вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
04.06.2015 10:28:03
Мустақиллик йилларида бу гигант корхона иқтисодий барқарорликни сақлаб қолиш билан бир вақтда амалда янги технологияларни жорий этиш, модернизациялаш эвазига ишлаб чиқариш ҳажмини ошириб, маҳсулот турини кўпайтирди, тежамкорлик кун тартибидаги биринчи масалага айланди.
Шу боисдан ҳам бугун кимёгарлар нафақат ички бозор, балки рақобатбардош маҳсулотлар ишлаб чиқаришга эътибор қаратиб, экспорт ҳажмини ошириш билан ташқи бозордан ҳам ўрин эгаллашдек эзгу мақсад йўлида меҳнат қилишаётир. Шунингдек, кимё саноатини ривожлантиришга қаратилган барча интилиш ва изланишлар бугун давлат ички сиёсати даражасига кўтарилган.
Бундан ўн беш йил бурун корхонада Давлат дастури асосида кенг кўламдаги реконструкция ва техник қайта жиҳозлаш ишлари амалга оширилди. 2002 йилда Германиянинг "Лурге" концерни технологияси асосида ишлайдиган қаттиқ хлор ишлаб чиқаришнинг уч қаватли корпуси фойдаланишга топширилди. Маънан эскирган 109 та ускуна янги, замонавий ва юқори қувватлиларига алмаштирилди. Натижада маҳсулот ишлаб чиқариш суръати ўсиб, тури кўпайди.
Давлатимиз раҳбарининг 2008 йил 28 ноябрдаги "Иқтисодиётнинг реал сектори корхоналарини қўллаб-қувватлаш, уларнинг барқарор ишлашини таъминлаш ва экспорт салоҳиятини ошириш чора-тадбирлари дастури тўғрисида"ги Фармони "Navoiyazot" АЖ фаолиятида ҳам туб бурилиш ясади. Мазкур фармон ижросини таъминлаш мақсадида, аниқ режалар ишлаб чиқилди, пухта ўйланган дастур қабул қилинди. Мазкур ҳужжатда белгилаб берилган вазифалар ижроси натижасида 2009-2012 йилларда тўққизта янги технологик ускуна қурилиб, фаолият бошлади, янги маҳсулотлар ишлаб чиқариш ва ўзлаштириш йўлга қўйилди. Булар асосан металларни кесиш ва пайвандлашда фойдаланиладиган техник ацетон, емирилиш ва занглашнинг олдини оладиган ингибитор, техник сувни тозалашда фойдаланиладиган темир хлориди, саноат объектлари ва тураржой бинолари ташқи кўринишини безашда асқотадиган дисперсли-сув бўёқ, шунингдек, азотли ўғитдан икки баробар самарали бўлган азотли-фосфорли ҳамда иссиқхона хўжаликлари учун калийли ўғитлардир.
— Биз ўзлаштирган азотли-фосфорли ўғитга (АФЎ) бўлган талаб жуда катта. Селитра цехи таркибида очилган бўлимнинг ишлаб чиқариш қуввати суткасига 700-750 тоннани ташкил этади ва 280 нафар киши меҳнат қилади. Барчаси маҳаллий ёшлар, аксарияти эса касб-ҳунар коллежлари битирувчилари, — дейди цех бошлиғи Қаҳрамон Саматов.
Тайёр маҳсулотларни қадоқлаш учун махсус идишлар ишлаб чиқариш йўлга қўйилганлиги ҳам иқтисодий тежамкорлик ва самарадорликка имконият яратмоқда. Бир неча йилдирки, корхонада Хитой технологияси асосида полипропилен қоплар тикиш цехи фаолият кўрсатмоқда. Айни пайтда 500 нафардан ортиқ ёш йигит-қиз меҳнат қилаётган цех ўз маҳсулотлари билан фақат "Navoiyazot" АЖни таъминлаб қолмасдан, балки мамлакатимизнинг бошқа корхоналарини ҳам таъминлаб турибди. Цехга ҳар йили 20-25 нафар касб-ҳунар коллежлари битирувчилари уч томонлама шартнома асосида ишга қабул қилинади.
