вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
20.06.2016 10:15:21
Мустақиллик — энг улуғ неъмат. Шукрки, истиқлол бизга ўз хоҳиш- иродамизни эркин ифода этиш, тинч ва осойишта ҳаёт кечиришдек энг олий қадриятларни туҳфа этди. Юртимиз истиқлолга эришганига йигирма беш йил тўлмоқда. Ўтган тарихан қисқа давр ичида мамлакатимиз ҳаётида иқтисодий-сиёсий, маънавий, маърифий, бунёдкорлик соҳасида асрларга татигулик ислоҳотлар амалга оширилганига бугун барчамиз гувоҳмиз.
Айниқса, маданий-маънавий соҳадаги эзгу саъй-ҳаракатлар халқимизнинг дунёқараши ўзгаришида, ўзлигини англашида ёрқин ифода касб этди. Муҳтарам Президентимиз томонидан истиқлолнинг дастлабки йилларидан маънавиятдек буюк қадриятнинг енгилмас куч сифатида илгари сурилгани бугун замонавий фикрлайдиган, дунёқараши кенг ва миллий истиқлол ғоялари руҳида камолга етаётган авлодлар тимсолида янада яққол намоён бўлмоқда. Фикрга қарши фикр, ғояга қарши ғоя, жаҳолатга қарши фақатгина маърифат билан курашиш бугун барчамизнинг қон-қонимизга сингиб, ҳаётимиз мазмунига айланди.
Собиқ Иттифоқ даврида топталган шаънимиз, ҳуқуқларимиз ва ғуруримиз, миллий-маданий меросимиз истиқлол боис қайта тикланди, ўз қаддини баланд тутди. Бутун дунё илмига асос солган улуғ алломаларимиз қолдирган бой маънавий мерос чуқур ўрганила бошланди. Мустақиллик халқимизга, том маънода, маънавий тикланиш, руҳан покланишдек муқаддас туйғуларни туҳфа этди.
Муҳтарам Президентимиз раҳнамолигида демократик ҳуқуқий жамият, озод ва обод Ватан барпо этиш йўлидан дадил одимлаб бораётган мустақил Ўзбекистонимиз жаҳон майдонида мустаҳкам ўрин эгаллади.
Зеро, инсон манфаатлари қадрланган, улуғ аждодлардан мерос бўлиб келаётган азалий қадрият ва анъаналар тикланган ва эъзозланган, замонавий илм даргоҳларида таълим олаётган авлодлар ота-боболарига мос бўлиб камолга етаётган бундай юрт дунёда камдан кам топилади.
Мустақиллик — бу муқаддас сўз замирида аждодлар орзуси, қувончу қайғуси, қонли урушлар нидосию, халқимизнинг беғубор қалби мужассам. Бугунги замон шукронаси билан яшаш, бундай бетакрор кунларнинг қадрига етиш, асраб-авайлаш, тинчлик деган буюк туйғуни эъзозлаш келажак авлоднинг муқаддас вазифасидир.
Муҳтарам Президентимизнинг "Биз ўтган даврда амалга оширган ишларимизга баҳо берар эканмиз, "Кеча ким эдигу бугун ким бўлдик?" деган савол асосида уларнинг моҳияти ва аҳамиятини ўзимизга чуқур тасаввур этамиз. Айни вақтда "Эртага ким бўлишимиз, қандай янги марраларни эгаллашимиз керак?" деган савол устида ўйлашимиз, нафақат ўйлашимиз, балки амалий ишларимиз билан бунга жавоб беришимиз лозим", деган сўзлари ҳар биримизни мен мустақилликка нима бердим, деган савол устида бош қотиришга, изланиш ва интилишга ундайди.
Эътироф этиш керакки, мамлакатимиз иқтисодиётини юксалтиришда вилоятимизда фаолият кўрсатаётган саноат корхоналари ўзининг муносиб ҳиссасини қўшиб келаяпти. Энг муҳими, истиқлол йилларида уларнинг ишлаб чиқариш қуввати ошиб, жаҳон бозорида тутган ўрни янада юксалди. Йирик корхоналарда амалга оширилаётган лойиҳалар натижасида янги иш ўринлари яратилиб, минглаб аҳолининг бандлиги таъминланмоқда. Айниқса, муҳтарам Юртбошимиз раҳнамолигида саноат корхоналари қувватини ошириш, мавжудларини модернизация қилиш йўналишида қабул қилинаётган муҳим фармон ва қарорлар ушбу тармоқнинг муттасил ривожланишида янги босқични бошлаб берди.
Бугунги кунда вилоятимизнинг йирик саноат корхонаси — Навоий кон-металлургия комбинати нафақат мамлакатимизда, балки дунёда олтин, уран, фосфорит сингари ноёб маҳсулот ва хомашёлар ишлаб чиқаришда етакчилардан бири ҳисобланади.
