вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

"Халқлар дўстлиги тароналари"

18.05.2016 12:11:17

Ўтган дам олиш кунлари "Фарҳод" маданият саройида Қозоқ миллий-маданий маркази ва унинг вилоят бўлими томонидан ташкил этилган гала-концерт ана шундай номланди.

Ушбу концерт "Биз — бир халқмиз" дўстлик фестивалининг асосий қисми ҳисобланади. Унинг муқаддимаси — дастлабки куни Тошкент шаҳридаги "Туркистон" саройида бўлиб ўтди. Иккинчи куни эса меҳмонлар — қўшни Қозоғистон РеспубликасиҚизилўрда вилоят филармонияси жамоаси вилоятимиз марказига ташриф буюришди. Юртимиз истиқлолининг 25 йиллигига, буюк ўзбек мутафаккири Мир Алишер Навоий таваллудининг 575, қозоқ оқини Жамбул Жабаев таваллудининг 170 йиллигига бағишланган ушбу тадбир, шунингдек, Жиззах ва Тошкент вилоятларида ҳам бўлиб ўтиши режалаштирилган.

Қозоқ халқ қўшиқлари ва рақсларидан баҳраманд бўлиш ниятида Учқудуқ, Томди, Конимех туманлари ҳамда Зарафшон, Зафаробод шаҳарлари аҳолиси вакиллари Навоий шаҳрида меҳмон бўлишди.

— Бугун биз ўзбек ва қозоқ халқлари ўртасидаги дўстлик алоқаларини янада мустаҳкамлаш ниятида Навоийдек гўзал, навқирон шаҳарда тўпландик, — деди Қозоқ миллий-маданий маркази раиси Ҳамза Холмуратов ўз табригида. — Бизнинг халқларимизни кўп асрлик сиёсий, ижтимоий, маданий алоқалар мустаҳкам боғлаб турибди. Осойишталик, фаровонлик ва маданий ҳамкорлик ҳукмрон қадрдон Ўзбекистон — барчамизнинг умумий уйимиз.

Қозоғистон Республикасида хизмат кўрсатган артист Кулан Калимбетов бастакор Роза Алқожаннинг "Сирдарё" қўшиғини, "Тўмарис" гуруҳи эса қозоқ халқ рақсларини ижро этишди. Қизилўрда вилоят филармонияси артистларининг чиқишлари ҳам халқларимиз ўртасидаги дўстлик ва ҳамкорликни тараннум этди. Айниқса, Магимбет Сугирбойнинг дўмбира халқ мусиқий асбобида ижро этган чиқишлари мухлислар олқишига сазовор бўлди. Ижодий гуруҳ аъзолари Нурота туманидаги "Чашма" тарихий-меъморий ёдгорлигида ҳам бўлишди.

Фестиваль юртимиз бўйлаб давом этмоқда.

Фарруҳ НОРҚУЛОВ.