"Народное слово" газетаси таҳририяти томонидан ўтказилган ижтимоий сўровномада иштирокчиларнинг 52,2 фоизи жамиятда маънавий муҳитнинг шаклланишида маҳалла оиладан кейин энг катта таъсир кучига эгалигини таъкидлашган.

Дарҳақиқат, бугун ма­ҳал­ла фуқаролик жамиятининг муҳим бўғини сифатида том маънода ҳудуд осо­йиш­­­та­лигини сақлаш, аҳо­ли бандлигини таъмин­лаш, маъ­навий муҳит барқарорлигини асраш, иж­ти­­­моий му­ҳофаза, ёшларнинг азалий қадриятлар ру­ҳида ка­мол топиши каби ўта долзарб масалалар ечи­мида ўз салоҳиятини муносиб намоён этмоқда. Йиғинлар қо­шида фаолият кўрсатаётган доимий ко­миссиялар аъзоларининг фидойи меҳнати, айниқса, таҳсинга лойиқ. "Яраштириш комиссиялари" эса оила­лар мус­таҳкамлигини таъминлаш, аҳоли ўрта­сидаги ҳам­жи­ҳатлик ва бирдамликни кучайтириш омили бў­лаётир.

Фуқароларнинг ўзини ўзи бошқариш органлари ҳу­­зуридаги яраштириш комиссиялари Ўзбекистон Рес­публикасини ижтимоий-иқтисодий ривожлан­ти­риш, мамлакатимизда соғлом авлодни тарбиялашга муносиб ҳисса қўшиш, фуқароларнинг маҳаллада ва оила­да тинч-осойишта ҳамда ҳамжиҳатликда яшаш­ларини таъминлаш, оилавий келишмовчиликларни тинч йўл билан ҳал этиш, соғлом турмуш тарзини кенг тарғиб қилиш мақсадида ташкил этилган. Фу­қа­­­­ро­­­­­лар йиғинлари ҳузурида бундай комиссиялар­нинг фаолият кўрсатаётганига ўн беш йил бўлаяпти. Ўт­­ган вақт мобайнида яраштириш комиссиялари ма­ҳал­ла­дошлар ўртасида нафақат муросага чор­лов­чи, балки ҳудуддаги ибратли жиҳатларни оммалаш­ти­рувчи, тўй-маъракаларнинг меъёрда ўтишига ҳисса қўшувчи, гиёҳвандлик ва ичкиликбозликка қарши ку­рашишга даъ­ват этувчи гуруҳ сифатида мавқе қо­зонди.

— Йиғинимиз ҳузуридаги Яраштириш комиссия­сига про­филактика нозири, ҳудудимиздаги Кармана са­ноат иқтисодиёт касб-ҳунар коллеж директорининг маънавият ва маърифат ишлари бўйича ўринбосари ҳамда намунали оилаларнинг бошлиқлари, "Жа­лойир" жоме масжи­ди­нинг имом-хатиби киритилган, — дейди Кармана ту­манидаги "Жалойир" қишлоқ фуқаролар йиғинига қарашли "Юқори буғ" маҳал­ла­­сининг диний маъ­ри­­фат ва маънавий ахлоқий ма­салалар бўйича мас­ла­ҳатчиси Умринисо Жўраева. — Комиссия аъзо­ла­ри биргаликда маҳалламизнинг тинч-осойишта, фу­қароларнинг ўзаро аҳил-иноқ бўлишига ҳисса қўшиб ке­лаяпти.

Жорий йилнинг 8 ойи мобайнида комиссияга фу­қаролардан 42 та мурожаат келиб тушган. Эр-хотин, қайнона-келин ёки ака-укалар ўртасидаги оилавий можаролар, қўшниларнинг келишмовчилиги каби ҳолатлар қайд этилган аризаларнинг ҳаммаси кўриб чиқилиб, тарафлар келишувига эришилгани маҳалла фаолларининг астойдил иш олиб бораётгани ифо­да­сидир. Фуқаролар йиғини раиси Ориф Бўронов бош­­чилик қилаётган комиссияга 11 нафар киши аъзо бўлиб, улар ҳар бир хонадонга чуқурроқ киришга, ҳар бир фуқаронинг кўнглига йўл топишга ҳаракат қи­­­­лишади. Комиссия аъзоларининг саъй-ҳаракати билан фуқаролар муносабатларидаги талай муам­мо­­­ларга чек қўйишга ҳамда тўй-маросимларни их­чам ва камхарж ўтказилишига эришилмоқда.

— Яраштириш комиссияси зиммасида низола­ши­ла­ётган мерос хусусида диёнатли йўл тутиш бурчи, бу борада судга ўз таклифини билдириш ҳуқуқи ҳам мавжуд, — дейди маҳалла оқсоқоли О. Бўронов. — Шу боис комиссия аъзолари ҳуқуқий саводхон, қо­­нунларни ҳурмат қиладиган бўлиши лозим. Шу­нингдек, комиссия ҳар бир аниқланган оила-турмуш муносабатлари доирасидаги жанжаллар бўйича қо­нуний чоралар кўрилишини таъминлайди. Шундан ке­либ чиқиб, маҳалламизда ҳуқуқий идоралар вакил­лари иштирокида турли маънавий-маърифий тад­бир­­­лар ташкил этаяпмиз. Маҳалла фаоллари учун таш­кил этилган ўқув курслари ҳам бу борадаги би­лим­­­­ларимизни оширишга ёрдам бераяпти.

Маҳаллалардаги Яраштириш комиссиялари жа­зони ижро этиш муассасаларидан озод этилган шахс­­­­­ларнинг уйга қайтгач, оиласи билан аввалги му­носабатини тиклаш, жамиятда яна ўз ўрнини то­пи­­шини назорат қилиш ва бу борада уларга ама­лий ёрдам кўрсатиш ваколатига ҳам эга. Жорий йил­да маҳаллада амнистия актига асосан озодликка чиққан икки нафар фуқаронинг ишга жойлашишига амалий ёрдам кўрсатилди. 

Холбиби САФАРОВА.