вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Китоб — маънавият кўзгуси

04.12.2014 17:08:46

Илк маънавий жиҳатларни биз китобдан оламиз ва унинг ёрдамида ақл-заковатимизни, билим ва кўникмаларимизни ошириб борамиз. Шу боис китобни севиш, уни мутолаа қилиш ҳамма вақт инсоннинг ўзлигини англашида муҳим ҳисобланган.

Вилоят маънавият тарғибот бўлими томонидан ноябрь ойи "Китобхонлик ойлиги" деб эълон қилинди ва бундан мақсад ўқувчи ёшлар ўртасида китобхонликни кенг тарғиб этиш, уларнинг мутолаага бўлган қизиқишини янада ошириш ва рағбатлантиришга қаратилди. Чунки китоб инсоният фикр дурдоналарини тўплаб авлодларга етказувчи восита, одамзод яратган мўъжизалардан бири ҳисобланади. У инсон қалбини ёритади, билимларини оширади. Шунинг учун ҳам ўсиб келаётган ёш авлод қалбида китобга бўлган меҳр-муҳаббатни уйғотиш ҳар биримиз учун ҳам фарз, ҳам қарз ҳисобланади.

Ойлик давомида жойларда кўплаб тадбирлар ташкил қилинди. Жумладан, Конимех туманидаги ахборот-ресурс марказининг ўқув залида "Китоб — маънавият йўлбошчиси" мавзусида давра суҳбати ўтказилди. Унда ёшларни турли ахборот хуружларидан сақлаш, сиёсий-ҳуқуқий дунёқарашини ҳамда маънавий-ахлоқий тарбиясини янада юксалтириш, китобхонликни оммалаштириш, бўш вақтларини мазмунли ташкил этиш, жиноятчилик ва ҳуқуқбузарликларнинг олдини олишда жамоатчилик билан ҳамкорликни кучайтириш масалаларига эътибор қаратилди.

Шунингдек, Учқудуқ туман маънавият тарғибот бўлими томонидан тумандаги 7, 9, 10, 20-умумтаълим мактабларида мазкур санага бағишланган тадбирлар ўтказилди. Жараёнда бўлим раҳбари М. Фармонова томонидан юртимизда ёшларга бўлган эътибор, олиб борилаётган ислоҳотлар, яратиб берилаётган шарт-шароитлар ёшларимизнинг ақл-заковати ва интеллектини оширишга қаратилганлиги, халқимизга хос анъаналар ҳақида ўз фикр-мулоҳазаларини билдириб ўтди. Бундай тадбирлар Кармана туман маънавият тарғибот бўлими томонидан ҳам ўтказилди. Томди туманида эса "Томди-Сако" МЧЖ томонидан матбуот тарғибот шохобчаси ташкил этилди ва китобхонларга керакли адабиётларни етказиб беришда амалий саъй-ҳаракатлар бажарилди. Китобхонлик ойлиги вилоятимизнинг Қизилтепа, Хатирчи ва Нурота туманларида давом этмоқда.

Ёшларимизнинг китобга бўлган меҳр-муҳаббатини маънавий-маърифий кечаларни ўтказиш орқали амалга оширадиган бўлсак, кўзлаган мақсадимизга эриша оламиз. Ушбу тадбирлар орқали биз асарлардаги миллий қаҳрамонларимизнинг қатъиятини, жасоратини ва Ватанга садоқатини ёшларимиз қалбига сингдира олсак, бу ҳозирги глобаллашув жараёнларидаги маънавий таҳдидларга, "оммавий маданият"нинг салбий жиҳатларига қарши курашишда муҳим унсур бўлиб хизмат қилади.

Малоҳат МАНСУРОВА,

вилоят маънавият тарғибот бўлими мутахассиси.