НКМК Шимолий кон бошқармасига қарашли "Сармиш" соғломлаштириш оромгоҳи тоғ бағрида жойлашган. Унга боргунингизга қадар тоза ҳаво, кўркам табиат, кенгликлардан кўнглингиз равшанлашиб боради. Шаҳарнинг шовқин-суронидан олисда жойлашган сўлим бу манзилда нафақат жисмингиз, руҳиятингиз ҳам бир қадар ором топади.

"Сармиш"га кириб келаркан­миз, бу ерда ҳордиқ олаётган болажонлар учун кўнгилдаги­дан ҳам кўпроқ шароит яратил­га­нидан хурсанд бўлдик. Му­саф­фо ҳаво бағрида улар­нинг бўш вақтларини маз­мунли ўтка­зиш­лари учун спорт майдон­часи ташкил этилган. Ота-она­лар бурчагида улар яқин­лари билан кўришиб, суҳ­батлаши­шади. Оромгоҳ бағри­дан оқиб ўтувчи сойнинг шил­дир-шилди­рига ҳамоҳанг бола­жонларнинг қувноқ кулгуси ором­гоҳга янада ўзгача кўр­камлик бағишла­гандек. Бир сўз билан айтганда, "Сар­миш"ни кезаркансиз, сал­қин, сердарахт бу манзилда ўғил-қизларнинг мазза қилиб дам олишига гувоҳ бўласиз.

— Болажонларимиз уч мав­сум­да "Сармиш"да бўлишади, — дейди оромгоҳ раҳбари Маҳ­буба Умарова. — Якунланган биринчи мавсумда 734 нафар ўғил-қиз дам олишди. Уларни ўз уйларидагидан зиёда маз­мун­ли ҳордиқ олишлари учун жамоамиз билан бирга астой­дил ҳаракат қиламиз. Болажон­лар кунига беш маҳал овқатла­ни­шади. Тўгаракларда ўзлари қизиққан йўналиш бўйича шу­ғул­ланишади. Бадиий китоб­лар­га эга кутубхонамиз, "Сар­миш­сой" тарихидан ҳикоя қи­лувчи музейимиз, маънавият хоналаримиз мавжуд. Бу ерда болалар исталган вақт­да кириб билимларини бойи­тиш имко­нига эга. Шуҳрат Ку­зин­баев, Шомурод Бекназаров, Татьяна Толибова, Насиба Бу­ра­новалар тажрибали, қоби­лиятли тар­бия­чиларимиздан саналади. Ташкил қилинган турли танлов, тадбирларда бо­ла­жонларимиз фаол, кўтаринки руҳда қатна­шишади. Улардаги қувончни кўрганда, меҳнатимиз бесамар кетмаётганидан хур­санд бў­ламиз.

Мавжуд расм чизиш, ҳайкал­тарошлик, "Моҳир қўллар", "Инглиз тилини ўрганамиз" тўгараклари доим дам олув­чилар билан гавжум. "Моҳир қўллар" тўгараги раҳбари Дило­ромҲусенованинг таъкид­лашича, қатнашувчиларнинг тасаввур олами жуда кенг. Улар биссерда тўқиган табиат, ҳай­вонот дунёси манзаралари чиройли, болаларча ёндашув билан яратилгани сабаб эъти­борингизни тортади. Светлана Быстрова, Жасмина Эркинова, Асема Велеева, Машҳура Қу­вондиқоваларнинг ижодий иш­лари ҳавас қилса арзигулик.

— "Сармиш"га иккинчи мар­та келишим, — дейди суҳбат­дошимиз Учқудуқ туманидаги 18-умумий ўрта таълим мак­та­би ўқувчиси Маржона Қаҳра­монова. — Бу ерда кўплаб дўст­лар орттирдим. Азиза, Жасми­на, Аяжанлар билан биссер тикишни ўргандик. Яна спорт мусобақалари бўлади. Уларга ҳам қатнашамиз. Оромгоҳ менга жуда ёқади. 

— Бўш вақтимда китоб ўқиш­ни яхши кўраман, — дейди учқудуқлик яна бир ўқувчи, Оғабек Исроилов. — Бу ердаги катта кутубхона бор экан. Тез-тез шу ерга кириб, тарихий мав­зудаги асарларни ўқийман. Яқинда "Широқ" асарини ўқиб чиқдим. Широқнинг ватанпар­варлиги, мард, жасурлигига ҳавасим келди. Келажакда мен ҳам юртига содиқ, танти инсон бўлишга аҳд қилдим. Бу асар ҳақида ўртоқларим Санъат, Асад­бек, Шоҳруҳ, Йўлдош, Ой­бек, Шаҳбоз, Камронларга ҳи­коя қилиб бердим. Улар ҳам бу китобни ўқишмоқчи. 

"Сармиш"да Оғабек сингари юзлаб ўқувчиларнинг кунлари шундай мазмунли ўтаётгани қувонарли. Бундан ташқари, бо­лажонлар компьютерлашти­рилган инглиз тили тўгарагида  ҳам ҳар кун, янги сўзлар ўрга­нишади, бир-бирларига ўрга­ти­шади. Қўлда ясалган ҳай­кал­тарошлик намуналари эса гар­чи содда, оддий бўлишига қа­рамай, болаларнинг орзу-ниятларини мужассам этгани билан гўзал.

— Бошланишида пластилин­дан турли шакллар, кейинчалик гилдан ҳайкалча­лар ясашни ўргандик, — дейди биз билан суҳбатда тўгарак аъзо­лари Дос­тон Аъзамов, Фир­давс Файзул­лаев, Ибодул­ло Тешабоевлар. — Устозимиз Дилдора опа Ка­римова ишла­ри­миздан хурсанд бўладилар, камчиликлари­миз­ни кўрсата­ди­лар. Ясаган ҳай­калчалари­миз­ни оромгоҳда бў­либ ўта­диган кўргазмага олиб чиқиш биз учун катта байрам.    

Дарвоқе, оромгоҳда ҳар мав­сумда болаларнинг қўлда яса­ган ижодий ишларидан катта кўргазма уюштирилади. Унда болалар мавсум давомида фаол­ликлари сабаб қўлга ки­ритган "сармишинка" пули би­лан қатнашиб, ўзларига ёққан расм, аппликация, ҳайкалча­лардан эсдаликка харид қили­ша­ди. Бу уларнинг яқинларига совғаси бўлади. Ҳар гал бола­жонлар "Сармиш"дан уйларига мана шундай ажойиб туҳфа, энг муҳими, унутилмас таассурот билан қайтишади.

Зулфия БОБОЕВА,

Суратлар муаллифи Сирож АСЛОНОВ.

Манбаа: dustlikbayrogi.uz