вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
23.02.2017 11:38:13
Биринчи Президентимиз Ислом Каримов томонидан мустақиллигимизнинг илк кунидан бошлаб, соғлом фарзанд тарбиясига алоҳида эътибор қаратилди. Бу саъй-ҳаракатлар болажон халқимизни янада руҳлантирди, куч-ғайрат бахш этди, ишончини мустаҳкамлади. Шу боис, мамлакатимизда болалар спортини ривожлантириш, уни оммавий умумхалқ ҳаракатига айлантиришга катта эътибор қаратилди.
Бугун биз спортни сиҳат-саломатлик, соғлом турмуш тарзи, жисмоний ва маънавий баркамоллик манбаи, деб биламиз.
Спорт турлари орасида сув спорти кейинги йилларда жадал ривожланди. Мисол учун, мустақиллигимизнинг дастлабки йилларида Тошкент шаҳри, вилоят марказларида бармоқ билан санарли сув спорти иншоотлари мавжуд бўлиб, уларнинг ҳолати мақтанарли даражада эмасди.
Айни вақтда мамлакатимиз аҳолисининг 32 фоизини ёки 10 миллионини 30 ёшгача бўлган ёшларимиз ташкил этади. Улар ҳақли равишда Ватанимизнинг келажаги учун жавобгарликни зиммасига олишга қодир бўлган, бугунги ва эртанги кунимизнинг ҳал этувчи кучига айланиб бормоқда. Бу соҳада олиб бораётган кенг миқёсли ишларимизни, хусусан, болалар спорти бўйича қабул қилинган дастурларимизни якунига етказиш зиммамиздаги асосий вазифалардан биридир. Жамиятимизда соғлом турмуш тарзини қарор топтириш ҳамда фарзандларимизни ҳар томонлама баркамол қилиб вояга етказиш давлатимиз сиёсатининг устувор вазифаларидан бири қилиб белгиланган. Маълумки, мана шундай олийжаноб мақсадларни ҳаётга татбиқ этилишида жисмоний тарбия ва спортнинг тутган ўрни беқиёсдир.
Бугунги кунда мамлакатимизнинг ҳар бир ҳудудида замонавий сузиш ҳавзалари барпо этилмоқдаки, бу ҳам ўз навбатида ёшларимиз қалбида спортга, хусусан, сув спорти турларига бўлган меҳрни шакллантиришда муҳим омил бўлмоқда. Мисолларга мурожаат қиладиган бўлсак, юртимизда олимпиада ўйинларига ихтисослаштирилган спорт иншоотлари қурилишига охирги беш йилнинг ўзида 1 триллион 230 миллиард сўмлик маблағлар сарфланди.
Мутахассисларнинг таъкидлашича, инсоннинг соғлом ва узоқ умр кечириши учун болаликдан спорт билан шуғулланиш, жисмоний чиниқиш муҳим аҳамият касб этади. Масалан, сув спорти билан мунтазам шуғулланган ўғил-қизлар қадди-қомати тик, танаси соғлом, иродаси мустаҳкам инсон бўлиб вояга етади.
Бугун бизнинг олдимизда турган асосий вазифалардан бири, мамлакатимиздаги мавжуд сузиш ҳавзаларини йил давомида узлуксиз фаолият кўрсатиши ва мавжуд муаммоларни бартараф этиш бўйича Маданият ва спорт ишлари вазирлиги ва вилоят ҳокимликларига таклифлар киритишни даврнинг ўзи талаб этмоқда. Масалан, республикамизда 249 та сув спортига ихтисослаштирилган иншоотлар мавжуд бўлиб, уларнинг 41 таси белгиланган меъёр талабларига умуман жавоб бермайди. Шу билан бирга, 70 та сув спортига мослаштирилган сузиш ҳавзалари яроқсиз ҳолга келиб қолган. Ўтган йили Қарши шаҳридаги олимпия захиралари коллежининг ёпиқ турдаги сузиш ҳавзаси учун Навоий кон-металлургия комбинатининг 600 миллион сўм маблағлари эвазига иссиқ сув билан таъминлаш тизими янгиланди. Бугун мамлакатимизда 10 минг 500 нафардан ортиқ йигит-қиз сув спорти билан мунтазам шуғулланиб келади. Уларнинг аксарияти Тошкент шаҳри, Навоий, Фарғона, Қашқадарё вилоятлари ҳиссасига тўғри келмоқда. Демак, қолган ҳудудларда ҳам мазкур спорт турини янада оммалаштириш, спорт объектларини замонавий жиҳозлар билан таъминлаш долзарб аҳамият касб этади. Зеро, қаерда спортга бўлган оммавийлик даражаси юқори бўлса, терма жамоаларимизда рақобат муҳити шаклланади. Рақобат бор жойда эса натижа кўкка бўй чўзаверади.
