вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
11.05.2015 10:02:46
Дунёга келган инсон борки, бахтли ҳаёт кечиришни, фаровон турмуш қуришни истайди. Бу орзуга эришишнинг омиллари кўп албатта, лекин биринчи галда тинчлик-осойишталик керак.
Дарҳақиқат, осудалик ҳукмрон жойдагина ривожланиш, тараққиёт, бунёдкорлик ва ободлик бўлади, улуғвор мақсадлар, эзгу ниятлар рўёбга чиқади. Шукрки, биз ана шундай яшаш имконига эгамиз, юртимиз тинч, осмонимиз мусаффо.
Қишлоғимизда Иккинчи жаҳон уруши иштирокчиси Аллоф бобо Турсунов яшарди.Бирда у киши билан жанг хотиралари ҳақида суҳбатлашиб, мақола ёзгандим. Ўшанда отахон йиғламсираган ҳолда "бу кунларга етганлар бор, етмаганлар бор, не-не оғайниларим, биродарларим жанггоҳ оловларида ёниб, бомбалар портлашларида қолиб кетмади, ҳаётга тўймаган, яқинлари дийдорига интиқ кўзлари очиқ кетган аскарларнинг суврати ҳамон хаёлимда", дея таъкидлаганди.
Ҳа, суронли йилларда минглаб ўзбек йигитларидан қорахат келди, бедарак, ном-нишонсиз кетганлар бўлди. Муштипар оналар умрининг сўнгги дақиқасигача кўзи эшикда, фарзандини кутиб яшади, чимилдиқда тул қолган келинлар момо бўлганда ҳам жуфтининг қайтишидан умид узмасдан садоқат рамзига айланди, айтилмаган дил изҳорлари тимсоли — каштали рўмолчалар эгасига туҳфа этилмай, армонлар гувоҳи бўлиб, сандиқларда қолди.
Яқинда Ўзбекистон халқ шоири Иқбол Мирзонинг бир мақоласини ўқидим. Унинг ёзишича, бир журналист дўсти 15 йил аввал Германияга борганида "бедарак кетган" ўзбекларнинг ҳалок бўлган манзили ва санасини топибди. Одамни ларзага соладиган жойи шундаки, юзлаб аскарларнинг ҳалок бўлган кунлари уруш тугагандан кейинги июнь-июль ойларига тўғри келаркан. Демак, тақдир тақозоси билан асирга тушган ва фашистлар қиличидан омон қолган йигитларни шўро аскарлари концлагерларда оммавий қирғин қилишган.
Бу ростдан ҳам улкан армон эди, бу чиндан ҳам залворли алам эди. Бутун бир элнинг юрагига кўмилган армон, борлиғини кемирган алам. Шукрки, Яратган бу элга ана шу армонларга дош беришга қодир улкан сабр-қаноатни, тинчлик, деб аталмиш бебаҳо неъмат қадрига етиш ва уни асраб-авайлаш қудратини ҳамда фаровон турмуш барпо этиш мақсади йўлидаги ғайрат-шижоатни ато этди. Бугунги авлодга уруш йиллари хотиралари эртак бўлиб туюлади.
Кармана тумани, Ҳазора қишлоғида яшовчи Холбой ота ва Ўғилой аянинг тўрт қизи, икки ўғли бор эди. Кўпга келган тўй, билагида кучи, юрагида ўти бор ёш-ялангни домига тортаётган уруш ана шу икки ўғилни ҳам четлаб ўтмади. Ҳали йигирмага ҳам тўлмаган ака-укалар бир кунда фронтга кетишди. Уларнинг каттаси Холиқ ўзи кўнгил қўйган қизга унаштирилган, укаси Ёрқул эса ҳали севиб-севилишга улгурмаган, навқирон эди. Аввалига почтачининг йўлини пойлайдиган онаизорнинг кўнгли окопларда ёзилган номалардан тасалли-таскин топди, лекин кейинроқ ҳар иккала ўғилдан хат-хабар келмай қўйди. Уруш тугади, унда омон қолганлар яримжон бўлса-да, уйга қайтди, бироқ Ўғилой аянинг дилбандлари ном-нишонсиз эди.
— Онам бечора кўз юмгунча акаларимни кутди, умидини асло сўндирмади, — дейди бедарак кетган Холиқ ва Ёрқул Норовларнинг синглиси, айни пайтда Навоий шаҳрида яшовчи Қурбоной ая. — Узоқдан биров кўринса, акамлардан бирими, деб умид қилардик. Жон-жигарингнинг ҳаёт ёки ҳаёт эмаслигини билмаслик ёмон экан, ҳалок бўлганини кўрсанг, ер бағри совуқ, сен ҳам совийсан, аммо бедарак бўлса, кутаверар экансан, ҳали-ҳамон акаларим ҳақида бирор хабар чиқиб қолар, деб ўйлайвераман.
— Тошкентдаги Хотира майдонида Холиқ тоғам ва Ёрқул тоғамнинг ҳам исм-шарифлари битилган, — дея суҳбатимизга қўшилади уларнинг жияни Розия опа Давлатова. — Булар шунчаки ёзув эмас, тинчлик учун тикилган жонлар, тўкилган қонларнинг ёрқин далили. Фарзандларимга, невараларимга тоғаларим ҳақида айтиб бераман, токи улар осуда ҳаёт қадрини, ўз яқинларининг, жамики инсонларнинг қимматини англаб етишсин.
Айни пайтда Холбой отадан қолган ҳовлида унинг невараси, тўнғич қизининг ўғли Содиқ Давлатов ўз оиласи билан истиқомат қилмоқда. Эски иморатлар ўрнида янги уй-жойлар қад ростлаган. Аммо ака-укалар тишлаб кетган нон солинган халта ҳамон уй тўрида. Демак, йўлга интизор яқинлар кўнглида ҳануз "улар тирик, ризқ-насиба тортиб, албатта қайтишади", деган умид яшаяпти. Армонларин юрагига кўмган элнинг умидидир бу…
Холбиби САФАРОВА.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а