Давлатимиз раҳбарининг алоҳида эътиборлари ва раҳнамоликлари остида мустақиллик йилларида комбинатда ишлаб чиқариш ҳажми қарийб 2 баробарга ошди. Энг замонавий ноёб техника ва технологиялар ўзлаштирилиб, 1995 йилда Учқудуқ туманида 3-гидрометаллургия заводи, 2010 йилда Қўшработ туманида 4-гидрометаллургия заводининг ишга туширилиши комбинатнинг дунёда етакчи олтин ишлаб чиқарувчи гигант корхоналар сафидан мустаҳкам ўрин олишига замин яратди. Шунингдек, "Гужумсой", "Аристантау" олтин конлари, "Суграли", "Истиқлол", "Шимолий Конимех", "Қўҳнур", "Мойлисой" уран конларининг фойдаланишга топширилиши эса ишлаб чиқариш салмоғини янада юксалтирди.
Шунингдек, комбинатда Германиянинг "Доберсек" компанияси билан ҳамкорликда қиймати 59,9 миллион доллар бўлган "Фосфорит хом-ашёсини бойитиш бўйича мавжуд ишлаб чиқаришни кенгайтириш" лойиҳаси амалга оширилиши натижасида йилига 716 минг тонна 26 фоизли фосфорит концентратини ишлаб чиқариш самарали йўлга қўйилди.
Қизилқум фосфорит комплексида ишлаб чиқарилаётган турли фосфорит концентратлари "Самарқандкимё", "Қўқон суперфосфат заводи", Олмалиқ шаҳридаги "Аммофос" ҳамда вилоятимиздаги "Электрокимёзаводи" сингари корхоналарни маҳаллий хомашё билан таъминлаш имконини бераяпти.
Айни пайтда Навоий кон-металлургия комбинатида лойиҳа қиймати 963,8 миллион долларга тенг бўлган 20 та лойиҳа амалга оширилаётгани ҳам унинг истиқболи янада порлоқ эканлигини тасдиқлайди.
Шунингдек, ҳудудимиздаги яна бир йирик корхона — "Навоийазот" АЖ негизида лойиҳа қиймати 1,7 миллиард доллар бўлган 3 та инвестиция лойиҳалари устида амалий иш олиб борилмоқда.
Жумладан, лойиҳа қиймати 500,1 миллион АҚШ долларга тенг бўлган, йилига 100 минг тонна поливинилхлорид, 71,8 минг тонна каустик сода ва 300 минг тонна метанол ишлаб чиқариш қувватига эга "Поливинилхлорид (ПВХ), каустик сода ва метанол ишлаб чиқариш комплексини қуриш" лойиҳаси, қиймати 985,7 миллион АҚШ доллар бўлган, йиллик қуввати 660 минг тонна аммиак, 577,5 минг тонна карбамид ишлаб чиқаришга ихтисослашган "Аммиак ва карбамид ишлаб чиқариш комплексини қуриш" лойиҳаси, шунингдек, лойиҳа қиймати 216,7 миллион АҚШ доллар бўлган, йиллик қуввати 500 минг тонна азот кислотаси ишлаб чиқаришга мўлжалланган "Азот кислотаси ишлаб чиқаришни ташкил этиш" лойиҳаларининг амалга оширилиши белгилангани истиқболда янги иш ўринлари яратиш, ишлаб чиқариш салмоғини ошириш билан бир қаторда, вилоятимиз саноатини янада ривожлантиришда муҳим аҳамият касб этади.
Улкан энергия манбаи сифатида фаолият кўрсатаётган "Навоий иссиқлик электр станцияси" АЖнинг ҳам иқтисодиётдаги ўрни ва аҳамияти беқиёс. Олдин умумий қуввати 1250 МВт бўлган корхонада модернизация ишлари амалга оширилиши натижасида айни пайтда унинг қуввати 1618 МВт ташкил этаяпти. Дунёдаги энг илғор технология асосида буғ турбиналар янгиланиши боис, сўнгги 2 йил давомида 700 млн. кубометрдан ортиқ табиий газ ёқилғиси иқтисод қилинди.
Бундан ташқари, корхонада лойиҳа қиймати 547,2 миллион долларлик қуввати 450 МВт бўлган иккинчи буғ-газ қурилмасини қуриш бўйича ишлар жадаллик билан олиб борилмоқда. Шунингдек, келгусида яна бир 450 МВт қувватга эга учинчи буғ-газ қурилмасини ишга тушириш борасида ҳам амалий ишлар бошлаб юборилди. Мазкур қувватларни ишга туширилиши эвазига станция нафақат Навоий, балки Самарқанд ва Бухоро вилоятлари истеъмолчиларини ҳам энергия билан таъминлаш имкониятига эга бўлади.
Вилоят саноати таркибида ишлаб чиқариш ҳажми бўйича қурилиш материаллари соҳаси иккинчи ўринни эгаллайди. Унинг асосини "Қизилқумцемент" АЖ корхонаси ташкил этиб, корхона томонидан йилига 3,4 миллион тоннадан ортиқ цемент ишлаб чиқарилмоқда.
