вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Тижоратга бўлган қизиқишим ортди

11.09.2017 16:27:51

Коллежни томомлагач, бирор ишнинг бошини тутолмай юрган кезларим тадбиркорлик билан шуғулланиш тўғрисида ўйланиб қолдим ва маслаҳат сўраб, Ўзбекистон Республикаси Савдо-саноат палатасининг вилоят ҳудудий бошқармасига бордим. У ерда мени очиқ чеҳра билан кутиб олишди.

Бирор саволим жавобсиз қолмади. Тижоратга бўлган қизиқишим ортди. Уларнинг кўмагида банкдан имтиёзли кредит олиб, фаолиятимни ҳовлимизда фойдаланилмаётган тандир ва кичик хонани қайта таъмирлаб, фойдаланишдан бошладим.

Ишларим ривожлангани сайин бизнесимни янада кенгайтиришга интилдим. Савдо-саноат палатасининг эшигини яна бир бор қоқдим. Улар беминнат юридик маслаҳат бердилар. Қолипли нон ва нон маҳсулотлари ишлаб чиқаришни йўлга қўйдим. Технология масаласида ҳам зарур кўмакни берди. Шу сабаб, бизнесим ривожланди, кенгайди. Шаҳарнинг кўзга кўринган новвойлари қаторига қўшилдим. Палата билан узвий ҳамкорликда ишлай бошладим, мажлисларида қатнашдим. Ҳозирги кунда оилавий корхонамизда 8 нафар ишчи меҳнат қилмоқда.

"Ташаббус — 2016" кўрик-танловининг вилоят босқичида совринли ўринни эгалладим. Бундан ташқари, жорий йилда "Ватан тараққиётида менинг ҳиссам" шиори остида ўтказилган ёшлар фестивалида иштирок этиб, ишбилармон йигит-қизлар билан ўзаро тажриба алмашдим. Бугунги кунда тенгқурларим ҳавас қилгулик тадбиркорман.

Шу юртда, мана шу заминда туғилиб, яшаётганлигимдан фахрланаман. Азиз тенгдошлар, мамлакатимизнинг гуллаб-яшнашига ўз ҳиссангизни қўшинг, ўз бизнесингизни яратинг, тақдирингизни ўзингиз белгиланг, юксалинг ва тараққий этинг. Бунда сизга Савдо-саноат палатаси яқиндан кўмак беради.

Азизжон САИДОВ,

"Азизнур истиқлол" оилавий корхонаси раҳбари.

Манбаа: dustlikbayrogi.uz