вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
12.07.2017 18:40:55
Президентимиз томонидан ишлаб чиқилган 2017-2021 йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегияси халқ ҳаётининг барча соҳаларида ислоҳотлар амалга оширилишини назарда тутгани билан аҳамиятлидир.
Жумладан, қишлоқ хўжалиги тизимида ҳам замонавий технологияларни жорий этиш, ердан унумли фойдаланиш, пировардида аҳоли турмуш даражасини яхшилаш мақсади ётади.
Давлатимиз раҳбари вилоятимизга қилган ташрифи чоғида ҳудудда қишлоқ хўжалик маҳсулотларини етиштиришни кўпайтириш ва уни қайта ишлашни кенгайтириш, натижада халқимизнинг турмуш даражасини янада оширишда муҳим аҳамият касб этишини таъкидлагандилар. Маълумотларга кўра, вилоятимизда жорий йилда янги интенсив боғ ва иссиқхоналар, музлатгичли омборхоналар ташкил этиш ҳисобига мева-сабзавот етиштириш ва уни қайта ишлаш, чорвачилик йўналишида истиқболли лойиҳалар амалга оширилади. Жаҳон банки ва Осиё тараққиёт банки кредит маблағлари ҳисобига бу борада 101 та лойиҳани ҳаётга тадбиқ этиш кўзда тутилмоқда. Бу билан жами 1 минг 300 нафарга яқин киши иш билан таъминланади.
— Бугунги кунда вилоятимизда сабзавот-полиз экиш учун 4436 гектар асосий майдон бор, — дейди биз билан суҳбатда вилоят қишлоқ ва сув хўжалиги бошқармаси мутахассиси Шавкат Бобомуродов. — Жорий йил полиз маҳсулотлари ҳамда карам, сабзи каби сабзавотларни экспорт қилишни кўзда тутганмиз. Шунингдек, 5,5 минг гектар мевали боғ мавжуд бўлса, уларнинг 1483 гектари интенсив боққа ўтказилган. Интенсив боғларнинг афзаллиги сувни тежайди. Оддий боғларда ниҳол тўрт-беш йилда ҳосилга кирса, интенсив боғда пакана ва ярим пакана дарахтларнинг ҳосилга кириши муддати икки йилни ташкил этади. Бундан ташқари, интенсив боғлар ҳосилдорлиги ҳам юқори бўлади. Президентимизнинг боғдорчиликни ривожлантириш ҳақидаги талабларидан келиб чиққан ҳолда жорий йил бошида 833 гектар интенсив боғ яратиш режалаштирилган. Унинг 600 гектари Нурота туманида барпо этилади.
Дарҳақиқат, Нурота табиатидан келиб чиққан ҳолда интенсив боғлар яратилиши учун қулай шароитга эга. Томчилатиб суғориш технологиясига мослаштирилган бу боғлар бир неча йилдирки, яхши натижа бериб келмоқда. Баҳорда яна 200 гектар ерда 1,5 миллиондан зиёд Хитой ёнғоғи, олма, бодом сингари асосан данакли дарахтлар кўчатлари ўтқазилди. Таъкидлаш жоизки, туманда 2017-2019 йилларда яна 13 минг 700 гектар майдонда интенсив боғ яратиш режалаштирилган. Унинг 10 минг гектарини бозордаги талаб ва эҳтиёжга қараб ёнғоқзорлар ташкил этади.
Ҳозирда Нуротада икки минг гектарга яқин гектар интенсив боғ мавжуд. Улар орасида майдони беш юз гектарга эга 2011 йилда ташкил топган "Нурота олтин боғлари" МЧЖ бир-биридан ширин, сархил мевалари билан ҳамиша харидорлар эътиборида. Бу "олтин" боғнинг 461 гектарига шафтоли, 30 гектарига ўрик, 5 гектарига олма ва қолганига қароли, гилос экилган.