Мустақиллик йилларида мазкур корхонада оловга чидамли материаллар, шифер, цемент қадоқлаш учун махсус полипропилен ва полиэтилен қоплари, оҳак, турли бетон плиталари ҳамда деворбоп блоклар билан бир қаторда, клинкернинг меъёрлаштирилган таркиби асосида ПЦ-400 Д0-Н, ПЦ-500 Д0-Н маркали цемент ишлаб чиқариш ҳам самарали йўлга қўйилди. Шу билан бирга, корхона томонидан 7-замонавий цемент тегирмони фойдаланишга топширилиб, қўшимча 350 минг тонна цемент ишлаб чиқариш қувватлари яратилди.
Давлатимиз раҳбарининг 2008 йил 2 декабрдаги "Навоий вилоятида эркин индустриал-иқтисодий зона ташкил этиш тўғрисида"ги Фармонига асосан, Кармана тумани ҳудудида Ўзбекистонда биринчи — "Навоий" эркин индустриал-иқтисодий зонаси ташкил этилди.
"Навоий" эркин индустриал-иқтисодий зонаси фаолиятини йўлга қўйишдан кўзланган асосий мақсад жаҳон стандартларига жавоб берадиган ва дунё бозорларида талаб қилинадиган маҳсулот ишлаб чиқариш, замонавий, юқори технологияли ишлаб чиқаришларни ташкил этиш учун хорижий инвестицияларни, биринчи галда тўғридан-тўғри инвестицияларни жалб этишга қаратилган.
Бугунги кунда ушбу ҳудудда 19 та корхона фаолияти самарали йўлга қўйилган бўлиб, улар томонидан 100 турдан ортиқ харидорбоп маҳсулотлар ишлаб чиқарилмоқда.
Бундан ташқари, 2015-2016 йилларда иқтисодий зонада яна 5 та лойиҳани амалга татбиқ этиш бўйича тизимли ишлар олиб борилаяпти.
Айниқса, "Навоий" халқаро аэропортини янада ривожлантириш ҳисобига, Европа ва Осиё давлатлари ўртасидаги йўналишларда катта ҳажмдаги юклар ва йўловчи транзит рейслари қабул қилиш имконини берадиган Марказий Осиё ҳудудидаги ягона халқаро логистика маркази ташкил этилгани "Навоий" эркин индустриал-иқтисодий зонасининг ривожида муҳим ўрин тутмоқда.
"Навоий" халқаро аэропорти орқали юклар ташиш Германия, Италия, Испания, Франция, Швейцария, Белгия, Австрия, Россия, Хитой, Жанубий Корея, Бангладеш, Ҳиндистон, БАА, Туркия, Вьетнам, Қирғизистон ва бошқа давлатлар билан амалга оширилаётгани нафақат вилоятимизнинг, балки республикамизнинг саноат салоҳиятини, ишлаб чиқариш, транспорт-транзит ва ижтимоий инфратузилмасини ривожлантиришда, қўшимча минглаб ишчи ўринларини яратиш, пировардида, халқ фаровонлигини юксалтиришда муҳим омил бўлаётгани "Кеча ким эдигу бугун ким бўлдик?", деган ҳақли саволга жавоб бўлади, албатта.
Мамлакатимизда темир йўл соҳасида ҳам улкан қурилиш-бунёдкорлик ишларига қўл урилаётгани, замонавий тезюрар поездлар қатнови йўлга қўйилиши, аҳолининг манзилига тез ва хотиржам етиб боришида алоҳида ўринга эга бўлди.
Муҳтарам Президентимизнинг қарорларига асосан мустақиллигимизнинг йигирма беш йиллиги арафасида "Самарқанд-Бухоро" йўналишида, шунингдек, келгуси йилда ҳудудимизни Хоразм вилояти билан боғловчи "Навоий-Конимех-Мискин" йўналиши бўйича ҳаракатланувчи тезюрар поезд қатновининг йўлга қўйилиши мамлакатимизда темир йўл қурилиши соҳадаги ислоҳотларнинг салмоғи юксалиб бораётганини кўрсатади.
Олдинлари бундай имконият ва шароит қаерда эди? Албатта, бу Юртбошимизнинг халқимиз турмуш фаровонлиги йўлидаги ташаббуслари самарасидир.
Мамлакатимизда йўл қурилиши соҳасида амалга оширилаётган изчил ислоҳотларнинг самараси ҳам ҳар қадамда намоён. Бу эзгу ишлар вилоятимизни ҳам четлаб ўтаётгани йўқ. Йўлсозларимиз томонидан ушбу тармоқда олиб борилаётган хайрли ишлар халқимиз турмуш фаровонлиги яхшиланишида муҳим омил бўлаётир.
