вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
06.06.2017 13:20:02
Бугунги кунда мамлакатимизда 7 мингдан зиёд нодир тарихий ёдгорликлар ва муҳташам, бетакрор архитектура намуналари мавжуд. Она диёримизнинг сўлим қўриқхоналари ва миллий боғлари унинг бой ва ранг-баранг табиати дурдоналаридир. Юртимизда миллий маданият, санъат ва ҳунармандчиликнинг кўп асрлик анъаналари сайёҳларни доимо қизиқтириб келган. Жаннатмакон, гўзал диёримизнинг кўплаб ҳудудлари экотуризм учун жуда қулай ва ўзига хосдир.
Президентимизнинг 2016 йил 2 декабрдаги "Ўзбекистон Республикасининг туризм соҳасини жадал ривожлантиришни таъминлаш чора-тадбирлари тўғрисида"ги Фармони соҳани ислоҳ этишда янги босқичларни бошлаб берди. Қолаверса, Юртбошимизнинг вилоятимизга ташрифи давомида белгилаб берган вазифалар кўламида туризм ва экотуризмни ривожлантиришга алоҳида эътибор қаратилган. Ушбу ислоҳотларнинг бажарилиши юзасидан Ўзбекистон Республикаси Туризмни ривожлантириш давлат қўмитасининг Навоий вилояти ваколатли вакили Фарҳод Эрназаров билан суҳбатлашдик.
— Фарҳод ака, Ўзбекистон Республикаси Президенти Ш. Мирзиёевнинг 2017 йил 28 март куни Навоий вилоятига ташрифи давомида берилган топшириқлари ва кенгайтирилган тарзда ўтказилган мажлис баёнининг ижросини таъминлаш бўйича вилоятимизда қандай ишлар амалга оширилмоқда?
— Давлатимиз раҳбари вилоятимизга ташрифида туризмни ривожлантириш борасида аниқ, манзилли топшириқларни белгилаб берди. Бу борада кўзга кўринарли ишлар олиб борилмоқда. Хусусан, Туризмни ривожлантириш давлат қўмитаси Навоий вилоят ваколатли вакили томонидан видеороликлар ишлаб чиқилган бўлиб, унда вилоятимиздаги тарихий обидалар, дам олиш масканлари ёритилган. Роликлар ОАВ, шунингдек, республикадаги Туризмни ривожлантириш давлат қўмитаси орқали барча элчихоналарга етказилиб, сайёҳларни жалб қилиш бўйича ишлар олиб борилаяпти. Туризм тарғиботи бўйича лавҳалар Навоий шаҳридаги реклама таблоларда намойиш этиб келинмоқда. Бунда вилоят ҳокимлиги ўз ҳиссасини қўшиб келаяпти.
Хусусан, юқоридаги мажлис баёнининг 52-бандида кўрсатилган Қизилтепа туманидагиТўдакўл сув омборининг жанубий соҳилларида дам олиш инфратузилмаси объектлари учун ер ажратиш ва уларни яратиш лойиҳаларига тадбиркорларни жалб этиш мақсадида, Тўдакўл сув ҳавзаси тегишли мутахассислар иштирокида ўрганиб чиқилди. Ҳақиқатан ҳам сув ҳавзаси табиати, иқлими жиҳатдан жуда қулай бир муҳитда жойлашган. Бу ерда туризмнинг янги йўналишларини очиш учун жуда катта имкониятлар мавжуд, сув ҳавзасининг майдони 210 минг квадрат метрга тенг. Бу ерлар Қизилтепа туманидаги Қуйи-мозор сув узатиш иншоотига қарашли таъмирлаш ва созлаш бўлими (дам олиш зона)си билан НКМКнинг "Лазурная" дам олиш оромгоҳи оралиғида жойлашган бўлиб, вилоят ўрмон хўжалигига қарашли эканлиги аниқланди. Тўдакўл ҳудудида сайёҳлик фаолияти бўйича ўз ишини юритмоқчи бўлган "Спутник Навоий", "Трайдинг сервис", "Голдинг сафари" туристик фирмалари ҳақида вилоят ва туман ҳокимлигига билдирилди. Аммо бугунга қадар Қизилтепа туман ҳокимлиги томонидан ушбу масала бўйича бирон иш қилингани йўқ. Юқоридаги баённомада уч ой мобайнида аниқ манзилли таклифлар ишлаб чиқарилиши керак эди. Аммо шу пайтгача бу масала туман ҳокимлиги томонидан пайсалга солиб келинмоқда. Ҳолбуки, вилоят ҳокими ва вилоят ҳокими биринчи ўринбосари У. Раззоқовнинг бир неча бор оғзаки ва ёзма равишда Қизилтепа туман ҳокимлигига мурожаатига қарамасдан, ишлар секинлик билан олиб борилмоқда.
