вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
23.12.2014 14:56:07
Жорий йилнинг 1-20 октябрь кунлари 15 ёшдан 25 ёшгача бўлган респондент ёшлар ўртасида "оммавий маданият" ҳамда турли мафкуравий хуруж ва оқимлар салбий оқибатларининг олдини олиш, ёшларнинг глобаллашув жараёнлари, оила ва миллий қадриятлар борасидаги дунёқарашларини ўрганиш мақсадида 24 саволдан иборат аноним тарзидаги ижтимоий сўровнома ўтказилди.
Тезкор глобаллашув замонининг маҳсули бўлган чексиз ахборот алмашинуви ҳамда юксак имконият ва қулайликларга эга бўлган техника асрида бу каби фикрлар ўзининг аниқ жавобини кутиб келмоқда.
Аниқроғи, "Одно", "Чат" каби виртуал олам ичида яшаб келаётган, давра суҳбатлари жараёнида бизнинг навбатчи, қуруқ "оммавий маданият" каби маърузаларимиздан безиб, орқа ўриндиқда "Bluеtooth" орқали "оммавий маданият" алмашаётган айрим ёшларнинг "муғомбирона" боқувчи кўзлари ҳалигача жавобни изламоқда.
Очиғи, ёшлар билан ўтказилаётган кўплаб маънавий-маърифий тарғибот-ташвиқот ишларида биз маърузачилар ёшларга қарата "оммавий маданият"нинг салбий кўринишлари, турли мафкуравий хуружлардан ҳимояланишларингиз учун бадиий асарларни кўпроқ мутолаа қилишингиз шарт", дея маслаҳат берамиз-у, аммо аксарият ҳолларда ўзимиз бадиий асар кўчаларидан ўтганимизга "бир асрдан ошиб" кетганлигини хаёлимизга ҳам келтирмаймиз.
Агарда биз тарғиботчилар ҳар томонлама кучли маънавий қуролланган бўлганимизда, бугун фалон жойда боғча болаларига хўрозқанд бериб "тинчлантириб" келаман эмас, мени аудиторияда ҳар лаҳзада дунёда юз бераётган воқеа-ҳодисалардан хабардор бўлиб турган, чўнтагидаги телефони орқали бутун дунёни сўроқлаётган шижоатли операторлар, ота-онасини рози қилиш учун тинмай билим олаётган юрт эртаси, ёшларга оид давлат сиёсатининг улкан имкониятларидан кенг фойдаланишга ҳаракат қилаётган юрт келажаги кутмоқда, дея фикрлар билан ёндашилса эди, таълим муассасаларидаги тадбирларда гуруҳ раҳбарларига қўшилиб, зериккан ўқувчилар тепасида "соқчилик" қилмасдик?
Энг ачинарлиси, бошимизни кўтармай, терлаб ўқиб бераётган маърузаларимиз етмагандай, охирида "Кимда савол бор?.. Демак, саволлар йўқ. Одатда икки ҳолатда саволлар бўлмайди, ё ҳамма тушунганда ё ҳеч ким тушунмаганда... Демак, барча тушунди", дея энди савол беришга шайланаётган ўқувчилар шижоатини сўндиришимиз етмагандек, ўзимиз гапириб, ўзимиз эшитиб, ўзимиз хулоса чиқариб, мақтанмаган бўлардик?
Хўш, биз ушбу саволларга қачон ва қандай жавоб берамиз?
Қачонки, ўзимиз ҳам шарқона тарбиянинг энг самарали ҳамда беминнат усули бўлган, ота-боболаримиз нимқоронғи шам ёруғида ҳам "Навоийхонлик", "Бобурхонлик", "Машрабхонлик" қилган бадиий адабиётни қайта қўлга олиб, мутолаа қилишни бошласаккина кўзлаган мақсадимизга эриша оламиз. Шундагина ёшларимизни бадиий адабиётдаги хилма-хил руҳий жараёнлар орқали Интернет оламидан орттирган депрессия ҳолатидан қутқара оламиз. Шундагина бирор бир кўнгилсизликнинг оқибатини фақатгина реал ҳаётда бошимизга тушганда эмас, балки олдиндан ҳис этишларига, керак бўлса, яқинлашиб келаётган фалокатнинг соясини ақл кўзлари билан кўришларига имкон яратган бўламиз.