Вилоятимизнинг йўл инфратузилмасини ривожлантириш мақсадида 2008-2015 йилларда халқаро ва давлат аҳамиятидаги 43,5 километр йўл қайта қурилди ҳамда 313,9 километр йўл мукаммал таъмирланди. Шунингдек, 2010 йилдан буён 26 миллиард 712 миллион сўм маблағ эвазига 488,7 километр ички йўлларда ҳам таъмирлаш ишлари олиб борилди. Бундан ташқари, хўжаликлараро ички автомобил йўлларида, шаҳарлар, қишлоқ аҳоли пунктлари, туман марказлари ва шаҳар посёлкаларида 2015-2019 йилларда маҳаллий бюджетдан қарийб 30,5 миллиард сўм маблағ сарфланиши ҳисобига 227,4 километрички йўлларни капитал ва жорий таъмирлаш кўзда тутилган. Бу эзгу ишлар ҳамиша бардавомдир. Мустақиллик бизга бахтли манзиллар сари ана шундай равон йўллардан юриш имкониятини туҳфа этди.
Бугун мамлакатимизда кичик бизнес ва хусусий тадбиркорликка қаратилаётган эътибор, ушбу соҳанинг ялпи ички маҳсулотдаги улушини тобора юксалиб боришига замин яратаяпти. Биргина вилоятимизда 2000 йилларда кичик бизнеснинг ялпи маҳсулотдаги улуши 21,5 фоизни ташкил этган бўлса, бу кўрсаткич 2015 йилга келиб қарийб 2 баробарга ошди.
Шуни алоҳида қайд этиш керакки, "янги бизнесни қўллаб-қувватлаш" деб аталадиган мезон бўйича мамлакатимиз айни пайтда жаҳонда 42-ўринни эгаллаб келаётгани ҳам мустақил юртимизда кичик бизнес ва хусусий тадбиркорликка кенг ўрин берилганлигидан далолатдир. Айниқса, вилоятимиздаги "Bagil Medikal New Technology" МЧЖ ҚК томонидан йиллик қуввати 16 миллион дона бир марталик шприц тайёрлаш лойиҳаси амалга оширилган бўлса, "Heating Radiators" МЧЖ негизида эса йилига қарийб 540 минг дона иситиш радиаторлари ишлаб чиқарилмоқда. Шунингдек, "Кармана гипс маҳсулотлари" МЧЖ томонидан йиллик қуввати 4,0 млн.м2 гипсокартон, 20 минг тонна гипс маҳсулоти ишлаб чиқариш йўлга қўйилгани, бундан ташқари, "Бахт текстил" қўшма корхонасида ҳар йили 9000 тонна, "Навбаҳор текстил" чет эл корхонасида эса 6300 тонна калава ип ишлаб чиқариш имкониятлари яратилгани ва яна юзлаб янги турдаги маҳсулот ишлаб чиқараётган тадбиркорлик субъектлари самарали фаолият кўрсатаётгани кичик бизнес иқтисодиётнинг мустаҳкам таянчига айланганидан далолат беради.
Бугун юртимизнинг қай бир гўшасига борманг, бунёдкор халқимиз томонидан қад ростлаётган муҳташам бинолар, кўркам иншоотларни кўриб ҳайратингиз янада ортади. Одамлар юз-кўзидаги қувончдан, мамнунликдан мустақилликка такрор ва такрор тасанно айтасиз.
Айниқса, муҳтарам Президентимиз раҳнамолигида 2009 йилдан буён қишлоқ жойларда бунёд этилаётган намунавий лойиҳа асосидаги турар жой бинолари кўркам манзара касб этиш билан бир қаторда, бугун қишлоқ аҳлининг шаҳардан кам бўлмаган шароитда ҳаёт кечиришини таъминлаётгани, халқимиз турмуш фаровонлиги юксалганининг асосий омили бўлмоқда.
Ҳамиша гўзал ва навқирон вилоятимизда ўтган давр ичида 58 та массивда худди шундай уйлардан 3482 тасининг бунёд этилгани ҳам мамлакатимизда узоқни кўзлаб олиб борилаётган одилона сиёсатнинг амалий ифодасидир.
Эътиборлиси, жорий йилда намунавий лойиҳалар асосида 800 та уй-жой қуриш бўйича ишлар жадаллик билан олиб борилаётган бўлса, келгуси йилда яна 924 та худди шундай уй-жойлар қурилиши мўлжалланмоқда.
Бундан ташқари, вилоятимиздаги 6 та "Камолот" уйида 280 нафар ёш оила фаровон ҳаёт кечираётгани ёшларни қўллаб-қувватлаш баробарида, бунёдкорлик соҳасидаги ишларимизнинг нақадар салмоғи баланд эканлигини кўрсатади.
Айниқса, мамлакатимизда мустақиллик йилларида ижтимоий соҳада олиб борилган улкан ислоҳотлар бугун халқимиз турмуш фаровонлигида, юрт равнақида ўзининг акс-садосини бераяпти.