Мажлис баёнининг 53-бандида 2018 йилнинг 1 апрелига қадар Айдаркўлнинг вилоят ҳудудидаги қисмида тадбиркорлик субъектларини жалб қилиш, сайёҳларнинг балиқ ови билан шуғулланишлари учун алоҳида ҳудуд белгилаш ҳамда тегишли инфратузилмани яратиш чораларини кўриш вазифаси масъулларга топширилган эди. Ана шу мақсадда Нурота туман ҳокимининг қарори билан Айдаркўл атрофида туризм бўйича сайёҳлик ишларини амалга ошириш учун "Спутник Навоий" турфирмаси учун 1 гектар ер ажратилди. Айни кунда фирма томонидан ишлар жадал тусда олиб борилмоқда. Шунингдек, туман ҳокими қарори билан "Қизилқум сафари" ўтов лагери учун 3 гектар ер ажратилиб, кадастр ҳужжатлари расмийлаштирилган. Аммо фирма ўз фаолиятини тўлиқ ташкил этиши учун мазкур ҳудудга кириб бориш йўли ҳамда электр энергиясини олиб келиш муаммоси мавжуд. Сайёҳлик объектига "Qizilqumsement" АЖга қарашли объект орқали кириб борилади. Бу корхонага расмий хат билан ёрдам сўраб мурожаат қилинганида, ҳудуд уларга эмас, балки Конимех туман электр тармоқлари корхонасига тегишли эканлигини билдирган. Ўз навбатида туман электр корхонаси эса мазкур корхона электр токини вилоят электр тармоқлари томонидан топшириқ бўлса, кейин етказиб берамиз, деб ишнинг ортга сурилишига сабаб бўлмоқда.
— Юқоридаги топшириқларнинг бажарилишида қайси ташкилотлар сусткашликка йўл қўймоқда?
— Юқоридаги 55-баённомада ҳамкор ташкилотлар сафида Савдо-саноат палатаси вилоят ҳудудий бошқармаси ҳам бор. Лекин, афсуски, бу ташкилотнинг вилоят газета, журналларида ушбу топшириқ юзасидан тарғибот-ташвиқот олиб борганлиги юзасидан бирон-бир маълумотга эга эмасмиз.
— Баённомада вилоятдаги таъмирталаб аҳволга келиб қолган "Қосим Шайх", "Мавлоно Ориф Деггароний" ва "Работи Малик" маданий мерос объектларини таъмирлаш ва тиклаш ишларини жорий йилнинг 4-чорагида якунлаш белгиланган эди. Қурилиш ишлари якунига етай деб қолгандир?
— Ушбу маданий ёдгорликларни тармоқ жадвалига мувофиқ таъмирлаш ва тиклаш мақсадида ишчи гуруҳ тузилди. Гуруҳ томонидан объектлар ўрганилиб, уларнинг тиклаш-таъмирлаш ишларини бажариш учун қайта хатловдан ўтказилди. Объектлар ҳолати бўйича далолатномалар тузилиб, маданий мерос объектларини муҳофаза қилиш ва улардан фойдаланиш илмий ишлаб чиқариш бош бошқармасига тақдим этилди. Айни кунда смета ҳужжатлари тайёрланиб, зиёратгоҳларни таъмирлаш ишлари жадал суръатларда олиб борилмоқда.
— Экотуризмни ривожлантиришга ҳисса қўшмоқчи бўлган тадбиркорларни қўллаб-қувватлаш учун қандай ишлар олиб борилаяпти?
— Ўзбекистон Республикаси Вазирлар Маҳкамасининг 2017 йил 23 январдаги Навоий вилоятини ижтимоий-иқтисодий ривожлантириш ва аҳолининг турмуш даражасини янада яхшилашга доир қўшимча чора-тадбирлар дастури тўғрисидаги қарори ижроси юзасидан, Нурота туманида экотуризмни ривожлантириш мақсадида, хорижий сайёҳлар учун хизмат кўрсатадиган "RUSLAN EKO SERVISE" оилавий корхонаси ҳужжатлари расмийлаштирилиб, ишга туширилди. Бу ерда чет эллик сайёҳлар учун миллий таомларни "мастер класс" усулида тайёрлаш ҳамда Нурота қадимий каштачилигини намойиш этувчи расталар ташкил этилди. Нурота туманидаги Сентоб қишлоғида 2 та 30 ўринли миллий уй ва 1 та 25 ўринга мўлжалланган меҳмонхона қурилиб, фойдаланишга топширилиб, вилоятимизга келадиган сайёҳларни кутиб олмоқда. Шунингдек, "Қизилқум сафари" хусусий корхонаси учун Айдаркўлнинг Нурота тумани ҳудудидаги сайёҳлик базасини кенгайтириш учун ер ажратилган.
Ҳилола ИСМАТОВА суҳбатлашди.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а