вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
17.11.2016 16:57:51
Суғурта хизматлари бозор иқтисодиёти шароитида корхона ва ташкилотлар ҳамда аҳолининг манфаатларини ҳимоя қилувчи самарали воситага айланди.
Бугунги кунда мамлакатимиздаги суғурта компаниялари томонидан аҳолига кўплаб турдаги хизматлар кўрсатилаётир. Мамлакатимиз суғурта бозорининг фаол иштирокчиларидан бири бўлган "Кафолат Суғурта Компанияси" акциядорлик жамияти хизматлар сифатини ошириш ва кадрлар тайёрлаш борасидаги саъй-ҳаракатлари натижасида халқаро ва миллий суғурта бозорида ўзининг муносиб ўрнини эгаллаб келмоқда.
Жамиятнинг вилоят филиалида 1 та бўлим, 7 та суғурта марказларида 25 нафар малакали мутахассис ва 100 нафардан зиёд суғурта агенти фаолият юритмоқда. Жорий йилда Конимех ва Нурота туман суғурта марказлари иш бошлади. Даставвал компания томонидан мажбурий ва ихтиёрий суғурта йўналишининг 25 тури бўйича хизмат кўрсатилган бўлса, ҳозирги кунга келиб, умумий суғурта тармоғининг барча 17 та класслари доирасида "Мен ва фарзандим", "Она ва бола саломатлиги", "Болажон", "Нуроний", "Транспорт воситалари эгаларининг фуқаролик жавобгарлигини мажбурий суғурта қилиш", "Ихтиёрий тиббий суғурта", "Тиббиёт ходимларининг касбий жавобгарлиги", "Ижарага олинган кўчмас мулк суғуртаси" каби 90 дан ортиқ турлари таклиф этилмоқда.
— Суғурта хизматлари кўрсатишда замонавий ахборот-коммуникация технологияларидан кенг фойдаланилаётир, — дейди филиал директори вазифасини бажарувчи Ойбек Боқиев. — Филиалимиз янги бинога кўчиб ўтгач, алоқа сифати ва тезкорлигини ошириш имконини берадиган оптик толали телекоммуникация қурилмалари билан жиҳозланди. Суғурта хизмати тўловини электрон тарзда тўлаш, "СМС хабардор этиш" каби хизматлар мижозларга қўл келаяпти. Суғурта хизматларидан online тарзда фойдаланиш имконияти ҳам мавжуд. Бунинг учун мижозлар мобил телефон рақамини кўрсатиб, рўйхатдан ўтишлари зарур. Улар рўйхатдан муваффақиятли ўтганларидан сўнг, очилган шахсий виртуал хона орқали "ТВЭЖМСҚ", "Болажон", "Саломатлик" ва "Оилавий" онлайн суғурта хизматларидан фойдаланишлари мумкин.
— Мана, бир неча йилдирки, "Кафолат Суғурта Компанияси" акциядорлик жамияти билан ҳамкорликда иш олиб бораяпмиз, — дейди "Темир капитал монтаж" хусусий корхонаси раҳбари Мурод Шамсиев. — 2015 йилнинг куз фаслида кузатилган кучли шамол натижасида вилоятимиздаги кўпгина уйларга жиддий шикаст етди. Мазкур суғурта ҳодисаси учун компания филиалига "Қурилиш-монтаж таваккалчиликларидан суғурталаш" тури доирасида кўрилган зарар учун суғурта қопламасини тўлашини сўраб, мурожаат қилдик. Компания томонидан мурожаатимиз белгиланган тартибда ўз вақтида кўриб чиқилди ва 16 миллион 700 минг сўм маблағ тўлаб берди. Бу эса бизнинг компанияга бўлган ишончимиз ошишига сабаб бўлди ва унинг доимий мижозига айландик. Бундай табиий офатларни олдиндан башорат қилиш қийин. Ҳаётимизда бу каби хатарлар учраб туради. Шунинг учун ҳам инсон кутилмаган нохуш ҳодисалардан суғурта хизмати орқалигина кафолатланади.
