўнг тикув цехига топширилиб, тайёр ҳолатга келтирилади. Ишга қатнашимиз учун махсус транспорт ажратилган. Ойлик маошларимизни вақтида олиб турибмиз. Жамоамиздагиларнинг кўпчилиги ўзим каби ёшлар. Уларнинг ишига масъулият билан ёндашишидан хурсанд бўламан. Коллежни битириб, шу ерда илк ишимни бошладим. Шаҳримизда корхона, заводлар кўпайишини истайман. Бу иш ўрни яратиш билан бирга вилоятимиз иқтисодини янада ривожлантиради, деб ўйлайман.
"Қизилқум Текстиль" МЧЖ ёнида тикув цехи, "АKFA" ишлаб чиқариш, кенг ҳажмли полиграфия маҳсулотлари тайёрлаш хизмат турлари фаолият бошлаган. МЧЖ директорининг таъкидлашича, тадбиркорликнинг бу йўналишларини ҳам кенгайтириш режалаштирилган. Келгусида зарафшонлик тадбиркорлар томонидан ишлаб чиқарилаётган маҳсулотлар сифати билан дунё бозорида мустаҳкам ўринга эга бўлиши ва юртимиз тараққиётига салмоқли ҳисса қўшишига ишонамиз.
Зулфия БОБОЕВА.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а