вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Ҳоким билан мулоқот

20.05.2016 13:19:01

Яқинда вилоят ҳокими Эркинжон Турдимов бир гуруҳ иқтидорли ёшлар билан учрашди.

"Ватан келажаги сенинг қўлингда" шиори остида ўтказилган тадбирда Президентимиз раҳнамолигида ёш авлодни комил инсонлар этиб тарбиялаш, уларнинг замонавий билим ва касб-ҳунар сирларини пухта ўзлаштириш, истеъдод ва салоҳиятини намоён этишига қаратилаётган алоҳида эътибор юксак самаралар бераётгани таъкидланди. Давлатимиз раҳбарининг "Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида"ги қарори бу борадаги эзгу ишларни янги босқичга кўтаришда муҳим дастуриламал бўлаётир.

"Ёшлар маркази"да ўтказилган учрашувда вилоятдаги умумтаълим мактаблари, академик лицей ва касб-ҳунар коллежларида таҳсил олаётган, турли соҳаларда меҳнат қилаётган 400 нафардан зиёд ёш иштирок этди.

— Мустақиллик йилларида йигит-қизларимиз халқаро фан олимпиадалари, нуфузли спорт мусобақалари, турли йирик мусиқа ва санъат танловлари, фестиваллари, кўргазмаларида дунёда ҳеч кимдан кам эмаслигини намоён қилиб келмоқда, — дейди "Ёш лидерлар" тўгараги раҳбари Ҳулкар Fаппорова. — Бунда навоийлик ёшларнинг ҳам алоҳида ўрни бор.

Қизғин фикр алмашувлар тарзида ўтган мулоқотда ёшлар ўз таклиф-мулоҳазалари, ҳаётда учрайдиган айрим муаммолар тўғрисидаги дадил фикрлари билан фаол қатнашди. Айниқса, мактаб ўқувчиларининг академик лицей ва касб-ҳунар коллежларига саёҳатлар уюштириш, абитуриентлар учун НДПИ ва НДКИ қошида тўгараклар фаолиятини йўлга қўйиш, коллежларнинг ветеринария йўналишлари учун махсус жиҳозлар билан таъминланган лабораториялар барпо этиш ҳамда битирувчиларнинг бандлигини назорат қилиш, шаҳардаги марказий дам олиш ва истироҳат боғида чегирмали Wi-Fi хоналари ташкил қилиш, спортчи ёшларни моддий қўллаб-қувватлаш каби таклифлари кўпчилик томонидан қўллаб-қувватланиб, мутасадди раҳбарларга тегишли топшириқлар берилди. Мулоқотда тадбиркорлик фаолияти билан шуғулланаётган ёшлар ҳам ўзлари амалга ошираётган ишлар ва келгуси режалари ҳақида фикр алмашди.

— Бугунги учрашувда тўгарагимизни лего роботлар жамланмаси билан таъминлаш ҳақидаги таклифим қўллаб-қувватланганлигидан хурсандман, — дейди Creative инновацион ғоялар тўгараги аъзоси Сардор Раҳмонов. — Бу дастур орқали ўқувчилар назарий билимларини амалиётда татбиқ қилишлари учун бир қанча имкониятлар мавжуд. Гуруҳ аъзоларининг дастурлаш тили ва механикани ўрганишлари билан бирга, техник ижодкорлик қобилияти ҳам ривожланади.

Тадбир якунида ўз йўналиши бўйича салмоқли ютуқларга эришаётган истеъдодли йигит-қизларга вилоят ҳокимлигининг эсдалик совғалари топширилди.

Хуршида НАРЗИЕВА.

Манбаа: dustlikbayrogi.uz