вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
17.03.2016 19:44:17
Мустақиллик йилларида мамлакатимизда туризм соҳасининг босқичма-босқич ривожланиб бориши натижасида юртимиз дунё сайёҳларининг нигоҳидаги энг гўзал масканлардан бирига айланди.
Дарҳақиқат, бугун мамлакатимизга ташриф буюраётган хорижий меҳмонларга Ўзбекистонимизнинг ҳар бир ҳудудини кўз-кўз қилсак арзийди. Аслида ҳам халқимиз азалдан меҳмоннавоз, бағрикенг бўлган. Айни пайтда юртимиз ҳақиқий маънода туризм индустрияси юксалаётган заминга, сайёҳлик иқтисодиётнинг тез суръатларда ривожланаётган, энг сердаромад тармоқларидан бирига айланди.
Бугунги кунда мазкур соҳадаги хизматлар экспорти дунёда нефть ва автомобиль саноатларидан кейин учинчи ўринни эгаллаб турганлиги ҳам ушбу йўналишдаги ишларни янада жонлантириш ва юксалтириш эҳтиёжини оширмоқда. Мамлакатимиздаги янгиланишлар нафақат туризм инфратузилмасини такомиллаштириш, балки миллий туристик хизматларни халқаро сайёҳлик бозорларига фаол олиб кириш имконини берганлиги алоҳида эътирофлидир.
Мустақилликнинг дастлабки йиллариданоқ, Президентимиз ташаббуси билан мазкур соҳани ривожлантириш ва ушбу тармоқнинг ҳуқуқий базасини такомиллаштириш борасида қатор чора-тадбирлар амалга оширилди. Жумладан, 1999 йилда қабул қилинган "Туризм тўғрисида"ги Ўзбекистон Республикаси Қонуни ҳамда Ўзбекистон Республикаси Вазирлар Маҳкамасининг 2012 йил 10 октябрдаги "Ўзбекистон Республикасида туризм соҳасини янада қўллаб-қувватлаш ва ривожлантириш чора-тадбирлари тўғрисида"ги қарори соҳа ривожида муҳим аҳамият касб этди. Бугун юртимиз сайёҳлик кўлами ва тарихий қадамжолари кўплиги бўйича дунёда етакчи ўнта мамлакат сафидан жой олди.
Вилоятимизда ҳам туризм соҳасини янада ривожлантириш мақсадида қатор ижобий ишларга қўл урилмоқда. Ҳудудда бугунги кунда сайёҳларга хизмат кўрсатувчи 26 та меҳмонхона мавжуд бўлиб, уларнинг 10 таси Навоий шаҳрида, 8 таси Кармана туманида, 3 таси Конимех туманида, 3 таси Нурота туманида, 1 тадан Зарафшон шаҳри ва Учқудуқ туманларида ташкил этилган. Хусусан, улар орасидан 23 та меҳмонхонада хорижий сайёҳларга хизмат кўрсатиш ҳуқуқини берувчи лицензиялар мавжуд. Таъкидлаш керакки, бугунги кунда вилоятимиздаги мавжуд меҳмонхоналар бир вақтнинг ўзида 1500 нафар сайёҳга хизмат кўрсатиш қувватига эга. Эътирофлиси, вилоятимизга ташриф буюраётган хорижий сайёҳларнинг сони йил сайин ошиб бормоқда. Жумладан, 2014 йилда 6548 нафар сайёҳга хизмат кўрсатилган бўлса, 2015 йилда уларнинг сони 7150 нафарни ташкил этди ёки бу аввалги йилга нисбатан 9,2 фоизга ошганлигини кўрсатмоқда. Таҳлилларга эътибор қаратадиган бўлсак, вилоятимизнинг чекка ҳудудида, пурвиқор тоғлар бағрида жойлашган, Нурота туманининг Сентоб қишлоғидаги барча қулайликларга эга бўлган 2 та 30 ўринли ва 1 та 25 ўринга мўлжалланган "Сентобистон", "Сентоб Шахи Мустафо", "Сентоб Таги Жар" меҳмонхоналарида йилдан-йилга туристлар ташрифи кўпайиб бораётганлиги ҳам ҳудудимизда туризм салоҳияти тобора юксалаётганлигидан далолат беради.