Президентимиз Шавкат Мирзиёев 2017 йил 14 январдаги Вазирлар Маҳкамасининг йил якунларига бағишланган мажлисида "...охирги Олимпиадада фақатгина оғир атлетика, бокс, кураш ва дзюдо бўйича совринли ўринлар эгалланди. Бунинг сабаби нимада?", деган ҳақли саволни ўртага ташлаган эдилар. Шундан сўнг Президентимиз томонидан берилган топшириқларга асосан Ўзбекистонда болалар спорти, олий спорт маҳорати ва олимпия резервларини ривожлантириш бўйича қўшимча шарт-шароит ва воситалар кераклиги, ана шу муаммолар ичига чуқур кириб бориш зарурлигини асосий вазифалар сифатида белгилаб бердилар.
Кейинги йилларда барча вилоятларда сув спорти федерациялари ташкил қилинди. Пировардида ўтган тўрт йил давомида сузиш, сув полоси, синхрон сузиш ва сувга сакраш турлари бўйича мамлакатимиз спортчилари кўплаб халқаро турнирларда, Осиё ўйинлари ва қитъа чемпионатларида Ватанимиз шарафини ҳимоя қилиб, совриндорлар сафидан ўрин эгаллашди. Шу билан бирга, юртимизда ҳам қатор ички ва халқаро мусобақалар юқори савияда ташкил қилиниб, янгидан-янги иқтидорлар сафи кенгайиб бормоқда.
Аммо бу натижалар билан кифояланмаслик, сув спортини янада оммалаштириш борасида бугун кўпроқ қайғуришимиз лозим. Ўтган 2013-2016 йилларда сув спортига ҳомий қилиб белгиланган Навоий кон-металлургия комбинати давлат корхонаси ва "Ўзметкомбинат" АЖ томонидан етарлича маблағ ажратилишига қарамасдан 2016 йили Рио-де-Жанейро шаҳрида бўлиб ўтган Олимпия ўйинларига сузиш спорт турида 6 та, синхрон сузишда эса 2 та йўлланмани қўлга киритиш режалаштирилган эди. Бироқ якунда иккита лицензия қўлга киритилди. Бу борада йўл қўйилган хато ва камчиликлар яқинда Навоий шаҳрида бўлиб ўтган Федерациянинг навбатдаги конференциясида танқидий кўриб чиқилди ва 2020 йили Япония давлатининг Токио шаҳрида ўтказиладиган навбатдаги Олимпиадага лицензияларни қўлга киритиш борасида мақсад ва вазифалар белгиланиб олинди.
Шунингдек, Ўзбекистон терма жамоалари таркиби қайтадан шакллантирилди ҳамда ўқув-машғулот йиғинларига ёш, иқтидорли ва малакали мураббийларни жалб қилиш, жоиз бўлса, чет эллик мутахассисларни маслаҳатчи сифатида таклиф этиш режалаштирилмоқда. Шу билан бирга, халқаро муносабатларни янги босқичга олиб чиқиш ҳам устувор вазифалардан бири этиб белгиланди.
Жорий йил Тошкент шаҳрида катталар ўртасида сув спорти турлари бўйича 9-Осиё чемпионати бўлиб ўтиши режалаштирилган. Мазкур халқаро аҳамиятдаги спорт тадбири юртимизда илк бор ўтказилишини инобатга олиб, ҳар томонлама юксак савиядаги тайёргарлик ишлари кетмоқда. Ушбу нуфузли спорт тадбирида спортчиларимиз томонидан юқори натижаларни қўлга киритиш мақсадида терма жамоамиз аъзоларини қатъий назоратга олиш, спортчилар ва мураббийлар учун барча шарт-шароитлар яратиб берилмоқда.
Шунингдек, сув спорти турлари бўйича Ўзбекистон терма жамоалари таркибини тажрибали ва иқтидорли мураббийлар билан тўлдириш мақсадида мамлакатимиз бўйлаб селекция ишларини кучайтириш, вилоят ва туманлардаги сув спорти турлари бўйича ишлаб келаётган мутахассисларнинг малака даражасини ошириш йўлида доимий равишда мураббийлик ва ҳакамлик семинарларини ташкил этиш кўзда тутилган.
Демак, мамлакатимизда сув спортини кенг оммалаштириш, ёшлар, айниқса, қишлоқ жойларда фарзандларимизни спорт билан мунтазам шуғулланишга жалб этиш вақти келди. Келгусида янги спорт объектлари қуриш ва мавжудларининг моддий-техника базасини мустаҳкамлаш, уларни замонавий ускуна ҳамда анжомлар билан жиҳозлаш ҳар доим ўз аҳамиятини йўқотмайди.
Қувондиқ САНАҚУЛОВ,
Навоий кон-металлургия комбинати бош директори,
Ўзбекистон сузиш федерацияси раиси.