вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Маданий ҳаётимиз янада юксалади

02.06.2017 11:29:50

Халқимизнинг ўзига хос, кўтаринки руҳда ўтказиладиган байрамлари, анъаналари унинг маданияти юксаклигидан далолат беради. Уларда бўладиган миллий кийимларимиз намойиши, барча йўналишдаги ҳунармандчилик намуналари, буларнинг барча-барчаси бой меросимиз дурдоналаридир. Биргина вилоятимизда бўлиб ўтадиган ҳар бир тадбирда маданий меросимизни улуғлайдиган кўргазмалар намойиши ҳам соҳа ривожига қаратилаётган алоҳида эътибор туфайлидир.

Бироқ баъзи ечими топилмай келаётган камчиликлар ҳам борки, улардан кўз юмиб кетишнинг имкони йўқ. Вилоятимизнинг асосий дам олиш маркази ҳисобланган Алишер Навоий номидаги маданият ва истироҳат боғи талаб даражасида таъмирланмаган. Жумладан, болаларга мўлжалланган аттракционлар орасида эскилари мавжуд. Булар жажжиларимиз, уларнинг яқинлари кайфиятига салбий таъсир ўтказиши мумкин.

Қолаверса, дам олишга келувчилар учун қулай суҳбатгоҳлар, ўриндиқлар ҳам етарли даражада эмас. Тан олиш керак, ёз кунлари ёши катталар учун боғда дам олиш, ёшларга кўнгил очиш, болажонларнинг мавжуд аттракционларда ўйнаши анча ноқулайликларни туғдиради. Шу сабабли, уни бундан-да кўркам, сўлим, файзли, барча қулайликларга эга, замонавий кўринишдаги масканга айлантириш борасида амалий ишлар олиб борилаяпти.

Ўзбекистон Республикаси Президентининг куни кеча эълон қилган "Маданият ва санъат соҳасини янада ривожлантириш ва такомиллаштиришга доир чора-тадбирлар тўғрисида"ги қарори эса бу борадаги ишлар кўламини янада кенгайтириши, шубҳасиз. Ҳужжатда маданият ва санъат муассасалари, театрлар, музейлар, бадиий жамоалар, маданият ва аҳоли дам олиш масканлари, маданият ва истироҳат боғлари фаолияти, моддий-техник базаси ҳолатини атрофлича ўрганиш, уларни таъмирлаш ҳамда зарур жиҳозлар, мусиқа асбоблари билан таъминлаш, самарали ижодий фаолият учун қулай шарт-шароитлар яратиш айтиб ўтилган.

Кўриниб турибдики, бу орқали ҳар бир ҳудудда маданият, санъат борасида изчил ислоҳотларни амалга ошириш ва энг юксак натижаларни қўлга киритиш назарда тутилган. Ўйлаймизки, мазкур қарор ижросининг таъминланиши туфайли вилоятимизда яқин йилларда қурилиши режалаштирилаётган театр биноси, янги музейлар, маданият масканлари аҳолининг, халқнинг фаровон ҳаётига янгича мазмун олиб киради.

Ҳамдам МУҲИТДИНОВ,

вилоят маданият бошқармаси бошлиғи ўринбосари.

Манбаа: kun.uz