вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
24.12.2017 13:26:30
15 декабрь куни Навоий педагогика ва хизмат кўрсатиш касб-ҳунар коллежида ҳудуд сектор раҳбарларининг ҳисоботи тингланди.
Учрашувда вилоят прокуратураси, ички ишлар ва давлат солиқ бошқармалари раҳбарияти, Кармана туман маҳалла фуқаролар йиғинлари, хотин-қизлар, ёшлар муассасалари ва бошқа масъул ташкилотлар вакиллари ҳамда кенг жамоатчилик иштирок этди.
"Маҳалламизни жиноятчиликдан холи ҳудудга айлантирамиз" мавзусида ўтказилган тадбирни вилоят ҳокими К. Турсунов олиб борди. Йиғилишда асосий эътибор туманда жиноятчиликнинг ортиб бораётгани, унинг олдини олишда қандай таъсирчан усулларни қўллаш лозимлигига қаратилди.
Жорий йилнинг ўтган даврида 38 та маҳаллада 350 дан ортиқ жиноят содир этилган.Ҳудудда ўғрилик, қасддан одам ўлдириш, вояга етмаганлар ўртасидаги жиноятлар ҳамда ўз жонига қасд қилиш каби ҳолатлар ошганлиги айтилди. Шунингдек, муқаддам судланганлар, фарзанд тарбиясига беэътибор ота-оналар, хотин-қизлар томонидан қилинган жиноятлар ҳам кўпайган.
Сектор раҳбарлари олиб борилаётган ишлар хусусида ахборот бераркан, туман ҳокимлиги, ички ишлар, прокуратура, солиқ идораларининг жамоат ташкилотлари ҳамкорлигидаги чора-тадбирлари таъсирчанлиги ошаётганлигини таъкидлашди. Жумладан, ўтказилаётган тунги рейдлар орқали вояга етмаганларнинг кечки вақтда кафе, барлар ва бошқа масканларда юришларининг олди олинаётгани, маҳалланинг ўзида кенг жамоатчилик иштирокида ўтказилаётган сайёр суд мажлислари жойларда жиноятчилик камайишига хизмат қилиши ва аҳоли билан юзма-юз мулоқотларда учраётган масалалар жойида ечим топаётгани ҳақида сўз юритилди.
— Ўғрилик жиноятининг кўпайишига баъзан фуқароларнинг ўзи сабабчи бўлмоқда, — дея таъкидлади ўз ҳисоботида туман ИИБ раҳбари У. Адизов. — Айримлар кечки вақт автомашинасини эътиборсизлик билан кўчада қолдиради ёки шунга ўхшаш бошқа ҳолатлар ўғрилик жинояти учун қулай шароит яратиб беради. Бунинг олдини олиш мақсадида ходимларимиз кўчама-кўча юриб, аҳолига тушунтиришлар олиб боряпти. Бироқ маҳалла посбонлари, депутатлар негадир бу каби масалаларга лоқайд қарашмоқда.
Вилоят прокурори Х. Каримов лоқайдлик турли жиноятларга сабаб бўлаётгани ҳақида гапираркан, Зарафшон шаҳрида яқинда юз берган ҳолат ҳақида тўхталди. Кўп қаватли уй ертўласида ишратбозлик қилган бир гуруҳ шахслар мастлик оқибатида шерикларидан бирини ўлдириб қўйишади ва воқеа жойини тарк этишади. Гарчи улар мурдани бу ердан олиб чиқишга уринишса-да, буни уддалай олишмайди. Фақатгина уч кундан сўнг ертўладан тарқалган қўланса ҳид туфайли аҳоли бундан хабар топади. Хўш, бундай лоқайдликка қандай баҳо бериш керак?
Йиғилишда жиноятчиликнинг келиб чиқаётганига асосий сабаблардан бири ишсизлик, бекорчилик эканлиги муҳокама қилинди. Аҳолини иш билан таъминлаш масаласига жиддий ёндашиш кераклиги айтилди. Туманда аҳолини жамоат ишларига жалб этиш орқали, уларга давлат томонидан яратилган махсус фонд ҳисобидан иш ҳақи тўналанаётгани, мазкур тизимни самарали ташкил этиш лозимлигига эътибор қаратилди.
Карманада 62 минг нафар 30 ёшгача бўлган фуқаро истиқомат қилади. Содир этилаётган жиноятларнинг 40 фоизи айнан шу ёшдагилар билан боғлиқ. Бу борада олиб борилаётган ишлар хусусида туман ҳокими ҳамда ички ишлар бўлими бошлиғининг ёшлар масалалари бўйича ўринбосарлари ҳисоботи тингланди. Ушбу йўналишда қилиниши лозим бўлган аниқ таклифлар ўртага ташланди. Бугунгача олиб борилган тадбирлар натижасида ҳудудда 2879 нафар уюшмаган ёш борлиги аниқланиб, улар билан биргаликда аниқ чора-тадбирлар асосида иш олиб борилаётганлиги айтилди.
Туманда хотин-қизлар томонидан содир этилган жиноятлар сони юқорилигича қолмоқда. Ҳудудда жиноятчиликка мойил хотин-қизлар рўйхати шакллантирилиб, унга 77 та оила вакиллари киритилган. Ҳозирда туман хотин-қизлар қўмитаси томонидан айнан шу тоифадаги аҳоли, муқаддам судланганлар, нотинч оилалар билан бир қатор мақсадли тадбирлар амалга оширилмоқда.
Вилоят ҳокими маҳаллаларда жиноятларнинг олдини олиш ишида жамоатчилик вакилларининг хизмати беқиёслиги билан бирга, бу, энг аввало, профилактика инспекторлари зиммасидаги вазифа эканлигини таъкидларкан, йил якунида ҳар бир маҳалла инспектори фаолияти алоҳида муҳокама қилинишини айтиб ўтди.
Йиғилишда жиноятчилик кескин ошган "Кўҳнақўрғон", "Бешкент", "Талқоқ" маҳаллалари алоҳида муҳокама қилинди. Ушбу маҳаллалар раислари ҳамда посбонларининг ҳисоботлари тингланди.
Тадбир давомида аҳоли томонидан ўртага ташланган секторлар раҳбарларининг фаолияти билан бевосита боғлиқ бўлган масалаларнинг ечимлари борасида тегишли мутасаддиларга топшириқлар берилди.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а