вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

"Китоб акцияси"

17.06.2017 14:34:12

Навоий вилоятининг олис ҳудудларидаги маҳаллаларда "Китоб акцияси" тадбирлари уюштирилди. Маърифат кунлари давомида маҳалла кутубхоналарига 42 номдаги 4 минг 113 дона бадиий китоб тақдим этилди.

Ўзбекистон Республикаси Президенти Шавкат Мирзиёевнинг жорий йил 12 январдаги "Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида"ги Фармойиши ижроси доирасида Ўзбекистон Ёзувчилар уюшмаси ҳамда Хотин-қизлар қўмитаси ҳамкорлигида ташкил этилган "Китоб акцияси" вилоят аҳли томонидан катта қизиқиш ва иштиёқ билан кутиб олинди. Маънавият тадбири дастлаб Навбаҳор туманидаги 14-умумтаълим мактабида бошланди. Туманнинг Янгиқўрғон қишлоғидаги ушбу мактабда айни пайтда 600 нафардан зиёд ўғил-қиз таҳсил олмоқда. Мактаб истиқлол йилларида қайта таъмирланиб, илм даргоҳининг кутубхона фонди янада бойитилди. Маҳалла аҳли, таниқли ижодкорлар иштирокида Ўзбекистон Ёзувчилар уюшмаси томонидан тақдим этилган 278 дона бадиий китоб ушбу мактаб кутубхонасидан жой олди.

Тадбирда вилоят ҳокими ўринбосари Фахриддин Солиев ва бошқалар мамлакатимизда аҳоли, айниқса, ёшлар ўртасида китобхонликни кенг тарғиб этиш халқимизнинг маънавий онгини юксалтириш, барча ислоҳотларни теран англашида муҳим омил бўлаётганини алоҳида таъкидлади. Хусусан, мазкур "Китоб акцияси" ҳамда "Адабиётга эътибор — келажакка, маънавиятга эътибор" шиори остидаги "Китоб байрами" фестиваллари бу борада ижобий самаралар бермоқда.

"Китоб акцияси" Учқудуқ туманининг "Айтим", Хатирчи туманидаги "Мустақиллик", Қизилтепа туманидаги "Оқработ", Навбаҳор туманидаги "Бешработ", Конимех туманидаги "Наврўз", Навоий шаҳридаги "Лочин", Кармана туманидаги "Деҳқон" маҳалласида ҳамда Томди туманидаги "Кериз" овул фуқаролар йиғинида ҳам бўлиб ўтди. Навоий шаҳридаги "Меҳрибонлик уйи"да "Болаларга беринг дунёни!" шиори остида ташкил этилган тадбирда 275 дона китоб муассаса кутубхонасига

топширилди.

— Одамийлик мулкининг хазинаси бўлган китобнинг бебаҳо бойлик эканлиги тарихдан маълум. Чунки биз Беруний, Ибн Сино, Ал-Фарғоний, Навоий, Бобур каби аждоди дунёга китоб қолдирган миллатнинг вакилимиз, — дейди "Меҳрибонлик уйи" директори Дилбар Орзиева. — Давлатимизга бизнинг фарзандларимизни ўйлаб, кўрсатган ғамхўрлиги учун чин дилдан миннатдорлик билдирамиз. Зеро, китоб ўқиган юрт фарзандлари ҳеч қачон ҳеч кимга қарам бўлмайди.

Дилбар ИСМАТУЛЛАЕВА,

НДПИ ҳузуридаги компьютер ва ахборот технологиялари академик лицейи ўқувчиси.

Манбаа: dustlikbayrogi.uz