вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
24.12.2014 11:15:54
Қадим Нуротанинг мармари, кашта-ю, сўзаналари эл оғзига тушган. Пурвиқор тоғлари каби салобатли, дала-даштлари сингари меҳнаткаш, зилол булоқларидек тиниқ табиатли одамлари орасида ўлан айтган бахшилар, ашъор битган шоирлар, кураги ерга тегмаган полвонлар кўп. Ўтмиш-анъана қадриятларини бугунги кунда давом эттириб, замонавий сайқал бераётган ёшлар бобомерос, момолардан ёдгор урф-одат ва қадриятларга содиқ қолган ҳолда ижод қилмоқдалар. Соф тупроқ, лой ва гилдан сопол буюмлар, турли ўйинчоқлар ясаш дунёнинг кўпгина халқларида анъанага айланган. Масалан, Латвияда ҳарбий хизматни ўтаган чоғимда маҳаллий миллат вакилларининг ранг-баранг кулолчилик ишларини кўриб ҳайратланганман.Ўзимизда ҳам бу ҳунарни санъат даражасига олиб чиққан халқ усталари азалдан яшаб келган.
Ўзбекистон Бадиий Академияси тасарруфидаги вилоят ихтисослаштирилган санъат мактаб-интернатида айни пайтда 100 нафар ўқувчи таҳсил олади. 2015-2016 ўқув йилидан эса ўқувчилар сафи кенгаяди. Вилоят миқёсидаги ушбу таълим даргоҳи янги бунёд этилган 330 ўринли ўқув биноси ва 100 ўринга мўлжалланган ётоқхонага эга. Бу ерда спорт зали, футбол майдони, ошхона ва бошқа ёрдамчи бинолар ҳам мавжуд.
Мактаб-интернатда тасвирий ва амалий санъат соҳасида истеъдодли ёшларга сабоқ берилади. Уста-кулол Баҳодир Сарибоевнинг Сардорбек Файзиев, Севара Олимова, Жавоҳир Ҳамроқулов, Муниса Наимова, Ҳаёт Мирзаев, Фарҳод Қўзиев каби 40 нафарга яқин шогирди ҳавасу ҳайрат билан миллий ҳамда замонавий руҳдаги ўйинчоқларни пластилин, лой ва гипсдан тайёрлашади. Кулол чархида болалар томонидан турли ҳажм ва шаклда тайёрланган сопол ўйинчоқлар, товоқ, коса, лаган, ликопча, кўза каби рўзғор буюмлари кейинчалик Баҳодир аканинг уйидаги махсус хумдонда пиширилади. Ҳозирча мактаб-интернатда бу имконият яратилмаган. Қўлига мойбўёқли қаламини олиб, ўзлари ясаган шаклларга ранг бераётган болалар хаёлотининг чегараси йўқ: туёғидан ўт чақнаган, пойгага шай оқ тулпор, қанот ёзиб турган лочин, қалпоқ кийган мушук; уй-рўзғор анжомлари кенг стол устига териб қўйилибди. Фойе ва залларда эса ёш мусаввирлар чизган ранг-тасвир намуналари, суратлар осилган.
— Мактаб-интернатимизда асосан қалам-тасвир, ранг-тасвир, фикрлаш-композиция йўналишлари, миниатюра бўйича машғулотлар олиб борилади, — дейди Б. Сарибоев. —Ўқувчиларимиз нафақат "Келажак овози", "Камалак юлдузлари", "Мастер.uz" каби турли фестиваль, кўрик-танлов ва кўргазмаларда, балки халқаро миқёсдаги шундай тадбирларда ҳам намунали иштирок этиб келмоқда. Масалан, 9-синф ўқувчиси Азиз Турсунов "Камалак юлдузлари" кўрик-танловининг республика босқичида тасвирий санъат йўналиши бўйича 1-ўрин соҳиби бўлди ҳамда диплом ва қимматбаҳо совға билан тақдирланди. Имконияти чекланган ўқувчилар ўртасида ўтказилган "Мафтункор ранглар жилоси" вилоят санъат кўргазмасида Жавоҳир Ҳамроқулов совриндорлар сафидан жой олди.
Шогирдларининг ютуқлари ҳақида фахр билан сўзлаётган Баҳодир аканинг бобоси Авезхўжа ганчкор уста сифатида Нуротада донг таратган. Бу касбни давом эттирган невара кам бўлмади. "Меҳнат инсонни улуғлайди", деган ҳикмат кулол иш фаолиятининг мазмунидир. У ўзи ва шогирдларининг ижодий ишларини олиб, Тошкент шаҳрида, Алишер Навоий номли Миллий боғда ҳар ойда бир марта ўтадиган "Мастер.uz" ярмаркасида қатнашиб туради. Айни кунда устоз-шогирдлар янги 2015 йилнинг февралида Алишер Навоий ҳазратлари таваллуд санасига бағишланадиган ана шундай ярмаркага тайёргарлик кўришмоқда.
Жамолиддин ҲОТАМОВ.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а