вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

"Жаноб Амадей" Навоийда

06.12.2016 12:48:54

25-26 ноябрь кунлари рус академик драма театри жамоаси "Олтин куз" санъат фестивали доирасида юртимизда меҳмон бўлди. Шаҳримиздаги кўркам "Фарҳод" маданият саройида мазкур театр жамоасининг "Жаноб Амадей" пьесаси асосида режиссёр, Ўзбекистонда хизмат кўрсатган артист Михаил Каминский томонидан саҳналаштирилган "Қонунда профессор" спектакли намойиш қилинди. Французлар ҳаётига мансуб, комедия жанридаги спектаклни навоийликлар қизғин кутиб олишди.

Воқеалар Франциянинг кичик шаҳрида истиқомат қилувчи камтарин профессор Амадей Руссо хонадонида бўлиб ўтади. Умрини илм-фанга бағишлаган бу инсон кўча-кўйда саёқ юрувчи, безори, тарбиясиз қиз Катяни уйига олиб келиб, унга ҳар тарафдан ёрдам беришни инсонийлик бурчи, деб билади. Аммо қиз бу уйга келиши билан профессорнинг боши ташвишдан чиқмай қолади. Воқеалар ривожи давомида у жиноятчиларга қарши мардонавор курашади. Эзгулик, адолат ғалабаси учун жонини ҳам беришга тайёр бўлади. Амадейдаги бу фазилатларни кўрган Катя аста-секин яхши томонга ўзгаради. У профессорга кўнгил қўяди. Амадей ҳам Катядан меҳр-муҳаббатини аямайди. Спектаклдаги асосий ғоя, қийинчилик билан бўлса-да, яхшиликнинг тантана қилиши томошабинларни бефарқ қолдирмайди.

Актёр ва актрисалар, Юрий Антипин, Василика Сидорова, Андрей Заровский, Обиджон Исмаилов, Валерия Скулкова, Константин Пирожковларнинг истеъдоди улар яратган образлар жонли чиқишига ҳисса қўшган.

— Бизни бунчалик кутиб олишади деб ўйламагандик, — дейди биз билан суҳбатда Катя ролини маромига етказиб ижро этган актриса Екатерина Белова. — Зарафшон шаҳрида бўлдик. Ёш томошабинларнинг эътибори, олқишларидан бошимиз осмонга етди. Умуман, вилоят аҳлининг санъатга меҳри баландлигига амин бўлдик. Бу бизни хурсанд қилди. Ўзбекистонга яна янги спектакллар билан келиш режамизда бор.

Зулфия БОБОЕВА.

Сурат муаллифи Эльвина МУСТАФИНА.