вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Тинчлик — буюк неъмат

27.08.2015 15:31:37

Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита билан ҳамкорликда мустақиллигимизнинг 24 йиллиги арафасида жойларда маънавий-маърифий тадбирлар ўтказиб келинмоқда. Ана шундай тадбирлардан бири Навоий шаҳридаги "Ёшлар маркази"да бўлиб ўтди. "Тинчлик ва барқарорлик — буюк неъмат" мавзусидаги тадбирда қўмита мутахассиси Жаҳонгир Жўраев, вилоят ҳокими ўринбосари, хотин-қизлар қўмитаси раиси Анора Бобомуродова, шунингдек, туман ва шаҳар МФЙлари фаоллари, маслаҳатчилари ҳамда отинойи, ҳожи онахонлар иштирок этди.

Тадбирда дастлаб А. Бобомуродова тинчлик тенгсиз неъматлиги, унинг қадрига етиб, бугунги осуда, фаровон кунларимизга шукрона билан яшашлик лозимлиги хусусида ўз фикр-мулоҳазаларини билдириб ўтди. Шундан сўнг сўз олган Ж. Жўраев доимий тартибсизлик ҳукмрон бўлган Яқин Шарқдаги нотинч вазият ҳар биримизни огоҳликка чорлашини алоҳида таъкидлади.

— Турли ижтимоий тармоқлар орқали маънавияти саёз, ўз мустақил фикрига эга бўлмаган ёшларга таъсир ўтказилиб, виртуал жамоалар тузилмоқда, — дейди Жаҳонгир Жўраев. — Кейинчалик эса бундай ёшлар билан жангарилар сафи тўлдирилмоқда. Бу каби ҳолатларнинг олдини олишда ҳушёрликни кучайтириш зарур, деб биламан. Ота-оналар фарзанди интернетда қайси тармоқда, ким билан суҳбат қураяпти, унинг дўстлари ким, мақсади нима, ҳаммасини назорат қилиб бориши керак. Болаларимиз қанча кўп китоб мутолааси, илм ўрганиш билан банд бўлишса, шунча маънавий иммунитети кучли бўлади. Бепарволик фарзандлари келажагини аянчли томонга ўзгартириб юборган қанчадан-қанча оилалар бор. Шундай экан, огоҳликни қўлдан бермаслик лозим. Бу ўз ўрнида МФЙ раислари, маслаҳатчиларига ҳам залворли масъулият юклайди.

Диний маълумотларга эга бўлишда "uz" доменидаги "mumina.uz", "muslim.uz", "bukhari.uz" сингари сайтлардан фойдаланиш мақсадга мувофиқлиги айтилди. Тадбирда Кармана туманидаги "Қосим Шайх" жоме масжиди имом-хатиби Дилшод Эргашев тинчликни асраш ҳар бир фуқаронинг бурчи эканлиги хусусида тўхталди.

— Юртимиздаги дориламон кунларга ҳар қанча шукрона қилиб яшасак, арзийди, — дейди Хатирчи туманидаги "Парахун" МФЙ фаоли Муҳаббат Камолова. — Йигирма нафардан ортиқ набирам бор. Шукрки, хотиржам, ҳаловатдамиз. Буларнинг бари тинчлик шарофатидан. Ана шундай кунлар бардавом бўлиши учун ҳам бепарволикка берилмаслигимиз шарт.

Тадбир давомида сергакликка чорловчи видеолавҳалар намойиш этилди. Якунда қатнашчилар ўзларини қизиқтирган саволларга атрофлича жавоб олишди.

Зулфия БОБОЕВА,

Сурат муаллифи Сирож АСЛОНОВ.