Вилоятда сўнгги ўн йилда юксак архитектура намуналари асосида 350 тага яқин ижтимоий соҳа объекти, хусусан 140 та мактаб реконструкция қилиниб, 16 та мактаб, 61 та болалар спорти объектлари, 12 та мусиқа ва санъат мактаби янгидан қурилгани ҳамда 40 дан ортиқ кўп қаватли аҳоли турар жой биноларининг қад ростлагани халқимиз бунёдкорлигининг, яратувчанлигининг ҳаётий исботи, албатта. Бундан ташқари, қарийб 60 миллиард сўм маблағ эвазига умумий майдони 19 гектарни ташкил этадиган Марказий Осиёда ягона — Навоий давлат кончилик институтининг 2000 ўринли янги биносининг қурилиб, истиқлол байрами арафасида фойдаланишга топширилаётгани давлатимиз томонидан ёш авлод таълим-тарбиясига қаратилаётган юксак эътиборнинг амалий ифодаси бўлди.
Мустақиллигимизнинг дастлабки йиллариданоқ ҳаётга татбиқ этилган "Таълим тўғрисида"ги Қонун, Кадрлар тайёрлаш миллий дастури мамлакатимизда таълим-тарбия масаласи устувор аҳамият касб этганлигидан далолатдир. Айниқса, 9+3 йўналишидаги бепул 12 йиллик мажбурий таълим тизимининг жорий этилгани, келажагимиз эгаларининг замонавий илм даргоҳларида жаҳон стандартларига мос билим олиши баробарида, касб-ҳунар эгаллаётгани бугун бутун дунёнинг эътирофига сазовор бўлмоқда. Мустақиллик йилларида вилоятимизда замонавий кўриниш касб этиб, янгидан қад ростлаган 47 та касб-ҳунар коллежи ҳамда 4 та академик лицейни ҳар йили 14 минг нафардан ортиқ ёшларимиз битириб, ҳаётда муносиб ўринларини топаётганлиги бу борадаги изчил ислоҳотларнинг ҳаётий самарасидир.
Шуниси қувонарлики, биргина вилоятимизда охирги ўн йил мобайнида 79 та соғлиқни сақлаш муассасасида қурилиш-таъмирлаш ишлари бажарилган бўлса, 12 та тиббиёт муассасаси янгидан ташкил этилди.
Алоҳида таъкидлаш керакки, муҳтарам Президентимиз томонидан истиқлолнинг дастлабки давриданоқ аҳолининг саломатлигини мустаҳкамлаш, соғлом жамиятни шакллантириш йўналишида изчил ислоҳотлар амалга оширилди. Ушбу тармоқни ривожлантириш йўлида муҳим дастурлар қабул қилинди. Айниқса, аҳолига бирламчи тиббий ёрдам кўрсатиш, улар ўртасида тиббий патронажни кучайтириш, энг чекка қишлоқларгача замонавий тиббий хизматни йўлга қўйиш мақсадида қишлоқ врачлик пунктлари ташкил этилди. Бугун энг сўнгги тиббий жиҳозлар билан таъминланган мазкур шифо масканлари эл саломатлиги йўлида самарали хизмат кўрсатиб келмоқда. Мустақиллик даврида биргина вилоятимизда 148 та худди шундай қишлоқ врачлик пунктларининг янгидан бунёд этилгани эса халқимиз саломатлигини мустаҳкамлашда муҳим омил бўлаётир.
Бундан ташқари, яқин йилларда Навоий шаҳрида вилоят кўп тармоқли тиббиёт, ОИТСга қарши курашиш, болалар кўп тармоқли тиббиёт марказлари, қон қуйиш станцияси, вилоят онкология диспансери, 4-сонли оилавий поликлиника, наркология диспансери, болалар сил касаллигига қарши курашиш санаторийси ва Навбаҳор, Томди, Нурота, Конимех туманлари тиббиёт бирлашмалари тўлиқ янгидан қурилган бўлса, Кармана, Хатирчи ва Қизилтепа туман тиббиёт бирлашмаларида реконструкция ишлари жадаллик билан давом эттирилмоқда. Шунингдек, Навоий шаҳар тиббиёт бирлашмасини янгидан қуриш ишлари бошлаб юборилганлиги ҳам соҳада амалга оширилаётган ислоҳотларнинг ҳаётий ифодаси бўлаётир.
Бунёдкор халқимиз томонидан, замонавий кўриниш касб этиб қад ростлаётган бундай бинолар ва иншоотлар буюк соҳибқирон Амир Темур бобомизнинг "Бизнинг куч-қудратимизга шак-шубҳангиз бўлса, биз қурдирган иморатларга боқинг", деган сўзларининг ҳаётий исботидир.
Олдинлари аҳолининг саломатлигини тиклаш учун етарлича жиҳозланмаган, шарт-шароитлари бугунги кун талабига жавоб бермайдиган амбулаториялар фаолият кўрсатгани ҳеч биримизга сир эмас. Айни дамда жаҳон стандартларига мос жиҳозланган, замонавий қишлоқ врачлик пунктлари, кўп тармоқли поликлиникалар, шошилинч тез тиббий ёрдам бўлимларида энг ривожланган мамлакатларда тажриба орттириб келаётган шифокорлар беморлар дардига дармон бўлмоқда.
