вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Халқ қабулхоналари — нажот маскани

16.07.2017 15:26:19

Мамлакатимиз Президентининг 2016 йил 8 декабрдаги "Юридик ва жисмоний шахсларнинг мурожаатлари билан ишлаш тизимини тубдан такомиллаштириш чора-тадбирлари тўғрисида"ги Фармони халқ билан тўғридан тўғри мулоқот қилиш, унинг ҳуқуқ ва эркинликларини, қонуний манфаатларини ҳимоя қилишга йўналтирилган муҳим ҳужжат сифатида қабул қилинди. Фармоннинг ижросини таъминлаш мақсадида вилоят маркази ва туман, шаҳарларда Халқ қабулхоналари ташкил этилди.

— Халқнинг ичига кириб бориш, муаммоларини, таклифларини эшитиш мақсадида ташкил этилган Ўзбекистон Республикаси Президентининг Халқ қабулхонаси Учқудуқ туманида жорий йилнинг 6 мартида фаолият бошлади, — дейди қабулхона мудири Севгиддин Амонов. — Халқ билан мулоқот қилишда катта ҳаёт мактабини ўтаган, тажрибага эга тўрт нафар мутахассис фаолият юритмоқда. Фуқароларни қабул қилиш учун барча қулайлик ва шароитлар яратилган. Замон талабларига жавоб берадиган кутиш зали, оналар ва болалар, тиббиёт хонаси мурожаат қилувчилар хизматида. Жорий йилнинг 6 июль ҳолатига бизга маҳаллий аҳолидан 1209 та ариза ва шикоят келиб тушган. Мурожаатларнинг асосий қисми ишга жойлаштириш, соғлиқни сақлаш, банк кредитлари олиш, уй-жой коммунал, транспорт хизматлари, жойлардаги давлат органлари фаолиятига тааллуқли масалалардан иборат. Масалалар имконият даражасида жойида ҳал қилиниб, фуқаролар билан тушунтириш ишлари олиб борилаётир.

Учқудуқ саноат касб-ҳунар коллежи битирувчиси Елена Абдуллаева уч томонлама шартнома тузилган бўлишига қарамай НКМКнинг Шимолий кон бошқармаси кадрлар бўлимига бир неча марта мурожаат қилган. Лекин унинг шартнома шартларини бажарилиши тўғрисидаги талаби эътиборсиз қолдирилган. Халқ қабулхонасининг аралашуви билан Е. Абдуллаеванинг масаласи ижобий ечим топди.

— Ёшга доир пенсияга чиқаётганимда менинг 14 йиллик меҳнат стажимни инобатга олишмади. Натижада пенсиям миқдори 200 минг сўм атрофида чиқди. Иш стажимни тиклаш учун ваколатли идораларга қилган мурожаатларим жавобсиз қолаверди. Учқудуқда давлатимиз раҳбарининг қабулхонаси очилганлигини эшитиб, умид билан бордим, тинглашди. Масалам ижобий ҳал этилди, иш стажим тикланди, ҳозир 600 минг сўм атрофида пенсия олаяпман, — дейди фуқаро Нагиба Алибаева.

Халқ қабулхоналарининг очилиши фуқароларнинг ариза ва муаммоларга ечим топиш, камчиликларни бартараф этишда ишончли восита сифатида хизмат қилмоқда ва бу ўз самарасини бераётир.

Манбаа: dustlikbayrogi.uz