вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
20.07.2017 14:08:01
Жорий йилнинг 21 январида вилоят ҳокими билан вилоят телевидениеси орқали телемулоқот ўтказилиши тўғрисидаги маълумот эълон қилинди. Кармананинг қадимий бир гўшасида ўтаётган маросимда тўпланганлар пайтдан фойдаланиб, "Хоним" ариғини қайта тиклаш масаласини кўтариш бўйича савол билан чиқиш лозимлиги ҳақида фикр билдиришдию, мен шу муаммони ечишга ёрдам сўраб, мурожаат қилдим.
Изоҳ: "Хоним" ариғи асрлар бўйи оқиб келаётган азалий сув ўзани эди. Бу ариқдан Кармананинг учдан бир қисми сув олиб, деҳқончилик қилар, аҳоли томорқаси суғориларди. Ўтган асрнинг 60-йилларида Самарқанд вилоятининг қўшни туманлари оралаб, сув келадиган мазкур ариқ "Нарпай" давлат хўжалиги раҳбариятининг "ташаббуси" билан йўқотилди. "Дам Сталин"дан янги ариқ тортилиб, "Хоним" ариғига "Дўрман" каналидан сув тушириб бериладиган бўлди. Икки каналнинг қуввати бир канал зиммасига юкланди-ю, оқар сув таъминотининг у ер, бу ерда танқислиги сезила бошланди. Шунга қарамай, ҳамма бундан кўз юмди. "Қасаба", "Хоним" ариқлари бетонлаштирилиб, сувнинг беҳуда сарфланиши олди олинди" деган ниқоб остида ишни "босди-босди" қилиб юборишди.
Натижада туман раҳбарияти, қишлоқ ва сув хўжалиги бўлими раҳбарлари устма-уст алмашиб кетавергач, умуман ариқлар, оқар сув таъминоти ҳақида ҳеч ким ўйламай қўйди. Биргина Кармана шаҳрининг ўзида ўнлаб оқар сув ўтадиган ариқлар ҳам ўз-ўзидан йўқ бўлиб кетди. Кармана шаҳри ва шаҳар атрофидаги маҳаллаларга ичимлик сув қувурлари тортилгани боис, аҳоли энди томорқасини ҳам шу сувдан суғорадиган бўлди. Қадимдан оқиб келган ариқлар янги ҳовлилар ичида қолиб, аста-секин йўқликка юз тутди.
Кўча ва маҳаллалар кенгайиб боргани сари, ичимлик суви тобора камайиб, ёз ойларида улардан сув оқиши батамом тўхтаб қолди. Бугунги кунда аҳвол ўнлаб аҳоли пунктларига махсус идишларда тракторлар билан ичимлик суви ташиб етказишгача етди.
Биз "Хоним" ариғи қайта тикланса, ичимлик суви муаммосига ҳам ечим топилар, деган фикрда эдик. Аммо "Кармана-Конимех" ирригация тизими бошқармаси масъулларини масаланинг туб моҳияти қизиқтирмади. Томорқа ерларига озиқ-овқат экинлари экиш, аҳолининг ўзини ўзи деҳқончилик маҳсулотлари билан таъминлашини йўлга қўйиш масаласида қилинган даъватлари ҳам бир чеккада қолиб кетди. Бошқарма масъуллари қандай бўлмасин, вилоят ҳокимлиги назоратидаги масалага тезроқ белгиланган муддатда хотима қўйиб, ўзини танқидлардан муҳофаза қилиши лозим эди. Шундай бўлди ҳам. Муаммони кўтариб чиққан киши — каминанинг кўзини боғлаб, оғзига пахта тиқиш ҳаракатлари осон кечди. "Хоним" ариғининг бир чақиримча жойи тозаланди. "Амаки, сизнинг томорқангизга сув келишига кафолат бераман. Бошқаси билан ишингиз бўлмасин. Фақат "муаммо ҳал бўлди" деб, бир варақ миннатдорчилик хати ёзиб берсангиз, бас", деб туриб олди. Гапига ишондим. Баҳор келиб, томорқага помидор, бақлажон, булғор қалампири, ловия, аччиқ қалампир, ошқовоқ каби экинлар кўчатини ўтқаздик. Уруғ қададик. Навбат суғоришга келганда, уларнинг афсуни иш бермай қолди. Ариққа сув келмади. Эски муаммони янгидан кўтариб, яна юқори ташкилотларга мурожаат қилишга мажбур бўлдик. Юқорида номи келтирилган ирригация тизими бошқармаси ходимларидан 4-5 киши бир неча кун уриниб, Кармана ҳокимлиги ёнидаги "Камолот" уйларига ўтган янги йўлни бузиб, қувурни қайта очишди.
"Энди розидирсиз, яна бир энли хат ёзиб беринг, бизлар гапдан қутулайлик", деб туриб олишди сувчилар. Мамнун бўлиб, хат ёзиб бердик. Ота-боболаримизнинг "Сувни кўрмай туриб, кийимни ечма" деган мақолига яна амал қилмаган эканмиз. Сув келмай, қишлоқ аҳолиси олдида юзимиз шувут бўлиб қолди. Алданган одамга алам қилар экан. Кўтарган муаммомизга келган жавобларнинг суви чиқиб кетди-ю, аммо ариққа сув келмади.
