вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
20.05.2016 14:56:13
Дунёга келган инсон борки, яхши яшашга интилади, фаровон ҳаёт кечиришни истайди. Мустақил Ўзбекистонда ана шу интилишу истакни амалга ошириш учун ҳар томонлама шароит яратилган, десак, муболаға эмас. Зотан, бугун кўплаб юртдошларимиз ҳалол меҳнати, тадбиркорлигию яратувчанлиги билан нафақат ўзи ва оиласи, балки халқимиз турмуш тарзини яхшилашга, бозорларимиз сероб, дастурхонларимиз тўкин бўлишига ҳисса қўшмоқда.
Навбаҳор туманидаги "Оқ олтин" маҳалласида яшовчи Норқул ака Саноқулов ана шундай инсонлардан. У бугун оиласи билан шахсий томорқасида қўзиқорин етиштириб, ички бозорни тансиқ маҳсулот билан таъминлаяпти.
...Тақдир экан, Норқул ака бундан ўн олти йил аввал, туман алоқа бўлимида ишлаб, кўп қатори рўзғор тебратиб юрган вақтида тўсатдан умуртқа чурраси дардига чалинди. Муолажалардан сўнг хасталик чекиниш ўрнига янада зўрайди. Уч нафар фарзанди айни "еярман, ичарман" даврида оила бошлиғининг юролмай қолиши ташвишланарли ҳол эди, албатта.
Дардини берган давосини ҳам беради. Фақат бунинг учун беморга яхши парвариш, меҳр керак эди. Оила бекаси Дилором опа "ўқиганман, ишлашим керак", деб ўтирмай, севган касби ўқитувчиликдан воз кечиб бўлса-да, умр йўлдошига елкадош бўлди. Бу орада Дилором опанинг ота-онаси Мелис ота ва Зубайда аялар Тошкентдаги сиҳатгоҳлардан бирига даволанишга бориб, қибрайлик Абдуманноп исмли киши билан танишишди. Мелис ота куёвининг оғир дардга чалинганини, унга қараётгани боис қизи ҳам ишламаётганини, бу шароитда уч болани катта қилиш осонмаслигини куюниб гапирди. Шунда Абдуманноп ака бағрикенглик билан уй шароитида ҳам яхшигина даромад олиш мумкинлигини, имкони бўлса, сиҳатгоҳдан қайтишгач, Дилором опа Қибрайга бориши лозимлигини айтди.
— Унгача ўзим помидор, бодринг етиштиришга киришгандим, Қибрайга бориб-келгач эса таваккал қилиб, қўзиқорин экишга киришдим, — дея эслайди Дилором опа. — Шукрки, бу орада дадамиз ҳам оёққа турдилар, болаларимиз улғайиб қолди, ҳаммамиз бир ёқадан бош чиқариб, иш бошладик. Хуллас, 2002 йилдан буён "вешенка" навли қўзиқорин етиштирамиз.
Суҳбат асносида қўзиқоринлар ёриб чиққан оқиш "ғўлачалар"га ҳайратланиб қараётганимизни сезган Норқул ака суҳбатимизга қўшилади:
— Булар елим халталарга жойланган шелуха. Уруғ қадашдан аввал шелухани қайнатамиз, буни "стериллаш", деб атаймиз. Кейин уни совитиб, қўзиқорин уруғи аралаштириб, елим халталарга жойлаймиз. Қопчанинг икки тарафи ҳам очиқ бўлиши керак, ичидаги тўкилиб кетмаслиги учун эса уруғ аралаштирилган шелуха яхшилаб "прессланади".
"Вешенка"нинг нозик жиҳати — у намликни талаб қилади. Шу боис, хонадон эгалари ҳовлида ер остидан сув тортувчи насос ўрнатишган. Қишда эса табиий газ босими пастлиги боис ҳамма "ғўлачалар"ни битта иссиқхонага, бир-бирига яқин ҳолда устма-уст теришаркан. Ҳаво исигач, улар учта иссиқхонага тенг тақсимланади.
Жорий йилда миришкор оила "шампиньон" навли қўзиқорин етиштиришни синаб кўрмоқда. Ёғоч қутидаги маҳаллий ўғитга омихта тупроққа экилган "шампиньон" уруғи аллачақон оппоқ қалпоқчалар кўринишида кўкариб чиқиб, "майдон" юзини қоплаган.
— Вилоятимизда ҳали ҳеч ким "шампиньон" етиштирмаган, биз биринчимиз, — дейди Норқул ака. — Меҳнатидан чўчимасангиз, "вешенка"нинг ҳам даромади бор, шунинг кетидан уч фарзандимизни ўқитдик. Ҳозир қизимиз Зарина Навоий шаҳридаги 1-мактабда ўқитувчи, катта ўғлимиз Азизжон Зарафшонда, Навоий кон-металлургия комбинатига қарашли заводда ишлайди, Ботиржон ҳам Навоий давлат кончилик институтини тамомлади.
Ҳа, халқимиз "қаловини топсанг, қор ҳам ёнади" ёки "иш билганга минг танга" нақлларини бежизга айтмаган. Норқул ака ва Дилором опалар қисматдан бахт яратишди, улар тақдирнинг оғир синовига дош бериб, иқболга эришди. Бугун "Оқ олтин" маҳалласида бу оилага ҳамма ҳавас қилади.
Қаҳрамонларимиз билан хайрлашарканмиз, улар вилоятимизда мева-сабзавотларни қайта ишловчи ва консерваловчи корхоналар кўпайишини орзу қилишларини айтишди. Чунки бугунги кунда шахсий томорқаларда етиштирилиб, бозорга чиқарилаётган қишлоқ хўжалиги маҳсулотларининг асосий қисми харидорларга учинчи шахслар, яъни олиб-сотарлар томонидан етказиб берилмоқда. Бундан маҳсулот етиштирувчи ва харидорнинг чўнтагига муайян зарар етмоқда, шубҳасиз.
Яна шуни айтиш жоизки, мамлакатимизда қишлоқ хўжалиги маҳсулотларини қайта ишлаш бўйича фаолият юритувчи тадбиркорлар учун имтиёзлар ҳам мавжуд. Жумладан, давлатимиз раҳбарининг яқинда эълон қилинган "Мева-сабзавот, картошка ва полиз маҳсулотларини харид қилиш ва улардан фойдаланиш тизимини такомиллаштириш чора-тадбирлари тўғрисида"ги қарорига мувофиқ мева-сабзавот, картошка, полиз маҳсулотлари ва узумни қайта ишлайдиган хусусий корхоналар 2019 йилнинг 1 январигача замонавий ускуна ҳамда технологиялар олиб киришда божхона тўловидан ва бир қатор солиқлардан озод этилди. Бу Норқул ака ва Дилором опалар таъкидлаган орзунинг амалга ошишига замин бўлади, албатта.
Холбиби САФАРОВА.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а