вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
28.02.2017 15:14:53
Инсон ҳаётининг илму фанга бахшида бўлганидан мазмунлироқ умр бўлмаса керак. Чунки минглаб юракларга зиё улашиб, элу юртга наф келтиришнинг ўзи бахт. Юнус ака бугун ана шундай некбинликка эришган, юзлаб шогирдлари даврасида меҳнати мевасидан завқланади. Чунки умрнинг ҳар бир кунидан, дақиқасидан самарали фойдаланиб, муайян натижаларни қўлга кирита олди.
Юнус Норов 1957 йил 27 февраль куни Бухоро вилояти, Жондор тумани, Оғар қишлоғида туғилган. Ўрта мактабни битириб, Абу Райҳон Беруний номидаги Тошкент политехника институтининг (ТошПИ) "Фойдали қазилма конларини ер ости усулида қазиб олиш технологияси ва комплекс механизацияси" мутахассислигини муваффақиятли тугатди.
1983-1986 йилларда Москвадаги А.А.Скочинский номидаги кончилик илмий-тадқиқот институти аспирантурасида ўқиб, "Кончиликнинг физик жараёнлари" ихтисослиги бўйича номзодлик диссертациясини ҳимоя қилди.
1986-1992 йилларда "Ўрта Осиё махсус қурилиш" трестига қарашли 5-Бухоро бошқарма бош муҳандиси кейин эса "Сифат" илмий ишлаб чиқариш корхонасининг директори вазифаларида ишлади. Етук олим иш билан чекланиб қолмади. Чунки олган билим ва кўникмалари уни илмий изланишлар олиб боришга ундар, маҳоратини фанга бахшида этишни истарди. 1995 йил Ўзбекистон Республикаси Олий ва ўрта махсус таълим вазирлигининг йўлланмасига асосан янги ташкил этилган Навоий давлат кончилик институтининг "Кончилик ишлари" кафедрасида доцент лавозимига тайинлангани айни муддао бўлди. Талабаларга ўзи эгаллаган билимларни ўргатди, кўплаб шогирдларга зиё нурини улашди. Бошқарувчилик қобилияти, ғайрат ва шижоати сабабли, Навоий давлат кончилик институти кончилик факультети декани, кейинчалик илмий ишлар бўйича проректори вазифаларида меҳнат қилди, юзлаб шогирдлар етиштирди, умрини ишга, илму фанга, талабаларга бахшида этиб келди.
Астойдил қилинган меҳнат ўз самарасини бермай қўймайди. Доимий изланишда бўлган Юнус Норовнинг ҳаётидаги унутилмас воқеалардан бири, докторлик диссертациясини ҳимоя қилганидир. Унга 2007 йилнинг 29 ноябрида Ўзбекистон Республикаси Вазирлар Маҳкамаси ҳузуридаги Олий аттестация комиссияси томонидан профессорлик унвони берилди.
Ю. Норов 2008-2012 йилларда Навоий кон-металлургия комбинати давлат корхонаси илмий-тадқиқот лабораторияси кончилик ишлари бўйича бошлиқ муовини, 2012 йилдан ҳозиргача мазкур давлат корхонасининг илмий-тадқиқот лабораторияси кончилик бюроси бошлиғи лавозимида ишлаб келмоқда.
Устознинг илмий-тадқиқот ишларининг асосий натижалари Навоий кон-металлургия комбинати Жерой-Сардара фосфорит кони "Ташкўра" карьерига, "Ўзбекистон темир йўллари" ДАТЙК Зиёдин кони "Гранит ва известняк" карьерлари, Орол денгизи Акваториясидаги "Предвосточная чинка" коллектори қурилиш объектлари, Қорақалпоғистон Республикасининг Қўнғирот туманидаги "Машанкўл-Судоречье" коллектори қурилиш объектлари, "Саноатконтехназорат" давлат инспекцияси, Навоий кон-металлургия комбинати "Средазспецстрой", "Ўзавтойўл" давлат концерни бурғилаш-портлатиш ишларига ихтисослаштирилган бошқармалари фаолиятларига жорий этилган бўлиб, мазкур соҳаларга катта миқдорда иқтисодий самарадорлик келтирган.
Жонкуяр олимнинг илмий-тадқиқот соҳаларидаги техник ечимлари, ихтиро ва патентлари 18 та муаллифлик гувоҳномалари билан ҳимояланган.
Юнус Норовнинг илмий-тадқиқот ишларининг натижалари ўқув жараёнида "Кончилик иши", "Кончилик электромеханикаси", бакалавриат таълим йўналишлари учун "Портлатиш-бурғилаш" ва "Портлатиш ва бурғилаш ишларида амалий ва лаборатория ишлари" номли ўқув қўлланмалари ҳамда "Фойдали қазилма конларини очиқ усулда қазиб олиш" ва "Фойдали қазилма конларини ер ости усулида қазиб олиш", магистратура мутахассисликлари бўйича "Портлатиш ишларини олиб бориш хавфсизлигининг янги технологиялари" курси бўйича ўқув дарсликлари чоп этилган бўлиб, бугунги кунда республика олий ўқув юртларида ўқув жараёнида кенг фойдаланилмоқда.
Профессор Юнус Норов 24 та монография, дарслик ва ўқув қўлланмалари, хориж ва республика илмий нашрларида 170 дан ортиқ илмий мақола ва тезислар, 100 га яқин илмий ва ўқув методик ишланмалар, 61 та муаллифлик гувоҳнома ва патентлар муаллифидир.
Моҳир педагог олим сифатида республикамиз илм-фанига малакали илмий кадрлар тайёрлашда ҳам фаол иштирок этиб келмоқда. Бевосита унинг раҳбарлигида 2 та фан доктори, 10 дан ортиқ фан номзодлари тайёрланди. Бугунги кунда Юнус Джумаевич раҳбарлиги остида 4 нафар илмий ходим докторлик диссертацияси устида илмий-тадқиқот олиб бормоқда.
Ҳозирги пайтда домла фан доктори илмий даражасини берувчи Ихтисослашган Кенгаш қошидаги илмий семинар раиси, "Ўзбекистон кончилик хабарномаси" республика илмий-техник ва ишлаб чиқариш журнали бош муҳаррири ҳисобланади.
Фидойи олим кончилик соҳасидаги илғор технологиялар, янгиликлар ва фан ютуқларини ёш авлодга ўргатиш мақсадида Навоий давлат кончилик институтида магистратура талабаларига илм сирларидан сабоқ бериб келмоқда.
Рустам ҚАРШИЕВ,
НДПИ кафедра мудири.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а