Мамлакатимизда мустақиллик йилларида фарзандларимиз саломатлиги йўлида олиб борилаётган изчил ислоҳотларни ҳеч нарса билан баҳолаб бўлмайди, албатта. Бу борадаги беқиёс ишлар соғлом жамият, баркамол авлодлар камолида асосий ўрин тутмоқда. Барча касалликларга ташхис қўйиш технологияси, энг мураккаб жарроҳлик муолажаларининг юртимизда амалга ошириш имконияти кенгайгани биз, тиббиёт илмининг асосчиси Абу Али ибн Сино зурриёдлари эканлигимиздан далолатдир. Аҳоли саломатлигини яхшилаш, соғлом она ва соғлом бола тамойили давлатимиз сиёсатининг устувор йўналишларидан бирига айланди. Бу эзгу ишлардан мақсад битта — у ҳам бўлса, эл саломатлигини мустаҳкамлаш.
Вилоятимиз ёшлари бўйининг сўнгги ўн йил ичида ўртача 2,4 сантиметрга ўсгани, вазни эса 3,1 килограммга ошгани мамлакатимизда ҳам маънан, ҳам жисмонан баркамол авлодлар камолга етаётганини тасдиқлайди.
Мустақилликдан аввал болаларимизнинг лой кўчалар узра пастқам ва кўримсизгина бўлган бинода жойлашган, томидан ёмғир томчилаган мактабларга оғриниб йўл олишгани, уст-боши бир ҳолатда уйига қайтгани кекса авлод вакилларининг ёдидан ҳеч қачон чиқмаса керак.
Бугун-чи?! Бугун болаларимиз равон ва обод йўллардан замонавий, жаҳон стандартларига мос жиҳозланган таълим муассасалари томон ошиқар экан, улар қалбида аждодларга хос шижоат, мардлик, катта-катта орзулар, шу юрт ва Ватан учун муносиб авлод бўлиш иштиёқи ёнаётганини юракдан ҳис этиб турамиз. Шундай кунларга етказганига шукурлар айтамиз.
Ҳеч нарса мамлакатни дунёга спортчалик танита олмайди. Бу эзгу ғоя остида юртимизда спорт соҳасини ривожлантириш йўналишида олиб борилаётган ишларнинг беқиёслиги бунёд этилаётган спорт мажмуалари, уларда мунтазам шуғулланаётган ёшларимиз эришаётган ютуқларда янада яққол намоён. Айниқса, сўнгги йилларда Навоий шаҳрида қад ростлаган 10 минг ўринга мўлжалланган "Ёшлар" спорт мажмуаси, Навбаҳор туманидаги ёпиқ сузиш ҳавзаси, Қизилтепа, Нурота ва Навбаҳор туманлари марказларидаги муҳташам стадионлар, замонавий гимнастика заллари ҳамда кўплаб бошқа спорт иншоотлари ёшларимиз қўлга киритаётган муваффақиятларга қанот бўлмоқда.
Натижада келажагимиз эгалари спортнинг кўплаб турлари бўйича халқаро мусобақаларда, олимпиадаларда муваффақиятли иштирок этиб, юртимиз байроғини баланд кўтармоқдалар. Ер юзида Ўзбекистон, деган мустақил юрт фарзандлари ҳеч кимдан кам эмаслигини намоён этмоқдалар.
Жумладан, кейинги тўрт йилликнинг нуфузли спорт мусобақаларидан бўлган XXXI ёзги Олимпиада ва XV Паралимпия ўйинларига вилоятимиз спортчилари томонидан пухта ҳозирлик кўрилди. Жорий йилнинг август-сентябрь ойларида Бразилиянинг Рио-де-Жанейро шаҳрида бўлиб ўтадиган Олимпиада ўйинларига вилоятимизнинг умидли спортчиларидан Ихтиёр Наврўзов ва Аббос Раҳмоновлар спортнинг эркин кураш тури бўйича, Зарина Қурбонова бадиий гимнастика, диск ва ядро улоқтириш йўналишида эса Ҳусниддин Норбеков Паралимпияда иштирок этиш йўлланмасини қўлга киритгани ҳамда бундай иқтидорли спортчиларимиз сафининг тобора кенгайиб бораётгани бизни ҳамиша руҳлантириб келади.
Кечаги кун билан бугунни таққослаб бўлмайди, албатта. Мустақиллик йилларида улкан ишларга қодир, дунёқараши кенг, илм-маърифатга ошно, замонавий фикрлайдиган янги авлод шаклланди ва турли соҳаларда дунёни лол қолдириб, юртимиз байроғини юксакка кўтармоқда. Айни дамда ёш авлод қалбида Юртбошимиз таъкидлаганларидек, "Биз ҳеч кимдан кам эмасмиз, кам бўлмаймиз ҳам", деган эзгу ғоя жўш ураётир.
Бугун ҳар томонлама чиниққан, Амир Темур, Жалолиддин Мангуберди авлоди бўлган йигитларимиз Ватанимиз сарҳадларини мустаҳкам ҳимоя қилишда, мустақиллигимизни, тинчлигимизни асраб-авайлашда ҳам камарбаста бўлишмоқда. Тинчлик ва осойишталик барча ютуқларимизнинг гарови, фаровонлигимизнинг бош омили эканлигини юракдан ҳис этиб яшамоқдамиз.