— Боғимизда шафтолининг Грециядан келтирилган етти хил навдаги 365 минг дона кўчати бор, — дейди МЧЖ раҳбари Алижон Хидиров. — Ҳозирги кунгача шафтолидан 50-60 тонна ҳосил олдик. Ҳар йили Россияга шафтоли экспорт қиламиз. Бу йил ҳам икки минг тонна маҳсулотимизни четга чиқарамиз. 150 нафар мавсумий ишчиларимиз бор. Улар учун керакли шароитлар яратиб қўйилган. Шунингдек, ўтган йил Италиядан келтирилган технология асосида мевани қайта ишлайдиган заводни ишга туширгандик. Бу ерда ҳам саксон нафар киши иш билан таъминланди. Бугунги кунда кунига 450 тонна мевани қайта ишлаш қувватига эга бу заводда жем, шарбат тайёрланиб, уларни беш йилгача сақлаш имкони мавжуд. Келгуси йилларда боғ ҳудудини яна кенгайтириб, экспорт ҳажмини ошириш, янги иш ўринлари яратишни мақсад қилганмиз.
Мамлакатимизда қишлоқ хўжалиги соҳасида узумчиликни ривожлантириш, янги токзорлар барпо этишга ҳам алоҳида эътибор қаратилмоқда. Вилоятимизда 6,5 минг гектар токзор мавжуд.
Жорий йилда Хатирчи, Нурота, Қизилтепа туманларида 416 гектар, 2018 йилда эса419 гектар янги токзорлар барпо этиш кўзда тутилган. Асосан кишмишлари билан машҳур Хатирчи туманида 2789 гектар токзор бўлиб, шундан 76,2 гектари янгидан барпо этилган. 54,3 гектарига эски, ҳосилдорлиги камайиб кетгани учун бузилиб, янги кўчатлар ўтқазилди. Туман ҳудудидаги Акмал Икромов номли массив узумчиликка мослашган бўлиб, бу ерда 401 нафар фермер узум етиштириш билан машғул.
— Массивдаги токзорлар майдони 1358 гектардан иборат, — дейди "Мирзоҳид Камол Улуғбек Али" фермер хўжалиги раиси, туман кенгаши депутати Раҳимберди Боймуродов. — Токларнинг 95 фоизи қора, беш фоизи оқ кишмиш. ¤тган йил зараркунандалар сабаб, айниқса, узум учун хавфли бўлган оидум касаллиги сабаб ҳосилдорлик чўғи бирмунча паст бўлган эди. Бу йил эса касалланишга қарши ўз вақтида агротехник тадбирлар олиб бордик. Натижа кўнгилдагидек. Ҳар гектар ердан 80-90 центнергача ҳосил олишни чамалаб турибмиз. Узумчиликда "Бозор ота", "Боғибаланд тасмачи", "Худойқулов Исоқул боғбон", "Ишонч", "Абдулла ҳоким тойфичи" каби фермер хўжаликларнинг тажрибаси катта. Махсус ташкил этилган токзорларни суғоришда эскирган насослар алмаштирилиб, Франциядан келтирилган насос станциялари орқали сув етказиш режалаштирилган. Бу 2018 йил февралидан ишга тушади. Ҳозирда бу йирик лойиҳа асосида "Учқора" насос станциясида реконструкция ишлари жадал кетяпти. Янги насослар кўп миқдордаги сувни токзорларга етказиб бериши билан суғориш сифатини яхшилайди. Бу эса яна мўл ҳосил, соф даромад ошишига хизмат қилади.
Бир сўз билан айтганда, боғдорчиликни янада ривожлантириш, унга замонавий технологияларни жалб этган ҳолда сифатли ва жаҳон бозорида рақобатбардош маҳсулотлар етиштиришни йўлга қўйиш халқимиз фаровонлигига ҳисса қўшиши билан эътирофга лойиқ амаллардан бирига айланиб бормоқда.
Зулфия БОБОЕВА.
Манбаа: dustlikbayrogi.uz
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а