вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Дилларда Ватан мадҳи

31.08.2018 10:07:11

24 август куни Навоий шаҳридаги "Ёшлар спорт мажмуаси"да Ўзбекистон Республикаси мустақиллигининг 27 йиллиги муносабати билан ҳамда жойларда "Обод қишлоқ" дастурини амалга ошириш, кенг кўламли қурилиш ва ободонлаштириш ишларига кўмаклашиш мақсадида хайрия концерти бўлиб ўтди.

Тадбирга вилоятимиз марказидаги "Меҳрибонлик уйи" тарбияланувчилари, ҳуқуқ-тартибот органларида ҳисобда турувчи вояга етмаган ёшлар, кам таъминланган ва боқувчисини йўқотган оила фарзандлари бепул жалб этилди. Шунингдек, байрамона кечага туман ва шаҳарларимиздан санъатсевар йигит-қизлар, кекса отахону онахонлар ташриф буюрди.

Хайрия концертида Ўзбекистонда хизмат кўрсатган артистлар, "Ниҳол" давлат мукофоти совриндорлари ҳамда эстрада хонандалари, қолаверса, вилоятимиз санъаткорлари ўзларининг чиқишлари билан йиғилганларга кўтаринки кайфият улашди.

— Менга концерт жуда ёқди, — дейди Навоий шаҳридаги "Меҳрибонлик уйи" тарбияланувчиси С. Нуруллаева. — Айниқса, севимли хонандаларим Дилноза Исмияминова, Гули Асалхўжаева ва Илҳом Фармоновларнинг қўшиқларини мароқ билан тингладим. Келажакда улар сингари халқ севган санъаткор бўлишни орзу қиламан.

Элимизнинг кўнглига яқин бўлган дилрабо куй-қўшиқлар кўпчиликни рақсга чорлади. Юзларида дориламон кунларнинг шукронаси сезилиб турган нуронийларимизга эса, муқаддас Ватанни, истиқлолни мадҳ этувчи қўшиқлар манзур бўлди.

— Байрам ҳақида эшитиб, келиним, невараларим билан бирга келдим, — дейди навбаҳорлик О. Сафарова. — Қарилик чоғини ана шундай байрамларда, хуш-хурсандчиликда ўтказишнинг гашти ўзгача. Буларнинг барчаси тинчлик туфайлидир. Илоҳим, Яратган юртимизни ҳамиша қўллаб турсин, осуда кунларимизга кўз тегмасин.

Истиқлол шукуҳи диллардан-дилларга кўчиб, халқимизга кўтаринкилик ҳамда завқ-шавқ улашмоқда. Зеро, тинч юртга ана шундай байрамлар, тантаналар ярашади.