вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
30.08.2016 12:46:53
Энг улуғ, энг азиз байрам арафасида ҳамиша гўзал ва бетакрор Нуротанинг Янгитурмуш қишлоғи Эргашевлар хонадони ўзгача байрам тусига кирди. Шу куни қутлуғ хонадоннинг табаррук соҳибасини юксак мукофот билан қутлагани барча яқин-йироқлари, меҳмонлар тўпланишди. Улар бир давра атрофида нафақат мақоламиз қаҳрамони гурунги ва босиб ўтган ибратли ҳаёт йўлидан, балки шукроналик руҳидаги хотиралари ҳамда узундан-узоқ дуоларидан баҳраманд бўлишди.
Шуни мамнуният билан таъкидлаш керакки, Мустақиллик шарофати билан инсон қадри эъзоз топди. Буни доимий равишда давлатимиз томонидан кўрсатилаётган эътибор ва рағбатдан ҳам билса бўлади. Ҳар йили муҳим саналар арафасида бир гуруҳ соҳа илғорлари қаторида юз билан юзлашган пиру бадавлат кексаларимиз ҳам турли мукофотлар билан тақдирланиб келинмоқда. Мустақиллигимизнинг қутлуғ йигирма беш йиллиги арафасида Нурота тумани, "Гум" ҚФЙда яшовчи 104 ёшли онахон Хурой момо Эргашеванинг "Шуҳрат" медали билан тақдирлангани фикримиз тасдиғидир.
Хушхабарнинг қаноти бор, дейишади. Чунки яхши гап ерда қолмайди, бир зумда тарқайди. Жумладан, муҳтарам Президентимиз Фармонига кўра, Хурой момо давлатимизнинг юксак мукофоти билан тақдирлангани ҳам эларо овоза бўлди. Бу янгилидан бутун янгитурмушликлар қалби чексиз ифтихорга тўлди. Ахир, қишлоқдан шундай қаҳрамон чиқса, фахрланмай бўладими?!
Шу ёшга етиш — олий бахт, ҳар бир инсон орзу-истаги, албатта. Негаки, бу табаррук ёш ҳар кимга ҳам насиб этавермайди. Албатта, бунинг ўз сир-синоати бор. Аслида, узоқ умр кўриш сири оддий. Ҳофизи олам куйлагандек, соғлик қадрин бил, хаста бўлмасдан бурун. Дунёда инсоннинг соғлиги энг олий неъматдир. Қизи Нортожи опанинг айтишича, бир гапириб, ўн чандон куладиган онахонни турли касалликлар четлаб ўтган бўлса, доим ҳаракатда бўлгани учун онажоним 104 ёшда ҳам жуда тетик.
Дарҳақиқат, турмуш ўртоғидан эрта ажралган онахон ўз умри давомида катта ҳаёт йўлини босиб ўтди. Барча ташвишларга чидаб, бутун борлиғини фарзандларига бағишлади.
Кеча-ю кундуз хўжаликда меҳнат қилиб, рўзғор тебратди. Ўғил-қизларини бировдан кам қилмай, камолга етказди. Йиллар ўтиб, бу залворли кунлар ҳам ортда қолди. Момонинг ўғил-қизлари ўз ўрнини топди.
Хурой момонинг кайвонилик фазилати қишлоқда эътибор қозонди. Халқнинг яхши-ёмон кунларида елкадош бўлиб, элга кўмакдош бўлди. Шу сабабли ҳам ҳамқишлоқлари уни Фармон биби даражасида улуғлашади. Доимий маслаҳатини олади.
Дарҳақиқат, 3 нафар фарзанди, бир этак невара-ю чеваралари ардоғида бугун бахтиёр умргузаронлик қилиб келаётган Хурой момо гурунгидан унга нисбатан ҳавас-у ҳайратимиз ортди. Не бахтки, шу ёшда ҳам ўзини олдирмай, аср билан юзлашган муҳтарама зотнинг ҳали-ҳамон жуда тетиклиги, равон тилдаги суҳбатлари, айниқса, шундай табаррук ёшда ҳам шариллатиб ўқиш-ёзиши ва оқ-қорани ажрата олишига қойил қолдик.
— Ризқу насибам бутун экан, шу ёшга етдим. Илоҳим, ҳаммага менинг ёшимни берсин! Аслида, бу бахтнинг сири — Истиқлол туфайли. Негаки, давлатим тинч — жоним тинч, ҳаётимиз фаровон — кўнглим нурафшон. Бу тўла-тўкислик менинг эртанги кунимга, яшашимга қанот беради. Илоҳим, мени шундай мукофотга лойиқ кўрган, аёл зотини ҳамиша бошида кўтарган ва халқимни ҳар қандай бало-қазолардан асраб келаётган Президентимга раҳмат!, — дейди фахр билан Хурой момо.
Ўтган якшанба куни Эргашевлар хонадони азиз меҳмонлар билан янада қўр олди. Табаррук инсонни юксак давлат мукофоти билан қутлаш учун кенг жамоатчилик ҳозиру нозир бўлишди. Ушбу маросимда вилоят ҳокими Э.Турдимов томонидан 104 ёшли онахон Хурой Эргашевага "Шуҳрат" медали ва қимматбаҳо совға-саломлар тантанали равишда топширилди.
Мароқли учрашувдан қалбимиз фахру ифтихорга тўлиб, ортимизга қайтдик….
Абдумажид ЖЎраев.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а