вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
18.07.2017 16:39:56
Болалик йилларимизда кўчадаги қизу ўғиллар кун бўйи ўйиндан бўшамасдик. Ҳали копток олиб тепган, ҳали бекинмачоқ, ҳали қувлашмачоқ ўйнаган. Ҳаммамизга ёқадигани футбол ўйини эди. Ҳовлимиз орқасидаги бўш майдонда тошдан "дарвоза" белгилаб, ўйинни бошлаб юборардик. Тупроқда югуриб, чангга ботиб, кечга томон мен, икки акам, амакимнинг болалари, уйга кириб борарканмиз, бу алфоздалигимиз учун албатта, ота-онамиздан дакки эшитардик. Бугун-чи?
Бугун ўша ерда замонавий футбол майдони қад ростлаган. Мактаб, коллеж, маҳаллалараро футбол ўйинлари ўтказилади. Чангга ботиб, фақат коптокнинг орқасидан югуриш йўқ. Истаган қиз волейбол, яна кимдир кураш, яна кимдир бадиий гимнастика билан шуғулланиш имконига эга спорт заллари мавжуд. Гарчи бу тарихан катта даврни қамраб олмасада, болалигимизда биз юрган ерларда бунчалик чиройли ўзгаришлар бўлишини ўйлаб ҳам кўрмаганмиз. Қисқа давр ичида мамлакатимизда спортни ривожлантириш учун шунча шароит яратилди. Бизку шаҳар марказидан унча узоқ бўлмаган қишлоқда яшардик. Бугун чекка туман, қишлоқларда ҳам спортсевар ёшлар учун етарлича шуғулланиш имкони бор.
Қай куни синфдош дугонамни учратиб қолдим. Жисмоний тарбия дарсларида у ҳаммамиздан илғор, эпчил эди. Айниқса, узоқ масофага югуришда барчамиздан ўзиб кетарди. — Маҳалламизда БЎСМ қурилганида бирам қувондим, — дейди у билан суҳбатлашарканмиз. — Спортни жону дилимдан яхши кўришимни биласан-а? Кураш тўгарагига ўғлимни ёздириб келдим. Биздан ҳам чемпионлар чиқсин. Ўғлим ҳам хурсанд. Ҳар кун дарсдан сўнг кўтаринки кайфиятда спорт мактабига кетади. Ўрганганларини келиб бизга завқ билан гапириб беради. Нимжонроқ бола эди. Кураш билан шуғулланаётганидан буён тетиклашди. Бақувват бўлди. Гап-сўзлари ҳам дадиллашиб қолди. Яқинда вилоят мусобақасига боради. Ҳозир мураббийи билан шунга тайёрланаяпти..."
Дугонам бугунги ёшларнинг спортда эришаётган ютуқларидан хурсанд бўлиб гапиради. "Ўғлимга айтаман, сен ҳам Олимпиада чемпиони бўлишинг мумкин. Фақат ҳамиша олдинга интил. Ўз устингда тинмай ишла. Ахир, Олимпия, Паралимпия ўйинларида ўзбекистонлик йигит-қизлар қандай фахрли ўринларни эгаллаб келишди. Ҳалигача бундан ғурурланаман. Фарзандим ҳам келгусида улар каби Ўзбекистон номини дунёга танитадиган бўлсин, дейманда". "Албатта, — дейман мен ҳам. — Астойдил хоҳиш бўлса, ғалаба уники."
Чиндан, бугун ўзбек ёшларининг дунё майдонида қўлга киритган ғалабаларидан ҳар қанча фахрлансак арзийди. Медаллар шодасининг йилдан йилга олтин, кумуш билан кўпайиб бораётгани ҳазилакам нарса эмас. Ҳаммасининг ортида тинимсиз машғулот, ирода, матонат, куч-ғайрат турибди. Ўтган йил Олимпиада ўйинларида ўзбекистонлик чармқўлқоп усталарининг дунёда умумжамоа ҳисобида тенгсиз деб топилганидан шунчаки қувониб бўлмайди. Бу чинакам ғурур, чинакам ғалаба! Бу чинакам шодиёна эди! Ёки Паралимпиячиларимизнинг ўттиз бир медаль билан юртга қайтишгани ўттиз икки нафар иштирокчи эканлиги ҳисобга олинса, тўлиқ муваффақиятли қатнашиш дегани эмасми? Ҳали дунёда қатнашчилар билан медаллар сонида бунчалик яқинлик бўлгани кузатилмаган эди. Биринчи Президентимизнинг саъй-ҳаракатлари билан спортчиларимиз дунёда муносиб ўрин эгаллашга муваффақ бўлишди. Бундан буёғига ана шу зафар йўлини ҳеч кимга бериб қўймай, мардонавор босиб ўтиш талаб этилади.
Ҳадемай тўрт йилликнинг нуфузли мусобақаси яна кучлиларни ўзига чорлайди. 2020 йили Токиода бўлиб ўтиши кутилаётган кейинги Олимпия ўйинларига лицензияни қўлга киритиш мусобақаларига ҳали вақт бўлсада, Навоий Олимпия захиралари коллежида ўқув-йиғин машғулотлари бошлаб юборилган.
