вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
09.06.2017 16:29:09
Илгари таҳририятимизга кредит ололмай, тижорат банкларининг эшиги остонасида неча кунлаб сарсон-саргардон бўлганликлари ҳақида фуқаролардан кўплаб мурожаатлар келарди. Аммо, яқин вақт ичида тезкорлик билан олиб борилган изчил ислоҳотлар уларнинг бу фикрини тамоман ўзгартириб юборди. Ҳозир аҳоли банк ходимларининг уйма-уй юриб, кредитлар ҳақида тушунча беришлари ва уни олиш жараёнида ҳеч қандай оворагарчиликларга йўл қўйилмаслигидан жуда мамнун.
Маълумки, Ўзбекистон Республикасини янада ривожлантириш бўйича Ҳаракатлар стратегиясида банк фаолиятини тартибга солишнинг замонавий принциплари ва механизмларини жорий этиш тизими қатъий белгилаб қўйилган. Бунинг натижасида бугун тижорат банклари томонидан аҳолига тадбиркорлик қилишлари, оилаларига қўшимча даромад келтиришлари учун бир неча турдаги имтиёзли кредитлар ажратиш кўлами янада кенгайди. Шу туфайли аҳолининг ишсизлик даражаси пасайиб, ҳудудларда ишбилармонлик муҳити яратилаяпти. Бу имтиёздан фойдаланиб, кимдир янги тикувхона очса, яна кимдир фойдаланилмай ётган бино ўрнида замонавий цех, устахона бунёд этаяпти. Аммо...
Шу ўринда масаланинг иккинчи томонига тўхталамиз. Ислоҳотлар изчил давом этаётган бир вақтда ҳукуматнинг юқоридаги каби ғамхўрлик, саъй-ҳаракатларини негадир бошқача қабул қилиб, ундан ўзларининг шахсий манфаатлари йўлида фойдаланаётган айрим фуқаролар банк масъул ходимларининг "юрагини бездириб" қўймоқда.
Яқинда ўзим хоҳламаган ҳолда икки кишининг суҳбати қулоғимга чалинди. Улардан бири кимдандир беш миллионга яқин қарзи борлиги, эгаси сўраб ҳеч қўймаётгани, уни тўлаш учун бирорта банкдан "тадбиркорлик қиламан", деб "бир амаллаб", имтиёзли кредит чиқармоқчилиги ва шу билан қарз берган одамнинг "оғзини ёпмоқчи"лигини айтиб қолди...
— Низомга кўра, олинган кредит мақсадли ишлатилиши керак. Фуқаро ундан мақсадсиз фойдаланса, шартнома шартларини қўпол равишда бузган ҳисобланади, — дейди "Ипотека банк" АТИБ вилоят филиали жисмоний шахсларнинг тадбиркорлик фаолиятини кредитлаш шуъбаси бош мутахассиси Иброҳим Ўлжаев. — Банк масъул ходимлари томонидан кредит беришдан олдин дастлабки монитор олиб борилади. Фуқаронинг кредит олишга ва уни тўлашга лаёқати ўрганилади. Бизда жорий йилнинг шу вақтигача 50 дан ортиқ мақсадсиз кредитлар аниқланди. Улар тегишли тартибда ўрганилиб, ҳуқуқни муҳофаза қилувчи органларга тақдим этилмоқда.
Банк мутахассисининг айтишича, асосан, иссиқхона ташкил этиш, паррандачилик ва асаларичилик билан шуғулланиш учун ажратилган кредитлардан мақсадсиз фойдаланиш ҳолатлари маълум бўлган. Улардан баъзиларини мисол келтирамиз: биринчи чоракда иссиқхона ташкил этмоқчилигини айтиб кредит олган фуқаронинг уйи белгиланган муддатда бориб текширилганда, ажратилган маблағ ҳисобига ҳеч қандай иссиқхона қурилмаган.
Яна бир фуқаро банк ходимларига мурожаат қилиб, уйида паррандачилик қилиш нияти борлигини маълум қилган. Аммо, ҳисоб палатаси кўрсатилган вақтда бориб ўрганганда, хонадон эгаси олдиндан уйида боқаётган товуқларини кўрсатган. Сабаби сўралганда, ҳовлида товуқ қилишга шароит қилолмаганини важ қилган. Ваҳоланки, кредит ажратилгунга қадар фуқаронинг уйида паррандачилик билан шуғулланишга имкони борлиги ҳақида нафақат ўзи, балки маҳалла ҳам тегишли ҳужжат тақдим этган.
Асаларичилик бўйича кредит олган фуқаро эса "Уйимда эплолмаганим учун қариндошимникида ташкил қилдим", деб уникида аввалдан мавжуд бўлган асалари қутиларига ишора қилган.
Бундан кўриниб турибдики, кредитлар шахсий манфаатлар учун ишлатилган. Айнан нимага сарф қилингани эса на сизга, на бизга ва на банк ходимларига аён. Ҳужжатлар эса кредит олувчи томонидан номигагина тайёрланган, холос.
Бугун имтиёзли кредилар ишнинг кўзини биладиганлар учун айни муддао бўлди. Уларнинг тадбиркорлик фаолиятидан ҳам ўзлари, ҳам жамият манфаат кўрмоқда. Бу ҳукуматнинг одилона сиёсати, ғамхўрлигига муносиб жавоб бўла олади. Бундан ташқари, аҳолининг фаровон ҳаёт, обод турмуш кечириш кўрсаткичи йилдан-йилга ўсаётгани ҳам инсон манфаатларини ҳимоя қилишга қаратилган ишларнинг жадаллашгани туфайлидир.
Банкни, жамиятни ёлғон сўзларига ишонтирмоқчи бўлганлар эса, аввало, ўзларини, давлатни алдайдилар. Унутмайлик, ёлғон аралашган ишда барака бўлмайди.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а