вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
25.09.2014 16:31:44
Болаларнинг соғлом ўсишини, уларнинг беғубор кулгисини кўриб яшаш аслида ҳар бир ота-онанинг катта бахти. Агар оилада биргина имконияти чекланган фарзанд вояга етаётган бўлса — бу ота-онанинг армонига айланиб, ўзини айбдор ҳис қилиб яшашга мажбур этади.
Баъзида гувоҳи бўлиб қоламиз. Сўзлаш, эшитиш нуқсони бўлган фарзандини мактабгача таълим муассасалари ёки мактабларга олиб борган ота-она баъзи бир қаршилик, эътирозларга дуч келади. Таълим муассасаси мутасаддиларининг баъзилари томонидан бу каби болаларни махсус мактаб ёки интернатларга олиб бориш тавсия қилинади. Аслида бу қанчалик тўғри?
Оилада бола тарбияси билан шуғулланувчи шахс деганда, албатта, "она" кўз олдимизга келади. Имконияти чекланган болаларни оилада тарбиялаш, камол топтириш мураккаб муаммолардан бири бўлиб, унда энг асосий тарбиячи — онадан юксак тарбия, кучли диққат-эътибор, ғамхўрлик, билим, хушмуомалалик ва энг асосийси, сабр-бардош талаб этилади. Бундан ташқари, улар соғлом ва ногирон болалар ривожланиши ҳақидаги физиологик билимларга эга бўлишлари, тиббиёт ходимлари ҳамда ўқитувчи-дефектологлар билан узвий алоқада бўлишлари шарт. Чунки махсус ташкил этилган коррекцион-педагогик ўқитиш усули оиланинг ёрдамисиз амалга ошмайди ва самара бермайди.
Интеграцион, инклюзив таълим жорий этилган мамлакатлар тажрибасидан маълумки, мазкур тизимда иккала томон алоҳида ёрдамга муҳтож, яъни жисмоний имконияти чекланган болалар ҳам, соғлом болалар ҳам ўзаро манфаатдор бўладилар. Жисмоний имконияти чекланган болалар умумтаълим мактабларида ўқир эканлар, ўзларини камситилган ҳолда ҳис қилмайдилар, улар шу жамоанинг тўлақонли аъзоси эканликларини англайдилар. Оқибатда ўзларини ҳурмат қилишлари, яшашга бўлган ишонч ва умидлари ортади. Соғлом болалар эса жамият ҳар хил тушунчалардан, турли дунёқарашдаги тенгдошларидан иборат эканлигига кўникадилар, ёрдамга муҳтож дўстларига кўмак бераётганлигидан мамнунлик туйғусини ҳис этадилар.
— Ота-оналар ҳар доим ҳам жисмоний имконияти чекланган фарзандларини махсус мактабларга олиб боришни хоҳлашмайди, — дейди Кармана туманидаги 25-ихтисослаштирилган махсус мактаб-интернат ўқитувчиси Гулнора Нуруллаева. — Фарзандларининг барча қатори оммавий мактабларда ўқишини исташади. Бироқ уларнинг умумтаълим мактабларига қабул қилинмаслиги, қабул қилинса-да, ўқитувчининг индивидуал ёндашмаслиги ёки тенгдошлари томонидан камситилиши натижасида болада мослашиш жараёни оғир кечади. Оқибатда бола мактабга боришдан, одамларга қўшилишдан бош тортади. Мана шундай вазиятнинг олдини олиш учун мактабларда дефектологлар, психолог-педагоглар хизмати доимий йўлга қўйилиши, бир сўз билан айтганда, умумтаълим мактабларида махсус интеграциялашган таълимга кўра қулайликларнинг яратилишига эътибор қаратиш лозим бўлади.
Навоий шаҳридаги 12-давлат ихтисослаштирилган умумтаълим мактабида икки нафар таянч ҳаракати аъзолари ва нутқида нуқсони бор ўқувчилар таҳсил олишади. Мактабда ушбу ўқувчилар учун алоҳида хона ҳам ажратилган. Шаҳзод Маҳмудов мактабнинг 7-синф ўқувчиси. Синф раҳбари Хумор Ҳусаинова унинг синфдошлари билан муносабати, фан ўқитувчилари бераётган топшириқларга масъулият билан ёндашиши ҳақида бизга сўзлаб берди:
— Мактабда шундай муҳит яратилганки, болалар ҳам, ўқитувчилар ҳам имконияти чекланган ўқувчиларга ёт қараш эмас, балки уларни тенг имкониятда билиб, ўзаро ёрдам ва дўстона муносабатда бўлишади. Ана шу муносабатнинг натижасида улар ўзларини эркин ҳис қилишади. Ўзаро мулоқотда мустақил фикрларини баён этиши саломатлиги борасида ҳам ижобий натижаларни беради.
Республикамиз таълим тизимида олиб борилаётган ислоҳотлар бежизга халқаро миқёсда эътироф этилаётгани йўқ. Жонкуяр устозлар кўмагида ҳаётда ўз ўрнини топаётган ҳар бир шахс жамиятнинг эртанги тараққиётига камарбастадир. Шундай экан, ҳуқуқий демократик давлат қуриш йўлидан бораётган жамиятимизда ҳар бир фуқаронинг тенг ҳуқуқлилигини таъминлаган ҳолда таълим-тарбия олишини англамоғимиз ва ижтимоий ҳамкорлик асосида ўз муносабатимизни билдириб бормоғимиз зарур.
Санжар ҚУРБОНОВ.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а