вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
04.09.2017 10:09:34
Мамлакатимизнинг мустақил тараққиёт йўлига назар ташлар эканмиз, ўзимизнинг ҳаққоний, тўғри йўлимизни танлаб олганимиз, шу асосда улкан ютуқларни қўлга киритганимиз кўз ўнгимизда гавдаланади. Йиллар ўтган сайин Навоий шаҳри ҳам гуллаб-яшнамоқда: ўзига хос, ўзига мос шаҳарсозлик ва меъморчилик асносида янги қиёфа касб этаётир. Анъанавий маҳаллий иморатсозлик сақлаб қолинган ҳолда янги бунёд этилган бинолар шаҳримиз чиройига янада чирой қўшмоқда.
Шаҳар иқтисодиётини таркибий ўзгартириш, ишлаб чиқариш корхоналарини модернизация қилиш борасида изчил амалга оширилаётган ислоҳотлар ички бозорни ўзимизда тайёрланган маҳсулотлар билан таъминлаш баробарида, уларни экспорт қилиш имкониятини ҳам кенгайтираётир. Жорий йилда шаҳарда саноат маҳсулотлари ишлаб чиқариш ҳажми ўтган йилга нисбатан 108,0 фоизга, жумладан, истеъмол товарлари 105,3 фоизга, асосий капитални кўпайтиришга 642 миллиард 318,0 миллион сўм миқдорида инвестициялар киритилиб, ўтган йилнинг шу даврига нисбатан 131,9 фоизга ўсди. Қурилиш ишлари ҳажми 129,2 фоизга ва савдо айланмаси ўтган йилнинг шу даврига нисбатан 121,5 фоизга ортиғи билан бажарилди. Иқтисодиётда ҳудудий корхоналарнинг улушини ошириш мақсадида йилига 20 фоиздан кам бўлмаган ўсиш суръатларини таъминлаш талаб этилади. Бунда 2020 йилга келиб, ҳудудий саноат маҳсулотлари ишлаб чиқариш 2 баробарга оширилиши таъминланади. Ушбу натижаларга эришиш мақсадида, бугунги кунда шаҳарнинг ижтимоий-иқтисодий дастури ишлаб чиқилган бўлиб, унга асосан 2017 йилда қиймати 268,4 миллиард сўмлик 263 та лойиҳа амалга оширилиши назарда тутилган. Натижада қўшимча 250 миллиард сўмдан ортиқ қўшимча қиймат яратилишига ва 1,8 миллион долларлик маҳсулотларни экспорт қилиш ҳамда 2263 та янги иш ўрни яратилади.
2017 йилга мўлжалланган иқтисодий дастурнинг 1 август ҳолати бўйича жами 151 та лойиҳа киритилган бўлиб, амалда 180 та лойиҳа ишга туширилган ва 1090 та иш ўрни яратилган. Бундан ташқари, 2018 йилга мўлжалланган иқтисодий дастурига 400 дан зиёд лойиҳаларни киритиш устида ишлар олиб борилмоқда.
Ўзбекистон Республикаси Президентининг 2016 йил 26 декабрдаги "2017-2019 йилларда тайёр маҳсулот турлари, бутловчи буюмлар ва материаллар ишлаб чиқаришни маҳаллийлаштиришнинг истиқболли лойиҳаларини амалга оширишни давом эттириш чора-тадбирлари тўғрисида"ги қарорига асосан шаҳар маҳаллийлаштириш дастури доирасида қиймати 1,2 миллиард сўмлик 5 та лойиҳа амалга оширилиши натижасида 350 минг АҚШ доллари миқдоридаги маблағ тежалади.
Давлат Инвестиция дастури доирасида 305,9 миллиард сўмлик 13 та йирик лойиҳа амалга оширилмоқда.
2017-2018 йилларда шаҳарни ижтимоий-иқтисодий ривожлантириш дастурида Халқаро молия институтларининг кредит маблағлари ҳисобига амалга ошириладиган жами10 та лойиҳа рўйхати шаклланган бўлиб, умумий қиймати 47,0 миллион АҚШ доллари маблағи ўзлаштирилиши ҳисобидан 993 та иш ўрни яратилиши режалаштирилган. Ушбу дастур амалга оширилиши натижасида 14,1 миллион АҚШ доллари миқдорида маҳаллий маҳсулотлар экспорт қилиниши белгиланган.
Жорий йилнинг олти ойи давомида аҳоли бандлигини таъминлаш дастури бўйича 2354 та иш ўрни яратиш режалаштирилган бўлиб, амалда 2360 тага бажарилди.
