вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Кексалар дуоси асрайди элни

28.01.2015 11:28:21

Катталарга ҳурмат, кичикларга иззат кўрсатиш халқимизга хос улуғ фазилат. Кексаларни қадрлаш, уларнинг маслаҳат-кўрсатмасига таяниб иш тутиш азалдан қонимизда бор. Бироқ, тан олиш керакки, ҳозирги вақтда ҳамма ёшларимиз ҳам бунга бир хилда амал қилаётгани йўқ. Интернет, телефон ва бошқа ахборот воситалари таъсирида "замонавийлашган", ўзидан бошқани тан олмайдиган ўғил-қизлар ҳам учрайди орамизда.

Ана шундай бир пайтда муҳтарам Юртбошимиз томонидан 2015 йилнинг "Кексаларни эъзозлаш йили" деб номлангани ёшлар тарбияси учун ҳам катта аҳамият касб этади. Чунки тарбиянинг энг яхши воситаси ибратдир ва ҳукуматимиз томонидан қарияларнинг қадрланаётгани бугунги авлодга ҳақиқатдан намуна бўлиши шубҳасиз.

Дунё халқлари ўртасида жамоа бўлиб ҳаёт кечиришдан кўра, ёлғиз яшашга мойиллик тобора кучайиб бораётган бугунги глобаллашув жараёнида нуронийларимизнинг ёшлар тарбиясидаги ўрни, уларнинг насиҳатлари, кўрсатаётган йўл-йўриқлари бебаҳо миллий-маънавий бойликдир. Хонадонларимиз фаришталари бўлмиш кексалар яқин ўтмишни бугунги дориламон кунларга қиёслаб, ҳаётий хулоса чиқарган ҳолда ёшларни тинчлик-осойишталикдек буюк неъматнинг қадрига етишга ундайдилар.

Президентимиз Ислом Каримов Ўзбекистон Республикаси Конституцияси қабул қилинганининг 22 йиллигига бағишланган тантанали маросимдаги "Мамлакатимизни демократик янгилаш ва модернизация қилишга қаратилган тараққиёт йўлимизни қатъият билан давом эттириш — бош мақсадимиздир" номли маърузасида "Халқимизнинг қадимий ва шонли тарихини узвий давом эттиришга, шу тарихнинг ўчмас саҳифаларини, аждодларимизнинг буюк меросини, қадрият ва урф-одатларини ёшларимизга етказиш, ҳаётимизни тобора поклаш ва файзу баракали қилишда, бир сўз билан айтганда, уни маънавий юксалтиришда, бугун Яратганнинг бизга берган ҳар бир кунини маъноли ва сермазмун ўтказишда беқиёс ҳисса қўшаётган ота-боболаримизга ҳар томонлама ҳурмат, эъзоз ва эҳтиром кўрсатиш барчамиз учун ҳам қарз, ҳам фарз", дея таъкидлади.

Дарҳақиқат, кексаларни эъзозлашдек инсонпарварлик замирида улкан маъно-мазмун мужассам. Зеро, фарзандлар камоли — юрт қудратини, аёлларга муносабат -маданиятимиз даражасини, кексаларга ҳурмат ва эътибор эса маънавиятимиз истиқболини белгилайди. Насиҳатгўй нуронийлари бор элни Яратган қўллайди, бундай юртга қут-барака ёғилади. Кексаларнинг дуолари тинчлик-осойишталикни, фаровонликни асрайди.

Шаҳло НОРТОЖИЕВА,

Навоий компьютер ва ахборот технологиялари

академик лицейи ўқитувчиси.