Мустақиллик йилларида муҳтарам Президентимиз, Қуролли Кучлар Олий БошҚўмондони Ислом Абдуғаниевич Каримов раҳбарлигида мамлакатимиз мудофаа соҳасини чуқур ислоҳ қилиш, Ватанимиз хавфсизлиги ва барқарорлиги, унинг сарҳадлари дахлсизлигини таъминлаш борасида улкан ишлар амалга оширилди. Энг асосийси, ҳар қандай стратегик вазифаларни самарали ҳал этишга қодир бўлган профессионал, ихчам, тезкор ва жанговор миллий армиямиз шаклланди.
Юртбошимизнинг соҳани ислоҳ қилиш борасидаги қатор фармон ва қарорлари асосида Қуролли Кучларимизда олиб борилаётган ислоҳотларни такомиллаштириш йўналишида тизимли ишлар амалга оширилмоқда. Хусусан, Ўзбекистон Республикаси Қуролли Кучлари сафида муддатли ҳарбий хизматни ўтаб бўлган фуқаролар учун Республика Олий ўқув юртларига ўқишга киришда тест синовларида тўпланган энг кўп баллнинг 27 фоизи миқдорида қўшимча балл қўшилиши, муддатли ҳарбий хизматни ўтаб, тўлов контракт асосида ўқишга қабул қилинган иқтидорли талабаларга "Камолот" ёшлар ижтимоий ҳаракати томонидан шартнома суммасининг 35 фоизи тўлаб берилиши давлатимизнинг ҳарбий хизмат соҳасига ва албатта ёшларга қаратаётган юксак эътибори, мустақиллигимиз меваси эмасми?!
Бугун Қуролли Кучларимиз сафларида хизмат қилиш мард ва жасур йигитларимиз учун бурчга, шарафга, баркамоллик тимсолига айлангани, миллий армиямиз ёшларимиз учун жисмоний тобланиш, чиниқиш, маҳоратини ошириш ва юксак инсоний фазилатларни мужассам этадиган, улар қалбида садоқат, жасорат ва матонат туйғуларини мустаҳкамловчи чинакам ҳаёт мактабига айланганини дунё ҳамжамияти ҳам ҳавас билан эътироф этмоқда. Мустақиллик бизга куч ва қудратимизни кўрсатиш, улуғ аждодларга мос авлод эканлигимизни намоён этиш имкониятини берганлиги билан янада азиздир.
Мустақил юртимизда хотин-қизларни қўллаб-қувватлаш, эъзозлаш, уларга алоҳида эҳтиром кўрсатиш, жамиятдаги ўрнини янада юксалтириш борасидаги тизимли ишлар тимсолида азалдан шаклланган шарқона қадриятларимиз бугун янада фусункорлик касб этаяпти. Хотин-қизларимизга ҳеч бир даврда бугунгидек эътибор ва ғамхўрлик бўлмаган. Аёлларимиз бугун ҳамиша эъзозимизда, қолаверса, ижтимоий-сиёсий ҳаётда фаол, ташаббускор сифатида барча соҳаларда пешқадам.
Президентимиз раҳнамолигида Зулфия номидаги Давлат мукофотининг таъсис этилгани ҳам гўзаллик тимсоли, латофат маликаси бўлган қизларимизга кўрсатилган эътиборнинг яна бир ёрқин намунасидир. Адабиёт, фан, таълим, санъат, спорт йўналишларида фаол бўлган қизларимизнинг ушбу нишон билан тақдирланаётгани уларга давлатимизнинг юксак ишончи ва рағбати ифодасидир. Бугун биз шижоатдан кўзлари ёниб турган, қалбида Ватан ва юрт ишқи жўш урган, нигоҳлари олис манзилларни кўзлаган қизларимиз тимсолида ҳам кеча ким эдигу бугун ким бўлганимизни чуқур ҳис этамиз. Истиқлол бизга меҳнат рағбат топадиган, истеъдод қўллаб-қувватланадиган даврни бошлаб бергани билан ҳам янада қадрлидир, албатта.
Айни кунларда энг ривожланган давлатларда ҳам озиқ-овқат маҳсулотлари билан боғлиқ муаммолар юзага келаётган бир пайтда, вилоятимизда қишлоқ хўжалиги маҳсулотлари етиштириш ҳажми 2000 йилга нисбатан 2,6 баробарга ошгани биз танлаган йўл нақадар тўғри ҳамда истиқболли эканлигини тасдиқлайди. Бугун биз қишлоқ хўжалиги маҳсулотлари билан нафақат ўзимизни, балки жаҳон бозорларини ҳам таъминлаяпмиз. Бу юртимиздаги тинчлик, бозорларимиздаги тўкинлик, оилаларимиздаги фаровонлик, мамлакатимизда озиқ-овқат маҳсулотлари хавфсизлигини таъминлашга қаратилган мақсадли дастурларнинг амалий ифодасидир, аслида.