Қандай қилиб? Айтайлик, аудиторияда ёшлар ўртасида тинчлик неъмати ҳақида гапирганда, албатта, кучли таъсир воситаси бўлган таққослаш усулини қўллашимиз, жумладан, Иккинчи жаҳон уруши якунида жабрдийда японларнинг хотирасида муҳрланган Хиросимада портлаган даҳшатли атом бомбасининг фожиали оқибатлари, дунёда тобора авж олаётган ёвуз бузғунчи ғоялар ҳамласига бефарқ бўлмаслик, тобора чигаллашиб бораётган носоғлом сиёсий-ижтимоий воқеалар тўғрисида суҳбатлашмоғимиз ҳамда аудиториядаги ёшларнинг онг ости безларига таъсир кўрсатиш мақсадида саволлар бера бошлаймиз. Уларни атом бомбаси портлаши, қўрқинчли асоратлари қандай бўлиши ҳақида тасаввур қилишга ундаймиз. "Сиз тасаввур қилинг! Атом бомбаси портлади. Тасвирлаб беринг-чи? — деган саволингизга: "Агар атом бомбаси портласа, Ер юзи йўқ бўлади", "Ҳамма жазавага тушиб қолади", "Кимнингдир қўли, оёғи жароҳатланади", "Қулоқни қоматга келтирувчи ўкирган овоз эшитилади", "Автобусда юриш текин бўларди", "Биз деразадан сакраб қочардик", "Чиройли мушакбозлик бўлса керак"... каби саёз, ҳатто менсимаслик оҳангидаги баёнларни эшитамиз. Бироқ, ҳеч қайси ўқувчининг эти жунжикмайди, мавзу аҳамияти ва долзарблиги кутилган натижасини бермайди. Аудиториядаги бевақт кулги, пичинг, саёз фикрлар оқибатида ёшлар назорати издан чиқа бошлайди. Эътибор берсангиз, аудиторияда бефарқ чеҳралар, ҳуштакбозликлар, бўлар-бўлмасга қарсак чалишлар, эшикка умид билан боқиб турган лоқайд кўзлар кўпая бошлайди.
Шу лаҳзада бугун дунёда 20 дан ортиқ давлат атом қуролига эга бўлиш мақсадида курашаётганлиги, 120 дан ортиғи эса дунёга ҳукмронлик қилишда атом бомбасининг кучидан эмас, айнан ёшлар онгини заҳарлаш орқали эришишни мақсад қилганлиги, ҳатто махсус институтлар турли дастур, лойиҳалар устида бош қотириб, ёшларнинг дунёқарашини заҳарлашга уринаётганлиги, энг муҳими, япон заминида портлаган атом бомбаси фожиалари кенг ёритилган япон ёзувчиси Ибусэнинг "Қора ёмғир" асаридаги таъсирли жумлалардан фойдаланганда атом бомбасининг даҳшатли оқибатлари таъсирли ёритилиб бериларди. Албатта, бунинг учун асарни тушида кўриш эмас, мутолаа қилиш талаб этилади. Жумладан:
"Сидзима бозор растасида денгиз кўкатларини сотар, унинг ёнида ўтирган тўрт ёшли қизалоқ эса нуқул одамларга қараб тиржайиб турарди. Қўққисдан, чамаси беш километр наридан кимнингдир ёки ниманингдир даҳшатли ўкиригига ўхшаган хунук товуш эшитилди. Бу янги ташланган бомба бўлса керак. Бу кучли товуш олдинги бомбалар овозига умуман ўхшамасди. Бир зумда осмонда оппоқ қўзиқоринга ўхшаган тутун пайдо бўла бошлади. Тутун борган сари осмонни қоплаб келмоқда эди. Унинг ҳаракати худди ичидан қайнаб чиқаётган иссиқ буғ қозонига ўхшарди. Улкан булутнинг қора сояси бутун шаҳарни қоплаб ола бошлади"...
"Чиройли мушакбозлик бўлса керак", деган ўқувчининг кесатиқ тасаввурининг таъсирчанлиги қаерда-ю, бадиий асарда келтирилган воқеа тафсилотлари қаерда. Демак, бадиий адабиётнинг реал ҳаётни тасаввур этишда фойдаси бор.
"Хиросимадан чамаси беш километр нарида портлаган антиқа бомбанинг иссиқ шамоли бир зумда кўчада юрган одамларнинг сочларини майин силаб ўтди. Гармселга ўхшаб эсган шамол кетидан дабдурустдан яна бир кучли шамол эсди. Беш километр наридан келган бомбанинг шамоли кўчадаги аксарият одамларни ерга юзтубан йиқитди"...
"Биз деразадан сакраб қочардик", деган айрим ёшлар ҳазили қаерда-ю, портлаган бомбанинг шамоли беш километр наридаги инсонларни ерга юзтубан йиқитгани қаерда. Аслида, одам боласи кучли довулда ҳам қоматини тута олади. Аммо, ерга юзтубан йиқилдими, демак, бу даҳшат.
