вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Коллеж ўқувчиси талаба бўлди

23.02.2015 16:35:20

Кармана саноат ва иқтисодиёт касб-ҳунар коллежининг 3-босқичида таҳсил олаётган Меҳринисо Холмуродова Тошкент шаҳрида Халқаро хорижий тиллар бўйича IELTS Тест Репорт Форумда қатнашиб, Хитойдаги университетлардан бирига грант асосида ўқишга қабул қилинди.

Меҳринисо ўқиб-ўрганишга астойдил меҳр қўйган. Беш йилдирки, у инглиз тилини мукаммал билишга ҳаракат қилади. Тинимсиз интилишлари, ўз устида ишлаши бесамар кетмади. У коллеж ўқувчиси бўла туриб, Осиё давлатларидаги истаган институтида ўқиш имкониятини қўлга киритди.

— Синовларда хорижлик мутахассислар биз билан мулоқот қилишди, — дейди Меҳринисо. — Физика-математика фанларини пухта ўзлаштириш ҳамда инглиз тилини ўрганиш йўлидаги меҳнатларим зое кетмади, имтиҳонларни қийинчиликсиз топширдим.Ҳозирда хитой ва испан тилларини ўрганаяпман. Мақсадим, халқаро даражада билим олиб, Ватаним равнақига муносиб ҳисса қўшадиган иқтисодчи бўлишдир. Насиб қилса, магистратура босқичини Англияда ўқимоқчиман, докторантурани эса Австралияда ўташни ният қилганман. Юртимизда биз ёшларга ана шундай имкониятлар яратилгани боис муҳтарам Юртбошимиздан миннатдорман.

Дарҳақиқат, ёшгина қизалоқнинг келажак ҳақида ишонч билан гапириши, ўз олдига улуғвор мақсадларни қўйиши диёримиздаги фаровонлик, эртанги кун ворисларига бўлганғамхўрликнинг натижасидир.

— Меҳринисо болалигидан жуда қатъиятли, — дейди унинг онаси Насиба опа. — Ўз олдига қўйган мақсадига етмагунча тинчимайди. У иккинчи курсдалигидаёқ Тест Репорт Форумда қатнашиб, талабаликка эришганди. Лекин шартнома асосида ўқишга қабул қилинганди. Буни рад қилиб, янада кўпроқ ўқиди, кечалари ухламай китоб титкилади. "Албатта грант асосида ўқийман!" деган ниятига етди.

Насиба опанинг айтишича, пойтахтга бориб, хорижий давлатларда ўқиш учун имтиҳон топшириш мумкинлигини ҳам Меҳринисонинг ўзи изланиб, билиб олган. Шундан сўнг инглиз тили фани ўқитувчиси Феруза Нажабовадан қўшимча машғулотлар олиб боришини илтимос қилиб, бутун борлиғи билан тил ўрганишга киришган.

Ҳа, вақтини тўғри тақсимлаган, ўткинчи нарсаларга фурсат сарфламаган киши ҳаммасига улгуради. Табиий фанларни ўзлаштириш билан бирга тил билишга-да ишқибоз қиз ҳар куни сузиш ҳавзасига ҳам қатнайди.

— Бу спорт тури руҳни тетиклаштириб, фикрни тиниқлаштиради, — дейди у таъкидлаб.

Меҳринисо каби интеллектуал билимдон, истеъдодли ёшлар юртимиз келажаги ишончли қўлларда эканлигидан далолатдир.

Холбиби САФАРОВА.

Сурат муаллифи Сирож АСЛОНОВ.