вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
21.01.2015 14:55:52
Соат миллари тунги 02:00 ни кўрсатаяпти. Навоий шаҳри кўчаларида машиналар оқими аллақачон сийраклашган. Тунги навбатда иш қизғин кечаётган саноат корхоналари қаторида "Сагдиана нон" МЧЖ цехида ҳам ишчилар хамир қориш билан овора. Айни пайтда корхона томонидан кунига ўртача 15 минг дона нон халқимиз дастурхонига ва корхоналарга етказиб берилаяпти.
Цех ишчиси О. Гулмуродов хамир қориш ускунасига солинаётган сув миқдорини текшириб кўраркан, жараённи обдон кўздан кечирди. Ўтган йили коллежни тамомлаб, ушбу корхонада иш бошлаган Озодбек бугунги кунда маҳоратли новвойга айланган. Бир неча дақиқадан сўнг тоғора ичидаги тайёр хамир кран ёрдамида бўлакловчи ускунага ағдарилади. Зувала шаклига келтирилган ярим тайёр маҳсулот махсус лента аппаратида айлантирилиб, "етилтирилади". Шундан сўнг ишчилар кўригидан ўтган зувалалар қолипларга териб чиқилади. Иссиқ камерада маълум вақт турган хамир печкаларга жойлангач, бу ёғига жараён Ш. Облоев назоратига ўтади. Роппа-роса 40 дақиқадан сўнг Шуҳрат ака тайёр маҳсулотни печдан оларкан, нонлар тўғри савдо расталарига, корхона ишчилари ҳамда таълим муассасаларига жўнатилади. Бу пайтда эса ташқарида аллақачон кун ёришай деб қолган, супермаркетга нон харид қилиш учун келиб-кетаётганларга Гулбаҳор Мирзаева хушмуомала билан нон сотаётганди.
27 нафар ишчи-ходим меҳнат қилаётган МЧЖ ўтган 2014 йилда 226 миллион соф фойдага эришди. Навоий ва Зарафшон шаҳарларида фаолият юритаётган нон цехларида тайёрланаётган 5 турдаги маҳсулот бугунги кунда ўз харидорларига эга. Айни пайтда кунлик ишлаб чиқарилаётган маҳсулотнинг 30 фоизи корхона ва муассасаларга етказиб берилса, қолган нонлар бозорларга чиқарилади. Навоий шаҳрида МЧЖ 6 та савдо нуқтасига эга.
— Иш жараёнида тозаликка алоҳида эътибор қаратилади, — дейди биз билан суҳбатда МЧЖ ҳисобчиси Собир ака Тешаев. — Технологияларимиз Швеция ҳамда Германияники. Айрим ходимларимиз ҳам Европа тажрибасини ўрганиб келган. Қоплардаги ун тайёр нон ҳолатига келгунича бир неча босқичлардан ўтади. Ушбу жараёнларнинг белгиланган талаб ва қоидалари бор. Ана шулар маромида бажарилсагина, маҳсулот сифатли бўлади. Нонларимиз харидоргирлигининг асосий сабаби ҳам шу — замонавий технология ва ходимлар иш тажрибаси.
Собир аканинг айтишича, "Сагдиана нон"нинг қолипли нонларига фарқли равишда белгиланган миқдорда шакар, жазирама ёзда эса хамирнинг ачиш жараёнини секинлаштириш учун муз солинар экан. Маҳсулот кўримлилигининг ҳам ўзига хос сабаблари бор. Бу хамир қориш, зувалалаш, тайёр зувалаларни қолипларга жойлашда маълум меъёрлар билан боғлиқ.
Корхонадаги иш жараёнлари билан танишиб, ортга қайтарканмиз, "Лочин" маҳалла фуқаролар йиғини раиси Муҳаббат опа Эргашовага дуч келдик.
— Маҳалламиз ҳудудида фаолият юритаётган бир нечта нон цехлари халқимиз дастурхонига қолипли нон маҳсулотларини етказиб бераяпти, — дейди М. Эргашова. — Улар орасида "Сагдиана нон" алоҳида ўринга эга. Корхонанинг аксарият ходимлари айни шу маҳаллада истиқомат қилишади.
Хулоса ўрнида айтишимиз мумкинки, "Сагдиана нон" ўтган 5 йиллик фаолияти давомида аҳолига қолипли нон етказиб беришда вилоятимизда пешқадам корхоналардан бирига айланиб улгурди.
Суратда: цех ишчилари Малика Тожиева ва Фотима Жўраева.
Озод МУСТАФОЕВ.
Сурат муаллифи Сирож АСЛОНОВ.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а