вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Санъат фидойиси

20.03.2015 20:20:08

Ўзбекистон давлат консерваториясида бўлиб ўтган "Халқ чолғулари ижрочилигининг замонавий омиллари" республика илмий-амалий конференциясида Хатирчи педагогика ва хизмат кўрсатиш касб-ҳунар коллежининг катта ўқитувчиси, "Шуҳрат" медали соҳиби Бегдулла Сойибов "Мусиқа таълими концепцияси" мавзусидаги маърузаси билан махсус сертификатни қўлга киритди.

Замонавий мусиқа таълимининг долзарб муаммолари, янги йўналишлари таҳлили, янги ахборот технологияларни мусиқа таълими тизимига жорий этишга бағишланган анжуман Ўзбекистон Республикаси Маданият ва спорт ишлари вазирлиги ташаббуси билан ташкил этилди. Унда Ўзбекистон давлат консерваторияси, давлат санъат ва маданият институти, Низомий номидаги Тошкент давлат педагогика университети, Урганч, Андижон, Нукус, Бухоро, Наманган, Фарғона, Қарши давлат университетлари, маданият ва санъат коллежлари, Глиэр ва Успенский номидаги таълим муассасалари иштирок этди.

Анжуманда Қорақалпоғистон Республикаси, вилоят ва Тошкент шаҳридаги тадқиқотчи ва ўқитувчилар, ёш мутахассислар ҳамда талабаларнинг нафақат халқ чолғулари ижрочилигига, балки мусиқий таълим муаммолари, миллий анъаналарни асраб-авайлаш, таълим методологияси ва тарихига оид маърузалари тингланди ҳамда баҳоланди.

— Конференцияда инновацион педагогик технологияларни жорий этиш, ижрочилик малакаларини ривожлантириш, бадиий ижро, саҳна маданияти, ёшлар тарбиясида репертуар аҳамияти ва тарғиботига асосий эътибор қаратилди, — дейди сертификат соҳиби Б. Сойибов.

Қарийб 28 йилдан буён миллий санъатимиз сирларини ёшлар қалбига сингдириб келаётган тажрибали педагогнинг фарзандлари Азима Самарқанд давлат университетининг мусиқа факультетини тугатиб, коллежда ишлаётган бўлса, Озода шу олий даргоҳнинг 3-босқичида, санъат йўналиши бўйича таълим олаяпти.

И. БАҲРОНОВ.