"Амаки, асабингизни асранг. Ер остидан сув тортадиган насосча қўйиб олсангиз, сиз ҳам тинч, биз ҳам", дейишди сувчилар охири безор бўлиб.
Икки-уч марта мурожаат қилиб, шунга яраша 2-3 марта миннатдорчилик мактубини битиб берган, сувни кўрмай туриб, кийимини ечган ва эл орасида шарманда бўлиб қолган кишининг гапи энди кимга ҳам ўтсин?! Айниқса, вилоят қишлоқ ва сув хўжалиги бошқармаси бошлиғи ўринбосари М. Тўрақуловнинг вилоят ҳокими ўринбосари М. Санақуловга ва менга жорий йил 16 июнда 03-03/729 рақамли сувли жавоб хати таъбимизни хира қилди:
"Навоий вилояти ҳокимлигининг "Ишонч телефони" орқали фуқаро Рўзиев Раим томорқасини суғориш учун январь ойидан бери сув йўқлиги, ушбу масалада ёрдам сўраб қилган мурожаати тегишли мутахассислар билан жойида ўрганиб чиқилди ва қуйидагилар маълум бўлди:
Фуқаро Рўзиев Раим хонадонида суғориш йўли ва фуқаро томорқасини сув билан таъминловчи ариқда сув борлиги аниқланди. Мурожаат муаллифига тушунтириш ишлари олиб борилди, томорқасидаги экинларни суғориш учун фуқаролар билан ўзаро келишган ҳолда навбатма-навбат суғориш ишлари амалга ошириш зарурлиги тушунтириб ўтилди. Ҳамда ишчи гуруҳ томонидан далолатнома тузилди."
Жавоб хатини ўқиб, ўзингиз хулосага келаверинг. Гўёки, аризачи ақли ноқису, унга тушунтирилган. Ана холос! Муаммони ўрганган мутахассислар шунчалик ҳам "саводли"микан? Ахир, йўл остидан ўтган қувурнинг олд томонига диаметри катта, давомига кичигини қўйган ва ўрталиқда, йўл остида кичик қувур тиқилиб қолиши муқаррарлигини билмайдиган ирригаторни мутахассис деб тан оладиган кишилар бормикан? Муаммо ўрганилаётган пайтда мурожаат этган шахс нега чақирилмаган? Ер ости сизот суви билан деҳқончилик қилиб бўлмаслигини, бу сув ерни қотириб, тупроқ структурасини бузиб юборишини билмайдиган ирригаторни мутахассис деб бўлмаслигини билағон ўртоқларга тушунтириб қўядиган мард наҳотки, вилоятда топилмаса?!
Оддий фуқаро, меҳнат фахрийси, иккинчи гуруҳ ногиронининг йил бошида қилган мурожаати йилнинг ярмидан ўтганида ҳам ижобий ҳал этилмаса, "Халқ билан мулоқот ва инсон манфаатлари йили" деб номланган йилимизнинг обрўси қаерда қолади?
Хулоса ва хотима шу: ариқда оқар сув танқис. Экилган ва энди ҳосилга кира бошлаган экинлар қовжирамоқда. Бутун баҳорда қилинган меҳнат зое кетяпти. Вилоятда ёрдам қиладиган киши борми?!
Райим РЎЗИЕВ,
кекса журналист, истеъфодаги божхона хизмати катта лейтенанти.
Сурат муаллифи Жумамурот МИРЗАЕВ.
ТАҲРИРИЯТДАН: Фуқаро Р. Рўзиевнинг ушбу хати юзасидан мурожаат эгаси истиқомат қиладиган "Талқоқ" МФЙда бўлганимизда, аҳоли томорқаларидаги ҳақиқий аҳволни кўриб, муаллифнинг куюнгани бекорга эмас экан, деган хулосага келдик. Мурожаатчи хонадонида ҳам, бошқа бир нечта ҳовлиларда ҳам экинларга сув йўқлиги сабаб поя, беда экиб қўйилган. Айни ҳосилга кириш чоғида помидор, ошқовоқ, бодринг ва бошқа экинлар сувсизликдан қовжираб қолган.
Шу маҳаллада яшовчи Гулжаҳон Акрамованинг айтишича, бир неча йилдан буён аҳвол шу. "Ичимлик суви ҳам ёзда тортилиб қолади. Кирларни крандан келадиган сувга ювишга мажбурмиз. Ичимлик сувини сотиб оляпмиз. Томорқаларнику айтмасак ҳам бўлар", дейди Г. Акрамова.
Эътиборимизни тортгани, маҳалла ҳудуди билан ёндош, марказий магистраль йўл ёқасида жойлашган бир нечта давлат идоралари ҳовлиси ҳам сувсизликдан қақраб турибди. Аммо бу ҳолат, англашимизча, ҳеч кимни ташвишга солаётгани йўқ.
Умид қиламизки, фуқаро Раим Рўзиевнинг сувсизлик муаммоси юзасидан шикоятлари ижобий якун топади. Бу борада масъул ташкилот ходимларининг аниқ, мурожаатчига фойдали бўлган, муҳими, халқ манфаатини чини билан ҳимоя қила оладиган жавобларини биз ҳам кутамиз.
Манбаа: dustlikbayrogi.uz