Биргина, вилоятимизнинг Нурота туманида минг гектардан ортиқ майдонда ташкил этилган интенсив боғлар ҳамда Навоий шаҳри ва Кармана тумани ҳудудидаги иссиқхоналарда етиштирилаётган қишлоқ хўжалиги маҳсулотларининг ўзимизда сақлаш ва қайта ишлаш имконияти яратилгани, хусусан, йиллик қуввати 10 минг тонна мева-сабзавот маҳсулотларини қайта ишлашга ихтисослашган "Сагдиана нон" корхонаси фаолиятининг йўлга қўйилгани ва ҳудудимизда бундай корхоналар сони тобора кенгайиб бораётгани бозорларимиз тўкинлиги, ризқимиз бутунлигининг мустаҳкам кафолати бўлмоқда.
Бугунги кунда мамлакатимизда пахта ва пилла хом ашёсидан тайёр маҳсулот етиштириш ҳам самарали йўлга қўйилди. 2008 йилда вилоятимизда 7,5 минг тонна пахта толасини қайта ишлаш қуввати мавжуд бўлса, мақсадли дастурлар доирасида амалга оширилган лойиҳалар ҳисобига, бугунги кунда толани қайта ишлаш қуввати 21,3 минг тоннага етди, вилоятда етиштирилаётган пахта толасининг қарийб 64,5 фоизи шу ернинг ўзида қайта ишланмоқда.
Қонли урушларни кўрган халқимиз қандай оғир кунларни бошидан кечирганига бугун тарих гувоҳ. Бир парча нон илинжида туну кун қилинган меҳнатлар, усти юпун, қорни оч ухлаб қолган болалар, турмуш ўртоғи, фарзандининг урушда ҳалок бўлганлиги тўғрисида қорахат олган оналар фарёди барчамизни бугунги дориломон кунларнинг қадрига етиб, минг бора шукрона қилишга чорлайди.
Бугун тобора чирой очиб бораётган, инсон манфаатлари улуғланган, тинчлик ҳукм сураётган гўзал ва бетакрор диёримизда халқимиз бахтли ва фаровон ҳаёт кечирмоқда.
Мустақилликдек буюк неъматдан баҳраманд юртимиз том маънода дунё сайёҳларининг нигоҳи қадалган, ҳайрати ошган заминга айланди, бугун. Узоқ тарихдан сўзловчи улуғ зиёратгоҳлар, қадамжолар буюк аждодларимиз кимлигидан садо берса, қад ростлаётган муҳташам бинолар, иншоотлар эса бугунги авлодимиз қандай буюк ишларга қодирлигини кўрсатмоқда.
Таъкидлаш жоизки, қишлоқ хўжалигининг ҳадисини олган деҳқонларимиз, кўркам бино бунёд этаётган бунёдкорларимиз, жаҳон ареналарини забт этган спортчиларимиз, ёш авлодга замонавий таълим-тарбия бераётган педагогларимиз, тинчлигимиз ва осойишталигимизни таъминловчи посбонларимиз, қўйингки, барча-барчамиз мамлакатимиз мустақиллигини мустаҳкамлашга муносиб ҳисса қўшиш — буюк бахт, энг олий саодат эканлигини юракдан ҳис этиб умргузаронлик қилмоқдамиз.
Муҳтарам Президентимиз таъбирлари билан айтганда: "Айнан шунинг ҳисобидан, ана шундай олижаноб, ўхшаши йўқ халқимиз борлиги учун Ўзбекистонимиз бугунги кунда жаҳондаги камдан-кам давлатлар қаторида юксак, барқарор суръатлар билан ўсиб, одамларнинг кундалик турмуши, ҳаёти ҳар томонлама обод ва фаровон бўлиб бормоқда. Бир сўз билан айтадиган бўлсак, биз барчани ҳайратда қолдирадиган марраларни қўлга киритмоқдамиз ва эртанги кунга катта ишонч билан яшамоқдамиз".
Айни кунларда давлатимиз раҳбарининг қарорларига асосан мамлакатимизда она-Ватанимизнинг шонли тарихидаги буюк ва ўчмас сана — мустақиллигимизнинг йигирма беш йиллик байрамига қизғин тайёргарлик ишлари олиб борилмоқда.
Бу йилги мустақиллигимиз тантаналарининг "Гўзал ва бетакроримсан, муқаддас Ватаним, жоним сенга фидо Ўзбекистоним!", деган бош ғоя остида ўтказилаётгани ҳар биримизни азиз ва мўътабар бўлган Истиқлолнинг қадрига етишга, мустақиллигимизни мустаҳкамлашга, уни кўз-қорачиғидек асраб-авайлашга даъват этади.
Аслида ҳам, юртимизга барқарорлик, халқимизга фаровонлик, ҳаётимизга тинчлик-осудалик, кўнглимизга хотиржамлик, кучимизга куч, қалбимизга шижоат бағишлаган Истиқлол барчамиз учун энг буюк ва муқаддас неъматдир.
Манбаа: dustlikbayrogi.uz