Сифатли хизмат кўрсатиш масаласининг нақадар муҳимлигини тушунган ҳолда компания томонидан бир қанча йирик ташкилотлар билан шартномалар тузилган бўлиб, бу мижозларнинг суғурта қопламасини тўлаш бўйича қилаётган мурожаатларини тезкор ҳал этиш имконини бермоқда. Хусусан, НКМК, "Навоий нефть база" давлат унитар корхонаси, "Қизилқумцемент", "Навоийазот", "Навоий иссиқлик электр станцияси", "Навоийдонмаҳсулотлари" акциядорлик жамиятлари ва "Электрокимёзаводи" ҚК АЖ каби ташкилотлар жамоанинг корпоратив мижозларидир. Компания ходимлари мижозларнинг талаб ва истакларини қондира оладиган янги йўналишлар ва суғурта турларини яратиш устида доимий равишда иш олиб боришмоқда. Улар аҳоли, корхона ва ташкилотларга янада яқин бўлиш мақсадида хизмат кўрсатиш тармоғини кенгайтириб, ҳар бир мижознинг замонавий талабларига жавоб берувчи суғурта турларини тақдим этаяпти.
— Жамиятимиз суғурта тармоғининг барча йўналиши бўйича хизмат кўрсатади, — дея суҳбатни давом эттирди етакчи мутахассис Ирода Рахманова. — 2015 йил давомида келиб тушган 202 та юридик ва жисмоний шахсларнинг суғурта қопламаси ҳақидаги мурожаатлари ижобий қаноатлантирилиб, жами 313 миллион сўмдан ортиқ суғурта қопланмаси тўлаб берилган. Шундан 19 миллион сўми мажбурий суғурта тури — "Транспорт воситалари эгаларининг фуқаролик жавобгарлигини мажбурий суғурта қилиш" тури бўйича ЙТҲ жабрланувчиларига, шунингдек, 215 миллион 600 минг сўм "Иш берувчининг фуқаролик жавобгарлигини мажбурий суғурта қилиш" тури бўйича хизмат вазифасини бажариш вақтида шикастланган ва ҳалок бўлганларнинг оила аъзоларига тўлаб берилган.Қолган 97 миллион 800 минг сўм миқдоридаги қопламалар бир қатор "Ихтиёрий суғурта" турлари (жисмоний шахсларни бахтсиз ҳодисалардан суғурталаш, мактаб ўқувчиларини бахтсиз ҳодисалардан суғурталаш, аҳоли мол-мулки, иморатларини суғурталаш, гаровга қўйилган мол-мулк, транспорт суғурталари бўйича) тўлаб берилган. Жорий йилда 168 та юридик ва жисмоний шахслар томонидан келиб тушган мурожаатлар кўриб чиқилиб, жами 98 миллион сўмдан ортиқ суғурта қопламалари тўлаб берилган. Шундан мажбурий суғурта турлари бўйича 30 миллион 200 минг сўм, ихтиёрий суғурта турлари бўйича эса 68 миллион сўм суғурта қопламалари тўланган.
Жорий йилда Ватанимиз мустақиллигининг чорак асрлик тўйини муносиб ўтказиш ҳамда энг улуғ, энг азиз байрамимиз олдидан инсонларга яхши кайфият улашиш ва аҳоли ўртасида суғурта маданиятини ошириш, суғурта фаолияти ҳақида оммага кенгроқ маълумот етказиш мақсадида акциядорлик жамияти маънавий-маърифий ва спорт тадбирлари ҳамда байрам акциясини ташкил қилди. Тадбир якунида ғолиб ҳамда фаол иштирокчилар диплом, фахрий ёрлиқлар ва компания бренди туширилган совғалар билан тақдирланди.
Компаниянинг сўнгги йиллардаги молиявий кўрсаткичлари барқарорлиги ҳамда ўз ишига масъулият билан ёндашаётганлиги натижаси ўлароқ, ўтган йилда "SAIPRO" Ахборот-рейтинг агентлиги томонидан тўлов қобилиятига эгалиги миллий рейтингининг "UzA+" (энг юқори молиявий барқарорлик) даражасига сазовор бўлди. Бу, ўз навбатида, ташкилотнинг фаолияти ижобий баҳоланганлигини, унинг суғурта бозорида эгаллаган ўрни, фаолият кўрсаткичлари жадал ўсганлигини ҳамда кенг ривожланган агентлик тармоғи мавжудлигини тасдиқлаб, суғурта турлари бўйича хизматлар кўрсатишда пешқадамлик қилаётганлигини акс эттиради. Қолаверса, мижозлар ва ҳамкорлар учун унинг барқарорлик даражаси ва молия бозоридаги нуфузи рейтинг агентликлари томонидан берилган баҳо ҳисобига холислик касб этади. Бу эса компаниянинг мижозлар олдидаги нуфузи янада ортишига хизмат қилмоқда.
Хуршида НАРЗИЕВА.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а