вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
07.12.2014 13:50:29
Санъат — инсон қалбининг гўзал, таъсирли руҳияти. У қалбда туғилади ва яшайди. "Ўзбекистон" телевидениесининг "Дилнаво" кўрсатув дастурида шу йил конимехлик истеъдодли хушовоз хонанда Қодир Жўрақулов ижросидаги мумтоз, лирик қўшиқлар санъатсевар халқимиз ҳукмига ҳавола қилинди. Ранг-баранг қўшиқлар ўзбек, қорақалпоқ, қозоқ тилларида ижро этилди.
Булар дастур мазмун-моҳиятини оширганининг туб мағзида Қодирнинг истеъдоди асос бўлганлиги, шак-шубҳасиз. Чунки у шу тилларнинг жозибасини, ширасини, оҳангдорлигини, хуллас, одамлар кўнглига ҳузурбахш руҳда етиб боришини ўзининг ижрочилик маҳорати билан кўрсата олди. Унинг санъати ихлосмандларга мақбул келди, шекилли, кўрсатув телевидениеда такрор ва такрор кўрсатилмоқда. Яна қувонарли томони: ушбу дастур Ўзбекистон Миллий телерадиокомпаниясининг олтин хазинасидан муносиб ўрин олганлигидир.
Қўшиқчилик санъатига чин меҳрини қўйган, унинг заҳмат, меҳнатига бардош берган; изланишларда ўзига хослик жиҳатларни топишга интилган одамнинг мақсадга етмоқлиги аниқ. Қодир болалик, ёшлик йилларида қўлига рубоб, тор олиб, созандаликнинг сирларини ўзлаштириб бориш билан бир пайтда қўшиқ куйлаб, мукаммалликка эришиш учун интилди. Интилар, изланар экан, Маъмуржон Узоқов, Комилжон Отаниёзов, Отажон Худойшукуров, Бобомурод Ҳамдамов сингари етук санъаткорлар яратган мактабга эътиқод қўйди; улар санъатидан сабоқ олиб, ўз талқинида ижро қилиш, гарчи қийин бўлса-да, тинмай меҳнат лозим эканлигига ишонч ҳосил қилди ва қатъийлик билан ўз устида ишлади.
Маҳорат, истеъдод эътироф этилганда, беихтиёр, кишида ҳавас, эътиқод ўз-ўзидан вужудга келадики, уни зўр ҳаяжонли олқишларимиз билан кўрсатамиз. Бу, албатта, инсон талантига бўлган чексиз меҳр-муҳаббатимиз ифодасидир. Бунга эришмоқ хонанда, санъаткор учун нақадар бахт! Қодир Жўрақулов бунга етишиш, шундай қувончли кунларни кўриш учун кўп ва хўп меҳнат қилди, тинимсиз изланди...
— Халқимизнинг доно нақли бор: "Яхшига эргашсанг, яхшилик кўрасан".Қодир Жўрақулов билан ўзаро ижодий ҳамкорликда бўлиб юрганимиздан жуда мамнунмиз, — дейди НКМКга қарашли "Фарҳод" маданият саройининг "Ниҳол" оркестри раҳбари Fайрат Маъдуллаев. — "Дилнаво" телекўрсатувида куйланган қўшиқларга басталанган куйларни ўзимизнинг вилоят мусиқачилари ижро қилишди. Ўшанда ҳам қувониб, ҳам масъулиятни ҳис қилиб, бор кучимиз билан ўз қобилиятимизни кўрсатишга интилдик.
Қодир Жўрақулов ўттиз икки йилдан буён Конимех туман маданият уйида ҳалол ва виждонан хизмат кўрсатиб келади. "Ёшлик" ашула ва рақс ансамблининг бадиий раҳбари; ансамбль аъзолари туман, вилоят ва ҳатто, республика миқёсида бўлиб ўтган маънавий-маърифий тадбирларда ҳам иштирок этиб, ўз санъатларини намойиш этишди.
Санъат, санъаткор эл назарида бўлмоғи керак. Қ. Жўрақулов самарали ва фидокорона меҳнатлари учун "Қорақалпоғистонда хизмат кўрсатган артист", "Ўзбекистон Республикасида хизмат кўрсатган маданият ходими" унвонларига сазовор бўлди.
Истеъдодлар қишлоқда туғилади ва шаҳарда машҳур бўлади, деган ҳазиломуз гап санъат аҳли орасида юради. Балким... Аммо орамизда шундай камтарин истеъдодлар учрайдики, улар жонажон қишлоғида яшаб туриб, обрў қозониша олади. Бунда улар ўз қобилиятларига ишонишади. Бу ишонч уларнинг парвозига қудратли қанот бағишлайди. Севимли хонандамиз Қ. Жўрақулов ана шундай ибратли йўлни танлаган ва қалби буюргандек, санъатнинг машақатли, аммо шарафли йўлида фидойилик кўрсатиб яшашни инсонийлик бурчим, деб билганлиги — унинг мард ва танти инсон эканлигидандир.
Қодир куйлашга қодир экан, юксак парвозига тилакдошмиз!
Раҳим ҚОДИР,
Ўзбекистон Ёзувчилар уюшмасининг аъзоси.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а