— Алоҳида эътироф этиш керакки, вилоятимизда туризм соҳасининг тараққиёти мазкур соҳа билан узвий боғлиқ озиқ-овқат саноати, қишлоқ хўжалиги, транспорт соҳалари истиқболига ҳам кенг йўл очиб бермоқда, — дейди "Ўзбектуризм" МКнинг Навоий вилоятидаги ваколатли вакили Собир Камолов.
— Энг аҳамиятлиси, бу ўз навбатида янги иш ўринлари яратилишига ҳам муносиб ҳисса қўшаётир. Бугунги кунда 460 нафардан ортиқ аҳолининг айнан мазкур соҳада иш билан бандлиги бунинг ёрқин исботидир. Туризм соҳасида хизмат қилувчи ишчи-ходимларнинг малакасини ошириб бориш, уларнинг бу борадаги билим ва тажрибаларини мустаҳкамлаш йўналишида белгиланган тартибда қатор семинарлар, ўқувлар ҳам ташкил этилиб келинмоқда.
Жумладан, вилоятимизда жойлашган 9 та меҳмонхонанинг 14 нафар ходими "Ўзбектуризм" компаниясининг консалтинг илмий-ўқув маркази томонидан 2 ҳафталик қайта тайёрлаш курсларида малакасини ошириб, тегишли сертификатларга эга бўлди. 2015 йилда вилоятимизда туризм соҳаси бўйича 9,1 миллиард сўмлик туристик хизматлар экспорти амалга оширилиб, белгиланган режа 112,6 фоизга бажарилди. 2016 йилда эса жами 11,2 миллиард сўмлик туристик хизматлар кўрсатилиши режалаштирилган.
Вилоятимизда босқичма-босқич меҳмонхоналар қуриш борасидаги ишлар салмоғи ҳам йилдан-йилга ошиб бораяпти. Биргина 2015 йилда тадбиркорлик субъектлари томонидан Кармана туманида 25 ўринли "Hostel Karmana", 15 ўринли "Само юлдузи" ҳамда Конимех туманининг "Айдаркўл" табиий сув ҳавзаси бўйида "Golden Safari" МЧЖ томонидан 60 ўринли ўтов лагери қурилиб, фойдаланишга топширилгани фикримизнинг тасдиғи ҳисобланади. Шунингдек, мазкур ҳудуддаги яна бита80 ўринли ўтов лагери қайта таъмирланиб, 120 ўринлига айлантирилди. Ушбу меҳмонхоналарнинг фаолияти йўлга қўйилиши натижасида 20 та янги иш ўрни ҳамда қўшимча равишда 100 нафардан ортиқ меҳмон ва сайёҳларга хизмат кўрсатиш имкони пайдо бўлгани ҳам амалий ишларнинг узвий давомидир. Навбаҳор туманидаги "Сармишсой" дарасида хорижий сайёҳларга хизмат кўрсатиш учун "Навоий Техно Планет" МЧЖ томонидан 2014 йилдан 2018 йилга қадар жами 200 ўринли 45 та замонавий коттеж қурилиши режалаштирилганлиги ҳам бу йўналишда узоққа мўлжалланган истиқболли лойиҳалар амалга татбиқ этилаётганлигининг ифодаси саналади. Хусусан, тадбиркорлик субъекти томонидан ўтган 2015 йилда 4 та коттеж қурилиб, фойдаланишга топширилган бўлса, жорий йилда эса яна 11 та объект бунёд этилиши режалаштирилган.
Бугун хорижий сайёҳлар нигоҳи юртимизнинг бетакрор табиати, бебаҳо маънавий меросига қадалган экан, яратилаётган қулай инфратузилма сайёҳлик салоҳияти тобора юксалиб боришига, бу эса иқтисодиётнинг ажралмас қисми сифатида аҳолининг турмуш фаровонлигини яхшилашга, соҳанинг янада тараққий этишига муҳим омил бўлиб хизмат қилади.
Отабек АСЛОНОВ,
вилоят ҳокимлиги ахборот хизмати раҳбари,
вилоят ҳокимининг матбуот котиби.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а