"Ясуко амакиси Сидзимага ўша куни кўчада унинг сочларини иссиқ шамол силаганини, шундан сўнг унинг баданида қизил тошмалар пайдо бўлаётгани ҳақида гапириб берди. Ёш қизалоқ ҳеч нарсага тушунмаган эди. Ахир унга ўлим шарпаси яқинлашаётган эди. Чунки у бечора..."
"Автобусда юриш текин бўларди", дея тиржайган ўспирин дарди қаерда-ю, жияни сочини силаган ўша иссиқ шамол аслида жиянининг бомбадан нурланганлиги, нурланган инсон охир-оқибат не-не азобда жон таслим қилишини ўйлаб, ичидан йиғлаётган амакисининг дарди қаерда. Ахир, унга ўлим шарпаси яқинлашаётган эди. Чунки у бечора атом бомбасидан нурланган эди.
"Орадан икки ҳафта ўтгач, Ясуконинг бутун баданини қизил чипқон қоплади. Тун ярмидан ошганда Ясуко баданининг қичиб оғриши ҳамда моматалоқ бўлиб кетаётганидан қон йиғлади. Кимоносини ечиб орқасини қашиб қўйишини, акс ҳолда ачишиб қичиётган елкасини кесиб ташлашини айтиб, келинойисига ёлворди. Ясуконинг кимоносини ечиб, унинг орқасини қашимоқчи бўлган келинойиси ҳайратдан ёқа ушлади. Унинг бурнига қўланса бир ҳид гуп этиб урди, бўғзига нимадир тиқилиб, кўнгли айниб қайт қилишига оз қолди. Чунки Ясуконинг баданидаги чипқон яралар ёрилиб унинг ичидан саноқсиз бадбўй қуртлар ғимирлаб оғзини тепага қилиб турарди..."
"Автобусда юриш текин бўларди", "Биз деразадан сакраб қочардик", "Чиройли мушакбозлик бўлса керак", дея енгил-елпи фикр билдирган айрим ёшлар фикрини билдирганда бутун аудиториянинг масалага енгил-елпи қараши қаерда-ю, даҳшатли уруш боласи атом бомбасининг касофатидан инсон аталмиш буюк мавжудотнинг тирик мурда каби қуртлаб юришини эшитиб тасаввур қилишга қийналаётган, тасаввур қилганлари эса даҳшатли тасаввурлардан безовта бўлаётганлари қаерда.
Ўз-ўзидан ёшлар бу бало инсоният бошига не-не фалокатлар олиб келиши мумкинлиги ҳақида ҳис қилишди. Энг асосийси, улар онгида илк бора ростданам бадиий китобнинг кучи шунчалик таъсирлими, деган савол бонг ура бошлади. Ана бу ҳодиса сиз кутган ғалабанинг илк нашидаси, бизнингча.
Бу каби исбот сиз каби бадиий асарлар ҳамда дунёда кечаётган воқеа-ҳодисаларни таққослаш йўли орқали ёшлар онгида соғлом фикр, эзгулик нурларини тарқатаётган зиё карвонларининг ютуғи эмасми?
Эртага фалон туманда юрт келажаги бўлган ёшлар билан юзма-юз кўришишини ҳис қилган ҳолда "Эртага ёш авлод, Ўзбекистон келажагини қандай ҳайратлантирсам экан", дея туни билан мижжа қоқмасдан инсонийлик масъулиятини сезаётган илм шуъласининг нурлари эмасми?
Хулоса ўрнида, мақола бошида айнан бир респондент қизнинг фикри бизни огоҳликка чақиргани ҳақида айтиб ўтгандик. Тўғри, атрофимизда ўзларининг заҳарли мафкураларини ёшларимиз онгига сингдиришга ҳаракат қилаётган нияти бузуқлар олдида мудроқ босиб ухлаб қолмайлик. Реал ҳаётда бадиий китобнинг фойдаси йўқ, дея бонг ураётган айрим фарзандларимизни бағримизга қайтариб олайлик.
Зеро, ҳар бир зиёкор Шарқ маҳалласидаги бешикларда алла эшитиб улғайган чақалоқ учун энг кучли педагог-психолог китоб эканлигини мустақил равишда теран англаши ҳамда ҳар бир бадиий китоб жонкуяри буюк адибимиз устоз Абдулла Қаҳҳорнинг ушбу сўзларини унутмаслиги шарт: "Адабиёт — атомдан кучли. Фақат унинг кучини ўтин ёришга сарфламаслик керак".
Жонибек ШУҲРАТОВ,
Фуқаролик жамияти шаклланишини мониторинг қилиш мустақил институти Навоий ҳудудий бўлинмаси етакчи мутахассиси.