вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
06.10.2016 18:40:00
Халқимизда ажойиб бир нақл бор. "Устоз отангдек улуғ". Дарҳақиқат, шундай. Падари бузрукворимиздан кам бўлмаган меҳр беришга қодир устоз ва мураббийларимиз ҳаётда ўз ўрнимизни топиш, жамиятнинг муҳим аъзосига айланишимиз, муҳими, малакали кадр, етук инсон бўлиб улғайишимизда бемисл ҳисса қўшадилар. Улар берган сабоқ ва ўгитлар йўлчи юлдуз сингари умримиз манзилларини ёритиб туради.
Ана шундай фидойи инсонлардан бири — Навоий шаҳридаги яккакураш спорт турларига ихтисослаштирилган БЎСМнинг енгил атлетика бўйича мураббийи Игорь Шишков Мустақиллигимизнинг 25 йиллигида ҳукуматимиз томонидан "Шуҳрат" медали билан тақдирланди. Яқинда эса у яна бир эътирофли мукофот, Рио-де-Жанейро шаҳрида бўлиб ўтган XV ёзги Паралимпия ўйинларида юқори натижаларга эришган спортчи ва мураббийлардан бир гуруҳини мукофотлаш тўғрисидаги Фармонга мувофиқ "Ўзбекистон Республикасида хизмат кўрсатган спорт устози" фахрий унвонига сазовор бўлди. Мураббий билан суҳбатлашарканмиз, Паралимпия ўйинларига пухта тайёргарлик кўрган спортчи Ҳусниддин Норбековнинг диск улоқтиришда жаҳон рекордини ўрнатиб, олтин медалга эга бўлгани ва ядро ирғитишда эса бронза медалини қўлга киритганини шогирдидан кўра кўпроқ ҳаяжон, хурсандчилик билан тилга олади.
— Ҳусниддиннинг техникаси, кучи, матонатига ишонардим, — дейди биз билан суҳбатда унинг мураббийи И. Шишков. — У билан етти йилдан буён биргамиз. Паралимпия ўйинларига тайёргарликнинг охирги уч ойи жуда қийин бўлганди. Лекин бир қадам ҳам ортга чекинмадик. Машғулотларни астойдил давом эттирдик. Ниҳоят, кутилган натижага эришдик. Тонг саҳар учда менга қўнғироқ қилишиб, шогирдим жаҳон рекордини ўрнатганини айтишди. Биласизми, қувончимдан йиғлаб юбордим. Ҳаяжондан, фарзандимдек бўлиб қолган йигитнинг ишончимни муносиб равишда оқлаганидан тонг отгунча кўзимга уйқу келмади. Паралимпиячиларимизнинг бундай муваффақиятида Ўзбекистон Республикасининг Биринчи Президенти Ислом Каримовнинг хизматлари беқиёс. Шаҳримиздаги биргина "Кимёгар" ўйингоҳида спортчиларимизнинг шуғулланиши учун барча шароитлар, спорт инвентарлари муҳайё этилган. Шунингдек, бизга яқиндан ёрдам бериб келаётган "Навоийазот" АЖга, шаҳар ва вилоят ҳокимлиги ҳамда бошқа ташкилот вакилларига ўз миннатдорчилигимни билдираман. Доимий қўллаб-қувватланиш, рағбат спортчиларни руҳлантиради. Келгусида яна шогирдларимиз билан юксак марраларни забт этишга интиламиз.
Бу эътирофга осонликча эришилгани йўқ. И. Шишковнинг қаттиққўл ва талабчанлиги, қатъияти, тартиб-интизомлилиги, маҳорати ва истеъдоди бугунги муваффақиятларининг асоси бўлди. Дастлаб Бухоро давлат педагогика институтининг жисмоний тарбия факультети, кейинчалик эса Москва жисмоний тарбия Академиясини тугатган енгил атлетика мураббийи иш фаолияти самарадорлигини Ҳ. Норбеков мисолида ҳам кўриш мумкин. Муҳими, И. Шишковдаги ғайрат, шижоат, мақсад сари дадил интилиш шунча йил ўтибдики, бир дам сусаймаган.
— Ҳукуматимиз томонидан иккита мукофот билан тақдирланганим мени бениҳоя хурсанд қилди, — дейди И. Шишков. — Бу катта масъулият юкланди дегани ҳамдир. Ҳозир кейинги Осиё ва жаҳон чемпионатлари учун тайёргарликни бошлаб юборганмиз. Шуғулланувчиларимиз сафида Ҳусниддин каби умидли ёшлар ҳам бор. Келажакда улар ҳам вилоятимиз, Ўзбекистонимиз номини дунёга танитадиган спортчилар бўлиб етишишига ишонаман. Бу йўлда бор куч-ғайратимни аямайман.
Тажрибали мураббийни мукофот ҳамда касб байрами билан қутларканмиз, юртимиз номини дунёга танитишдаги саъй-ҳаракатларда матонат ёр бўлсин сизга, деймиз. Асло ҳорманг, азиз устоз ва мураббийлар! Байрамингиз муборак бўлсин!
Зулфия БОБОЕВА.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а