вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Нафосат ва соғломлик сари...

27.08.2015 15:43:48

"Ёшлар" спорт мажмуасида мустақиллигимизнинг 24 йиллигига бағишлаб "Бетакроримсан, ягонасан, она Ватаним — Ўзбекистоним!" шиори остида "Гимнастика барча учун" номли гимнастрада бўйича анъанавий вилоят очиқ биринчилиги бўлиб ўтди.

Унда туман ва шаҳарлардан тўрт юз нафардан ортиқ МТМ тарбияланувчилари, ўқувчи ва талабалар, шунингдек, ташкилот ходимлари ҳамда уй бекалари қатнашишди. Гуруҳлар мусиқий композициялари 3 ёш, 14 ёшгача бўлганлар, аралаш ҳамда 45 ёшдан юқорилар тоифасида баҳолаб борилди. Ҳар бир чиқишдаги оригиналлик, янгилик, сюжет, умумий таассурот, бажариш техникасининг хилма-хиллиги гимнастика бўйича тажрибали мураббий саналган Дилбар Мансурова бош ҳакамлигида алоҳида эътиборга олинди.

— Гимнастикани фақат шаҳар, туман марказларида эмас, чекка ҳудудларда ҳам ривожлантиришни режалаштирганмиз, — дейди вилоят гимнастика федерацияси ижрочи директори Баҳора Ҳамдамова. — Бу нафақат гўзаллик, соғлом турмуш тарзи сари йўл, балки репродуктив саломатликка ҳисса ҳам деганидир.

— Гимнастикачиларимиз доим яхши натижаларни кўрсатиб келишган, — дейди Зарафшон шаҳар хотин-қизлар қўмитаси раиси Зулхумор Жўраева. — 2014 йилда гимнастрада бўйича Ўзбекистон Кубоги соҳиби бўлдик. Бунда гуруҳ раҳбари Нурбек Сеидмаҳановнинг хизмати катта.

Ҳакамлар ҳайъати хулосаларига кўра, 14 ёшгача бўлганлар ўртасида 1-ўринни Навоий шаҳри вакиллари эгаллади. 2-ўрин зарафшонликларга, 3-ўрин эса Конимехликларга насиб этди. Аралаш ёш гуруҳларида ғолибликни Зарафшон шаҳри вакиллари қўлга киритган бўлса, кейинги ўринларга Конимех тумани ҳамда томдилик қатнашчилар эгалик қилди. 45 ёшдан юқорилар ўртасидаги чиқишларда Навбаҳор тумани иштирокчиларининг қўли баланд келди. Хатирчиликлар 2-, Қизилтепа тумани вакиллари эса 3-ўринга лойиқ, деб топилди. Мусобақа сўнгида ғолиб ва совриндор гуруҳлар диплом ҳамда эсдалик совғалари билан тақдирланди.

З. МАРДОНОВА.