Шаҳримиздаги кам қувватли корхоналар, бўш турган ва қурилиши тугалланмаган объектлар негизида ишлаб чиқаришни ташкил этиш орқали янги иш ўринларини яратиш бўйича қиймати 5440 миллион сўмлик 101 та лойиҳадан жорий йилнинг 7 ойида 42 таси ўз фаолиятини йўлга қўйиши натижасида 255 та иш ўрни яратилди. Илгари хусусийлаштирилган фаолиятсиз объектлар сифатида 34 та объект аниқланиб, бўш турган ва ишлаб чиқариш майдонларидан самарали фойдаланиш бўйича дастур ишлаб чиқилди.
2017 йилнинг январь-июль ойларида 6,4 миллион АҚШ доллари миқдорида маҳсулот экспорт қилиниб, режа 105,7 фоизга бажарилди. Экспорт ҳажмида саноат маҳсулотлари 112,5 фоиз (6,1 миллион АҚШ доллари), мева-сабзавот маҳсулотлари 51,5 фоизни (355,8 минг АҚШ доллари)ни ташкил этди.
Жорий йилда шаҳардаги 14 та экспортёр корхона томонидан Буюк Британия, Россия, Туркманистон, Қозоғистон каби дунёнинг кўзга кўринган давлатларига маҳсулотлар экспорти йўлга қўйилди.
Шунингдек, Инвестиция дастурига асосан, 15,8 миллиард сўм маблағ эвазига 7 та объектда қурилиш-таъмирлаш ишлари олиб борилмоқда. Жумладан, 17-кичик туманда 630 ўринли мактаб биносининг қурилиш-монтаж ишлари жадал давом этмоқда. Объектнинг тендер қиймати 4,9 миллиард сўмни ташкил этади. Қиймати 3,0 миллиард сўм бўлган вилоят Перинатал марказини реконструкция қилиш ҳамда вилоят эндокринология марказининг қурилиш ишлари бошланган бўлиб, барча лойиҳа смета ҳужжатлари тайёрланган.
Аҳолига зарур шарт-шароитлар яратиш мақсадида кўп қаватли уйларни қуриш ва таъмирлаш, маданий мерос объектларини тиклаш, ижтимоий соҳа объектлари ва йўлларни таъмирлаш, темир йўл атрофи ва қабристонларни ободонлаштириш ишларига ташкилотлар, аҳоли ҳамда банк кредитлари ҳисобидан шаҳар бўйича жами 60,9 миллиард сўмлик қурилиш-таъмирлаш ишлари бажарилди.
Сўнгги йилларда шаҳримиз ўзгача қиёфа касб этиб, янги қурилаётган кўп қаватли уй ҳисобига кўркамлашиб бормоқда. Жорий йилда ҳам қиймати 57,6 миллиард сўмлик 18 та 750 хонадонли кўп қаватли уй-жой фойдаланишга топширилди.
Шаҳримизда барча тармоқ ва йўналишларда бунёдкорлик ҳамда қурилиш ишлари тизимли олиб борилмоқда. Равон йўллар миллионлаб маблағларни тежаши ҳеч кимга сир эмас. Бу борада ҳам бир қанча ишлар амалга оширилди. Маҳаллий бюджет ҳисобидан жорий таъмирлаш ишлари бўйича дастлабки манзилли дастурга асосан 21,6 километрлик 4 та лойиҳа киритилган. Хусусан, "Мурувват" МФЙ ҳудудидаги Зулфия номли кўчанинг 100 метрли йўлига 16,0 миллион сўм маблағ ажратилиб, таъмирлаш ишлари тўлиқ якунига етказилди. Шунингдек, С. Айний номли кўчанинг 580 метрли йўлини таъмирлаш учун 863,6 миллион сўм маблағ ажратилиб, айни кунларда таъмирлаш ишлари олиб борилмоқда.
Хулоса ўрнида шуни айтиш мумкинки, ўз Ватани билан фахрланиш туйғуси ҳеч биримизни тарк этмасин. Яна янги юксалишлар довони қаршисида турибмиз. Бу йўлда юртдошларимиз ўзларининг фидокорона меҳнатлари, илмий изланишлари билан барчага ибрат бўлишига ишонамиз. Қалбларимизни истиқлолнинг ҳар бир кунида шукроналик ҳисси тарк этмасин!
Умарбек ХАЛИЛОВ,
Навоий шаҳар ҳокими.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а