вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
05.11.2016 15:30:15
Истиқлол йилларида мамлакатимизда амалга оширилаётган изчил ислоҳотлар натижасида фуқароларнинг сайлов ҳуқуқини эркин амалга оширишни таъминловчи мустаҳкам қонуний асослар яратилди. Ўзбекистон Республикасининг сайлов қонунчилиги халқаро ҳуқуқнинг умумэътироф этилган қоида ва принципларига мос равишда шаклланиб, такомиллашиб бормоқда.
Сайловлар — кучли фуқаролик жамиятига эга бўлган демократик ҳуқуқий давлатнинг ажралмас белгиси, халқ хоҳиш-иродасининг эркин ифодаланиши, фуқароларнинг жамият ва давлат ишларини бошқаришда иштирок этишининг асосий шаклидир. Демократик сайлов тизими орқали фуқаролар ўзи муносиб билган шахсларни ҳокимият органларига сайлайди, уларга нисбатан ўз муносабатини билдиради ҳамда давлат бошқарувини амалга оширишда қатнашади.
Сайловга тайёргарлик кўриш ва уни ўтказишда участка сайлов комиссияларининг ўрни муҳим аҳамиятга эга. Қонунчилигимизга кўра, участка сайлов комиссияси округ сайлов комиссияси томонидан сайловга камида қирқ кун қолганида 5 — 19 нафар аъзодан, шу жумладан, раис, раис ўринбосари ва котибдан иборат таркибда тузилади.
Шунингдек, участка сайлов комиссияси участка бўйича сайловчилар рўйхатини тузади, сайловчиларни рўйхат билан таништиради, сайлов ўтказиладиган кун ва овоз бериладиган жой ҳақида аҳолини хабардор қилади, бинони овоз бериш учун тайёрлаб қўяди, сайлов куни ўз яшаш жойида бўлиш ва овоз беришда қатнашиш имконияти бўлмаган сайловчиларнинг муддатидан олдин овоз беришини ташкил этади. Шу билан бирга, участка сайлов комиссияси овозларни санаб чиқади, участка сайлов комиссияси сайловга тайёргарлик кўриш ҳамда овоз беришни уюштириш масалаларига доир ариза ва шикоятларни кўриб чиқиб, улар юзасидан қарорлар қабул қилади.
Қизилтепа туманидаги 3-болалар мусиқа ва санъат мактабида жойлашган 103-сайлов участкаси намунали тарзда ташкил этилган. Бино фойесида сайловга неча кун қолгани, участка сайлов комиссияси аъзолари таркиби ва улар томонидан амалга оширилаётган ишлар ҳақидаги маълумотлар ҳамда Ўзбекистон Республикасининг сайловга оид қонунларидан кўчирмалар, шунингдек, сайлов участкаси қамраб олган ҳудуд харитаси билан танишиш мумкин. "Она ва бола" ҳамда тиббиёт хоналари ҳам талаб даражасида ташкил этилган.
— Комиссиямиз таркиби 11 кишидан иборат, — дейди участка сайлов комиссияси раиси Насриддин Турдиев. — Уларнинг аксарияти, жумладан, ўзим ҳам ўтган сайловда участка сайлов комиссияси аъзоси бўлганмиз. Шу боис, ҳозирда ишларни ташкил этишда қийналмаяпмиз. Қолаверса, Марказий сайлов комиссияси томонидан ажратилган ҳуқуқий адабиёт ва қўлланмалар, интернетдаги "elections.uz" веб-сайти орқали сайловга оид билимларимизни ошириб, бўлажак муҳим сиёсий жараённи қонун доирасида, очиқлик ва ошкоралик, тенглик тамойиллари асосида ўтказамиз, албатта. Сайлов участкамизда ҳудуддаги 9 та кўчада истиқомат қилаётган сайловчилар овоз берадилар. Марказий сайлов комиссияси қарори билан тасдиқланган Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар Дастурига мувофиқ жорий йилнинг 19 ноябрига қадар участка сайлов комиссиялари сайловчилар рўйхатини тузиб, ҳамма танишиб чиқиши учун тақдим этиши лозим. Айни пайтда биз сайловчилар рўйхатини шакллантириш устида иш олиб бораяпмиз. Бунда ҳозирда чет элларда бўлган, бошқа ҳудудларда рўйхатда туриб, аслида бизнинг ҳудудда яшаётган ёки аксинча, бизда рўйхатда бўлиб, ўзи бу ерда яшамайдиган фуқароларга, шунингдек, юртимиздаги олий ўқув юртларида таҳсил олаётган талабаларга алоҳида эътибор қаратаяпмиз.
