вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
13.08.2015 09:57:31
Яқинда Учқудуқда содир бўлган қувончли воқеа туманда яшовчи ҳар бир хонадонга ҳавас ва ҳайрат эпкинини олиб кирди. Бир пиёла чой устида гурунгга тўпланган кексалар ҳам, эндигина турмуш қурган ёш келин-куёвлар ҳам "Қулқудуқ" овул фуқаролар йиғинида яшовчи Баубек Базаров ва унинг турмуш ўртоғи Ойгул Абулованинг бахтидан сўйларди. Чунки ушбу оилада 3 нафар эгизак фарзанд — бир ўғил ва икки қиз дунёга келди.
Чақалоқ келган оила, шубҳасиз, шодликларга тўлиб кетади. Жажжи вужуд ўзи билан бирга олам-олам қувонч, инсон кўксини орзуларга тўлдириб юборгувчи бахт олиб келади. Агар улар эгиз бўлишса ота-онанинг севинчи икки чандон, бордию уч нафар бўлишса уч чандон ортади. Баубек Базаров ва Ойгул Абулованинг қувончи Қизилқумнинг кўз илғамас кенгликларигаям сиғмаётганлиги шундан.
— Набираларимнинг дунёга келиши биз учун унутилмас кун бўлди. Яхши ниятлар билан уларга Дийдар, Динара, Дилара, деб исм қўйдик. Каттаси ўғил, улғайса сингилларининг ҳимоячиси бўлади, — дейди чақалоқларнинг бувиси Рая Базарова.
Халқимиз маънавиятига сингиб кетган ажойиб бир одат бор: чақалоқ келган хонадонга қўни-қўшнилар эътиборли бўлишади, кўпни кўрган онахонлар дастурхон кўтариб, улар ҳолидан хабар олгани чиқишади ҳамда ёш онага бола парвариши билан боғлиқ ўз тажрибаларини ўргатишади. Ёш болали оилалар давлатимиз томонидан ҳам ижтимоий ҳимояга олинган. Чақалоқларнинг соғлом униб-ўсиши учун Базаровлар оиласига кўплаб ташкилотлар томонидан кўмак берилди. Масалан, "Маҳалла" хайрия жамоат фонди туман бўлинмаси 300000 сўм пул ажратган бўлса, "Қулқудуқ" ширкат хўжалиги раҳбарияти 4 бош майда шохли мол ҳадя қилди. Туман халқ таълими муассасалари фаолиятини методик таъминлаш ва ташкил этиш бўлими томонидан эса соғин сигир берилди.
— Ҳозирда учала чақалоқнинг ҳам соғлиги яхши. Уларнинг соғлом ўсишига алоҳида эътибор қаратганмиз. Хонадонга кунора бориб, хабар олиб турибмиз. Қолаверса, туман тиббиёт бирлашмаси томонидан ажратилган шифокор ҳафтада бир марта келиб, чақалоқларни тиббий кўрикдан ўтказиб кетмоқда, — дейди "Қулқудуқ" қишлоқ врачлик пункти мудири вазифасини вақтинчалик бажарувчи Зафар Шамсиев.
Қизилқум бағридаги ушбу овулда 196 та оила яшайди. Эрта тонгдан ишга шошилганлар ҳам, отарини яйловга ҳайдаганлар ҳам узоқдан овоз чиқариб бўлса-да, Баубекдан эгизакларнинг аҳволини сўраб ўтади. Овулдаги ёш болакаю қизалоқлар эса нонушта қилгач, чақалоқларни кўргани Рая бувиникига югуришади.
Саксовулдан саксовулга қўниб юрган тўрғайлар уй томига келиб, учта бешик қуршовида ўтирган Ойгул Абилованинг алласига жўр бўлади. Она бешикларни оҳиста тебратганча фарзандларига нурли иқбол тилайди. Биз ҳам ушбу оилага ҳавас қилганча, тўйлар-тўйларга уланаётган юртимиздаги барча чақалоқларнинг толеи баланд бўлсин, дея ният қилдик.
Р. САБУРОВ.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а