вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Гўзаллик ва спорт байрами

04.12.2014 17:19:41

Вилоятимизда нафосат ва гўзалликни ўзида жам қилган бадиий гимнастика бўйича кўплаб мусобақалар уюштирилиши ушбу спорт турига бўлган эътибор ва рағбатдан далолат беради. "Ёшлар" спорт мажмуасида бўлиб ўтган халқаро тоифадаги спорт устаси Анастасия Берестецкая хотирасига бағишланган IV халқаро турнирда юз нафардан ортиқ ёш гимнастикачи қизлар иқтидорларини намойиш этишди.

Унда Қорақалпоғистон Республикаси ҳамда мамлакатимиздаги барча вилоят спортчилари, шунингдек, Италия, Қозоғистон давлатлари вакиллари қатнашишди. Қизғин ва кўтаринки руҳда бошланган ҳар бир чиқишни мухлислар катта ҳаяжон билан олқишлаб туришди. Ёш гимнастикачиларнинг булава, арқон, тўп ва обручда бажарган машқларини халқаро тоифадаги ҳакам Севара Каримова ҳамда миллий тоифадаги ҳакам Ирина Бутко баҳолаб боришди. 2004-2007 йилларда туғилганлар ўртасида самарқандлик Асал Аҳмедова, Сабина Сафарбоева, бухоролик Ҳалимабону Азимова, Аида Ҳайдарова, Навоий шаҳридаги 4-БЎСМ ўқувчиси Моҳиситора Ҳусенова фахрли ўринларни қўлга киритишди. Шунингдек, спорт усталари баҳсида Бухоро вилояти вакили Зарина Нигматова 1-ўринни эгаллаган бўлса, кейинги ўринларни Фарангиз Шодиева ҳамда навоийлик Фарангиз Аҳмедовалар банд этишди. Италиялик Ванесса Вазелли, Қорақалпоғистон Республикасидан Амалия Пирматова, қозоғистонлик Амир Жанерке, Аружан Алпомишоваларнинг мусиқага мос эпчил ҳаракатлари мухлисларнинг алоҳида эътирофига сазовор бўлди.

— Бу хотира турнирининг ўтган галгисида ҳам қатнашгандим, — дейди италиялик 10 ёшли Ванесса Вазелли. — Ҳозир ҳам яхши тайёргарлик билан келдик. Навоий шаҳри менга жуда ёқди. Спорт мажмуаси кенг ва ёруғ, чиройли. Бу ерда дўстлар орттирдим. Кўтаринки кайфиятдалигим турнирда муваффақиятли қатнашишимда ёрдам берди. Кейинги мусобақаларда ҳам албатта Ўзбекистонга келиш ниятим бор.

— Тўрт йилдан буён бадиий гимнастика билан шуғулланаман, — дейди яна бир спортчи қиз, Нукус шаҳридаги 2-сонли болалар ва ўсмирлар спорт мактаби ўқувчиси Моҳинур Ражабова. — Мураббийим Нигора Полвонова билан саккизта қиз келганмиз бугун. Орзуим келажакда Анастасия Берестецкаяга ўхшаган кучли, машҳур гимнастикачи бўлиш.

Халқаро турнир якунида ғолиб ва совриндорлар диплом, медаль ҳамда эсдалик совғалари билан тақдирланди.

Зулфия БОБОЕВА.