Дарҳақиқат, Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар Дастурида истисно тариқасида сайловчилар рўйхатини 2 декабргача тузиш мумкинлиги қайд этилган. Бунда айнан юқорида суҳбатдошимиз таъкидлаган ҳолатлар назарда тутилган бўлиб, масалан, айни пайтда чет давлатларда ишлаётган айрим юртдошларимиз сайловга қадар уйга қайтиши мумкин.Ўзбекистон Республикаси Олий ва ўрта махсус таълим вазирининг буйруғига асосан эса олий ўқув юртлари талабаларининг вақтинчалик рўйхатда турган жойида эмас, доимий яшайдиган манзилида сайловда иштирок этиши учун уларга қўшимча таътил берилиши кўзда тутилган.
Н. Турдиевнинг айтишича, 103-сайлов участкаси қамраб олган ҳудуддан ҳозир 117 киши турли сабаблар билан хорижда, 30 нафар йигит-қиз Навоий, Тошкент, Самарқанд ва бошқа шаҳарлардаги олий ўқув юртларида таҳсил олмоқда. 24 нафар сайловчи беморлиги ва кексалиги туфайли овоз бериш жойига келолмаслиги мумкин. Сайлов участкасида бундай фуқаролар учун алоҳида бюллетенлар қутиси мавжуд бўлиб, сайлов куни комиссия аъзолари уларнинг уйларида овоз беришларини таъминлайдилар. 35 нафар биринчи марта овоз бераётган сайловчи учун эса участка сайлов комиссияси томонидан эсдалик совғалари тайёрлаб қўйилган.
Кармана туманидаги "Уйрот" маҳалла фуқаролар йиғинида жойлашган 69-сайлов участкасида сайловчиларнинг овоз бериши учун барча шароитлар муҳайё. Айни пайтда участка сайлов комиссияси аъзолари сайловчилар рўйхатини шакллантириш асносида ноқонуний тарзда чет элга кетган 41 нафар фуқарони имкон қадар сайловгача юртга қайтариш, фуқароларнинг ҳуқуқий саводхонлигини ошириш борасида иш олиб бормоқда.
— 5 нафар сайловчимиз оғир хасталиги ва кексалиги туфайли сайлов участкасига келолмайди, биз уларнинг ўз уйида овоз беришини ташкил қиламиз, — дейди участка сайлов комиссияси раиси Р. Кувиев. — Мамлакатимизнинг ҳамма қонунлари халқаро ҳуқуқ нормаларини ҳисобга олиш билан бирга, миллий қадриятларимиз ва халқимиз иродасидан келиб чиқиб яратилган. Сайлов куни ҳам биз менталитетимизга риоя қилган, ўзбек халқининг бағрикенглик ва саховатпешалик фазилатларини намоён қилган ҳолда ана шу сайловчиларнинг уйига ҳомийлар ҳисобидан олинган совғалар билан бормоқчимиз.
Кармана озиқ-овқат ва меҳмонхона хўжалиги касб-ҳунар коллежида жойлашган 73-сайлов участкасида ҳам овоз бериш кабиналари, бюллетен қутилари, "Она ва бола" ҳамда тиббиёт хоналари аллақачон шай қилиб қўйилган. Сайловчиларнинг сайловга оид қонунлар ҳамда участка сайлов комиссияси фаолиятидан бохабар бўлиши учун маълумотлар бурчаги ҳам талаб даражасида ташкил этилган.
— Ўтган сайловда халқаро кузатувчилар айнан бизнинг участкага келишганди, — дейди участка сайлов комиссияси раиси Муҳайё Норқулова. — Ўшанда ҳуқуқий билимдонлигимиз бир карра синовдан ўтганди ва шукрки, юзимиз ёруғ бўлганди. Бу йилги сайловни ҳам қонун доирасида ўтказишга, ишларимизни намунали ташкил этишга ҳаракат қилаяпмиз. Айни пайтда ҳудудимиздан четга кетганларни қайтариш ҳаракатидамиз. Бироқ сайлов куни айнан узоқ муддат бегона юртларда яшаб келган фуқароларга алоҳида эътибор қаратишимиз, бир сўз билан айтганда, жуда ҳушёр туришимиз, огоҳ бўлишимиз лозим.
4 декабрь куни халқимиз ўз хоҳиш-иродасининг ифодаси сифатида сайловда юртимиз келажаги учун овоз беради. Фаровон келажакни эса тинчлик-осойишталик таъминлайди.
Холбиби САФАРОВА.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а