вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
07.09.2015 10:27:18
Вилоятимизда замонавий техника ва илғор технологияларни жорий этиш орқали амалга оширилаётган истиқболли лойиҳалар туфайли тайёр маҳсулотларни ишлаб чиқариш ҳажми йилдан-йилга ошиб бораяпти. Хусусан, Президентимизнинг махсус фармони билан ташкил этилган "Навоий" эркин индустриал-иқтисодий зонасида сўнгги технологияларни жорий этиш борасида салмоқли ишлар амалга оширилди.
Йирик индустриал-иқтисодий салоҳияти ортиб бораётган воҳанинг Маликчўл ҳудудида ўтган давр мобайнида барпо этилиб, фойдаланишга топширилган 20 га яқин корхонада мингдан зиёд киши янги иш ўрни билан таъминланди. Айниқса, уларнинг аксарияти касб-ҳунар коллежлари битирувчилари эканлиги алоҳида эътирофга лойиқ. Шунингдек, фаолият кўрсатаётган корхоналар томонидан юксак технологиялар асосида модем ва телевизорлар учун приставкалар, юқори кучланишга чидамли кабеллар, иссиқлик ва сув иситиш қозонлари, мобил ва стационар телефон аппаратлари, тайёр дори воситалари ва бошқа турдаги маҳсулотлар ишлаб чиқариш йўлга қўйилди.
Қувонарлиси, йилдан-йилга янги корхоналар билан тўлиб бораётган "Навоий" эркин индустриал-иқтисодий зонасида Жанубий Корея, Хитой Халқ Республикаси, АҚШ, Германия, Италия, Ҳиндистон, Сингапур, Бирлашган Араб Амирликлари каби давлатлар иштирокида умумий қиймати 100 миллион доллардан зиёд инвестиция лойиҳалар бўйича ишлаб чиқариш корхоналари ишга туширилди.
Бугунги кунда мазкур ҳудудда биринчилардан бўлиб иш бошлаган корхоналар қаторида автомобиль саноати учун зарур эҳтиёт қисмлари ишлаб чиқараётган "UzEraeCable" Ўзбекистон-Жанубий Корея қўшма корхонаси яқинда ўзининг 5 йиллигини нишонлайди. Эътиборли жиҳати, 100 нафарга яқин йигит-қиз Корея, Италия каби ривожланган давлатлардан келтирилган юқори технологик ишлаб чиқариш ускуналарини бошқариб келмоқда. Улар томонидан ишлаб чиқарилаётган 39 турдаги автомобиль кабеллари халқаро стандарт талабларига тўлиқ жавоб беради. Жорий йилнинг ўтган даври мобайнида 57 минг 913 километр автомобиль симлари ишлаб чиқарилди, режа эса 102 фоизга уддаланди.
Дарвоқе, ўтган йили модернизация тадбирлари боис, Жанубий Кореядан 272 минг АҚШ долларига келтирилган технология асосида "Cobаlt" русумли автомашиналар учун аккумулятор жгутлари тайёрланмоқда.
— Муҳтарам Президентимиз ҳар доим ўз чиқишларида биздан, четдан фақат замонавий ҳамда юқори технологик ишлаб чиқариш техникаларини келтиришимиз кераклигини алоҳида таъкидлайди, — дейди қўшма корхона бош директори Шерзод Умаров. — Шунинг учун ҳам корхонамиздаги ишлаб чиқариш жараёни юқори технологик ускуналар билан жиҳозланган. Бу эса бизга халқаро бозорга рақобатбардош маҳсулотлар ишлаб чиқариш имконини бераяпти. Асосий ҳамкоримиз Жанубий Корея давлати бўлса, Осиё қитъасидан Вьетнам, Хитой мамлакатлари, Европадан Италия, Польша, Германия ва Россия давлатлари ҳамда Лотин Америкасидан Бразилия давлатлари билан яқин иқтисодий алоқа боғлаганмиз. Келажакда маҳсулотларимиз билан Корея ва Россия бозорларига чиқишни режалаштирмоқдамиз.
Қўшма корхона автомобиллар учун турли хилдаги изоляцияланган электр симлар, аккумулятор кабеллари ишлаб чиқариш билан бирга, жорий йилдан бошлаб монтаж ишлари учун ишлатиладиган 4 турдаги ва уй электр жиҳозлари учун 2 турдаги кабелларни ишлаб чиқаришни ўзлаштирди. 2015 йилда ҳам янги турдаги автомобиль эҳтиёт қисмлари ва халқ истеъмоли молларини ишлаб чиқариш кўзда тутилган.
Демак, юқори суръатлар билан ишлаётган мазкур корхонада маҳсулот тури ва сифати йилдан-йилга ошмоқда. Айниқса, малакали ёш мутахассислардан ташкил топган жамоада янгиликка интилиш, илмий-технологик изланиш ишлари давом этаётир. Мазкур жараён тараққиётнинг янги босқичлари сари дадил қадам ташлашга замин бўлмоқда.
Азамат ЗАРИПОВ.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а