вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
08.10.2014 19:44:20
Спорт ёшларимиз ҳаётининг бир қисмига айланиши ҳар жиҳатдан фойдали. Айниқса, қўлга киритган ютуғингдан қувонсанг ва янги марралар сари ғайрат билан олға қадам ташласанг. Бундан яқинларинг фахру ғурур туйса. Шунда юрт байроғини баланд кўтармоқ олий мақсадингга айланиб бораверади. Навоий шаҳридаги 4-болалар ва ўсмирлар спорт мактабида дилида шундай улкан орзулар билан машғулотларга қатнаб, турли мусобақаларда ғолибликни қўлга киритиб келаётган йигит-қизлар кўп. Улардан бири бокснинг оғир вазн тоифасида кўплаб ютуқларга эришган спортчи йигит Достон Ўриновдир.
— Ёшларимиз орасида спортнинг бу тури билан шуғулланадиганлар кам учрайди, — дейди БЎСМ директори Шойим Хидиров. — Ҳозир эса бу спорт турига мактабимизда ҳам қизиқиш кучайиб бормоқда. Болаларнинг шуғулланиши учун бокс зали барча керакли спорт инвентарлари билан жиҳозланган. Достон каби ўқувчиларимизга ҳавас қилиб, бокс тўгарагига ёзиладиганлар ҳам борлиги қувонарли.
Достоннинг мусобақалардаги муваффақияти, доимо олдинга интилиши ундаги ирода, қатъийлик, спортга бўлган муҳаббатидан нишона. Қолаверса, оиласи ҳам уни ҳамиша қўллаб-қувватлаб келади.
— У ўзига нисбатан жуда талабчан йигит, — дейди мураббий Тўлқин Муҳамматов. — Машғулотларга тенгдошлари билан илк кела бошлаган пайтларида ундаги астойдил қизиқишни кўриб, хурсанд бўлганман. Айрим болалар қийинчиликларга чидагиси келмай кетиб ҳам қолишган. Достон эса мунтазам бокс залига келишни канда қилмасди. Ҳатто дарсдан бўш вақт орттириб, қўшимча машғулотларга ҳам қатнашга улгурарди.
Бу интилишлар бесамар кетмади. 2012 йил ўсмирлар ўртасида Чирчиқ шаҳрида ўтказилган бокс бўйича Ўзбекистон чемпионатида оғир вазнда фахрли 2-ўринни эгаллади ва Озарбайжонда бўлиб ўтадиган халқаро турнирда иштирок этиш ҳуқуқини қўлга киритди. Бу турнирда ҳам Достон бошқа давлат боксчиларидан қолишмаган ҳолда ўз маҳорати ва қобилиятини намоён этди.
— Бокс билан ўн ёшимдан буён шуғулланиб келаман, — дейди у биз билан суҳбатда. — Баъзан уйга жароҳат билан қайтганимда, онам боксга қатнашимга норози бўлиб қолардилар. Бу спорт турига меҳрим бўлакчалиги учун ҳам ортга қайтмадим. Ҳозир эришган ютуқларимдан ота-онамнинг ҳам юзлари ёруғ. Рингда турганимда, аввало, онамни эслайман. Менга ишонч билдириб турган яқинларим, устозларим, она шаҳрим кўз олдимдан ўтади. Бу менга таърифлаб бўлмас куч-ғайрат бергандай бўлади. Келажакда Артур Григорьян, Элшод Расуловлардек боксчи бўлишни орзу қиламан. Улар сингари юртим байроғини дунё майдонида мағрур ҳилпиратгим келади.
Дилига улкан орзуларни тугиб, Ватанимиз шаънини ҳимоя қилишга бел боғлаган спортчи йигитнинг эзгу ниятлари амалга ошишини чин дилдан истадик. Зеро, Достон сингари йигиту қизлар юртимизнинг чин маънодаги фахру ғурури, ишонч тоғидир.
М. МАРДОНОВА.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Ижарага бериладиган объектлар
Навоий вилоят Ҳудудий танлов комиссияси танлов эълон қилади!
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а