— Спортчи ўқувчиларимизнинг икки юз нафардан ортиғи Ўзбекистон чемпионати ғолиби ва совриндорларидир, — дейди биз билан суҳбатда коллеж директорининг спорт ишлари бўйича ўринбосари Азиз Шомуродов. — Шундан олтмиш нафари спорт турлари бўйича Ўзбекистон миллий терма жамоаси аъзоси саналади. Нуфузли мусобақада қатнашиш лицензиясини қўлга киритиш учун халқаро даражадаги ғолибликлар эътиборга олинади. Яқинда Тошкент шаҳрида бўлиб ўтган юнон-рум кураши бўйича Ўзбекистон чемпионатида 3-босқич ўқувчиси Бегзод Умаров 1-ўринни қўлга киритди. Шунингдек, у спорт устаси унвонига ҳам эга бўлди. Бундан ташқари, апрель ойида Таиландда оғир атлетика бўйича ўтказилган дунёнинг қирқдан ортиқ давлатидан вакиллар қатнашган жаҳон чемпионатида Кумушхон Файзуллаева 58 кг. вазн тоифасида 3-ўринни эгаллади. Бу фахрли ўрин унга 2018 йили Аргентинада бўлиб ўтадиган 3-Ёшлар Олимпиадасида кучини яна бир муҳим синовдан ўтказиш имконини берди. 2020 йилги Олимпиадага тайёргарлик ишлари босқичма-босқич амалга оширилмоқда. Ва коллежимиз ўқувчиларининг унда иштирок этиши спортнинг оғир атлетика, енгил атлетика, эркин, юнон-рум кураши турларида кўпроқ кутилмоқда.
Вилоят эркин кураш федерацияси ижрочи директори Тўймурод Адизовнинг таъкидлашича, спортда спортчини моддий ва маънавий қўллаб-қувватлаш муҳим ўрин тутади. Масъул ташкилотларнинг спортчи жисмоний ва руҳий ҳолати барқарорлиги учун қўлдан келган кўмагини аямаслиги улкан зафарларга хизмат қилиши аниқ. Ўтган Олимпия ўйинларида эркин кураш бўйича Ихтиёр Наврўзовнинг совриндор бўлиши бутун навоийликларни бениҳоя хурсанд қилганди. Бу йил эркин курашчилар сафи янада ошиши мумкин. Айни пайтда катталар ўртасида Ўзбекистон чемпионлари 60 кг. вазнда Аббос Раҳмонов, 120 кг. вазнда Ҳасанбой Раҳимов, 97 кг. вазнда Баҳодир Аслоновлар, захирада эса ёшлар ўртасида Ўзбекистон чемпионлари Шерзод Шамсуддинов, Беҳзод Тоҳировлар ўқув-йиғин машғулотларини бошлаб юборишган. Жароҳати туфайли даволаниш муолажалари тезкор олиб борилишини интиқлик билан кутаётган яна бир ёшлар ўртасида чемпион Давлатбек Исматов ҳам захирага қўшилиши белгиланган. Гап спортга бефарқ бўлмаган мутасадди ташкилот вакилларининг бу йўлда ҳомийлик қилишларини тезлаштиришда қолган, холос. Ватан байроғини жаҳон ареналарида мағрур ҳилпиратишни юракдан истаётган спортчи саломатлигини тиклаш пайсалга солинадиган иш эмас, аслида.
— Аббос Раҳмонов, Ҳасан-Ҳусанбой Раҳимовлар Россияда ўқув-йиғин машғулотларида иштирок этишмоқда, — дейди уларнинг мураббийи Т. Адизов. — Аббос ва Ҳусанбой яқинда Озарбайжонда бўлиб ўтадиган халқаро турнирда қатнашади. Умид қиламизки, курашчиларимиз ўзларига билдирилган ишончни оқлашади.
Баҳодир Аслонов НДПИ 2-босқич талабаси. Шу йилнинг февраль ойида у Болгарияда бўлиб ўтган эркин кураш бўйича халқаро турнирда ғолиб бўлди. Айни пайтда у Тошкентда ўқув-йиғин машғулотларида қатнашмоқда.
— 14 ёшимдан буён эркин кураш билан шуғулланаман, — дейди у. — Машғулотларда дилимда доим юксак мақсад бўлади. Орзуим Олимпиада ўйинларида қатнашиб, ғолиб бўлиш.
Шунингдек, Паралимпияга ҳозирлик ишлари ҳам қизғин тусга кирган. Айни кунларда паралимпиячилар енгил атлетика бўйича тажрибали мураббий Игорь Шишков бошчилигида сентябрь ойида Лондонда бўлиб ўтадиган жаҳон чемпионатига тайёргарлик кўришмоқда. Ундаги фахрли ўрин спортчиларимизни Токиога, Паралимпия мусобақаларига янада яқинлаштиради…
Ишдан қайтарканман, яна ўша дугонам билан кўришиб қолдик. У ўзида йўқ хурсанд эди. "Мени табрикла, дугонажон. Ўғлим вилоятда ғолиб бўлди. Энди республика мусобақасида қатнашаркан!" деб қолди. Бу гапдан менинг ҳам бошим осмонга етди. Дугонамни чин дилдан қутладим. "Энди менинг ўғлим ҳақида ҳам ёзасанми?" "Албатта! Ҳали у Олимпия ғолиби ҳам бўлади. Кўрасан" дедим. Ватан шаънини муносиб ҳимоя қилиш учун майдонга тушадиган шижоатли, юраги қайноқ, ғурури баланд спортчи ҳақида ёзмай бўларканми?
Зулфия БОБОЕВА.
Манбаа: dustlikbayrogi.uz