Ўтган тўрт йил ичида экспорт маҳсулотлар ҳажми кескин ошди ва бугунги кунда 30 фоизни ташкил қилмоқда. Корхонада янгиликларни амалда татбиқ этиш кенг йўлга қўйилган ва бу тизимли равишда давом этмоқда. Шу йилнинг ўтган даврида секин эрувчи хлор таблеткалари ишлаб чиқариш линияси қуриб, фойдаланишга топширилди. Бу кимёвий препарат дезинфекция сифатида ишлатилмасдан, балки сувни зарарсизлантиришда ҳам қўл келади. Муҳими, оддий хлор сингари ўткир ҳиди йўқ.
Корхонадаги барча иш жараёнлари бошқарув пульти марказида назорат қилиб борилади. Замонавий аппаратлар билан жиҳозланган марказга ишлаб чиқариш тизимлари уланган бўлиб, жараён компьютерда кўриниб туради. Маҳсулотларга қўшиладиган хомашё ва бошқа компонентлар миқдори, ҳажми аниқланиб, қайта ишлаш ҳам шу ерда бошқарилади.
Бугун ички ва ташқи бозорда корхона маҳсулотларига талаб ва эҳтиёжнинг ортиб бориши жамоадан изланиб, интилишни, фидойилик билан меҳнат қилишни талаб қилади. Асосийси, "Уста-шогирд" анъанасини давом эттириб, ёшларни қўллаб-қувватлаш муҳим аҳамият касб этади. Корхонада эса Л. Очилов, К. Сафаров, Т. Тўхташев каби аппаратчилар, А. Абдуллаев, Б. Бобоқулов, Б. Жумаев каби смена усталари, технологлар М. Кенжаев, Е. Литвинова, А. Одилов, Т. Надежнова, цех бошлиғи Ш. Долиев, ишлаб чиқариш бўлими бошлиғининг ўринбосари М. Вафоев, ишчилардан Ҳ. Жамолова, М. Худойбердиева, О. Эргашева, О. Остонов, О. Ҳайитова сингари касб фидойиларини фахр билан эътироф этиб ўтиш жоиз.
Ўзбекистон Республикаси Президентининг 2014 йил 16 декабрдаги "Навоийазот" АЖ негизида поливинилхлорид (ПВХ), каустик сода ва метанол ишлаб чиқариш комплекси қурилиши" инвестицион лойиҳасини амалга ошириш чора-тадбирлари тўғрисида"ги қарори ҳам бу йирик саноат корхонасининг истиқболини белгилаб берди. Мазкур инвестицион дастурнинг амалга оширилиши натижасида ички ва ташқи бозорда талаб кучли бўлган юқори технологияли кимё маҳсулотларининг янги турлари ишлаб чиқарилади. Энг муҳими, юзлаб янги иш ўринлари яратилади.
Бугун бу ерда ишчи-ходимларнинг саломатлигини муҳофаза қилиш, ижтимоий ҳимоя қилиш, меҳнат фахрийларини қўллаб-қувватлаш яхши йўлга қўйилган. Корхона таркибида кундузги стационар билан тиббий-санитария қисмида юқори малакали шифокорлар ва ўрта тиббиёт ходимлари хизмат кўрсатишади. Даволаш маскани кимёгарлар саломатлигини тиклаш учун замонавий тиббиёт ускуналари билан жиҳозланган. Фахрийлар бепул дам олиб, соғликларини тиклайдиган санаторий-профилакторийда ҳам барча шароитлар яратилган. "Офтобжон" болалар соғломлаштириш оромгоҳида эса ҳар йили кимёгарларнинг юзлаб фарзандлари ёз мавсумини мазмунли ва мароқли ўтказиб қайтишади.
Мамлакатимиз иқтисодиётида муҳим ўринга эга бўлган "Navoiyazot" акционерлик жамияти — республикамиз кимё саноатининг таянч нуқталаридан бири. Ўзларининг касб байрамларини муносиб кутиб олаётган корхона ходимлари янги марраларни кўзлаб, олдинга интилмоқда.
Исроил ХОЛБОЕВ.
Сурат муаллифи Жумамурот МИРЗАЕВ.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а