вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Асадбек — жаҳон чемпиони!

17.10.2016 16:20:09

Ҳали ёш бўлишига қарамай улкан мақсад билан спортнинг қўл жанги тури бўйича шуғулланиб келаётган Навоий шаҳридаги 7-умумтаълим мактабнинг 8-синф ўқувчиси 15 ёшли Асадбек Тошпўлатов ўзига билдирилган ишончни астойдил оқлади.

У 20-26 сентябрь кунлари Молдавия давлатида бўлиб ўтган дунёнинг 30 дан ортиқ мамлакатидан минг нафарга яқин спортчи қатнашган ёшлар ва ўсмирлар ўртасидаги жаҳон чемпионатида барча рақиблари устидан ғалаба қозониб, жаҳон чемпиони, деган номга сазовор бўлди.

— Fолиб бўлишимда мураббийим қўл жанги федерацияси вилоят филиали ижрочи директори Карим Холиқов, жисмоний тарбия ўқитувчим Отабек Собировларнинг ҳиссаси катта, — дейди биз билан суҳбатда ёш спортчи А. Тошпўлатов. — Ҳамма яқинларим, устозларим, дўстларим ғалабамдан хурсанд бўлишди. Бундан кейинги нуфузли мусобақаларда ҳам Ўзбекистон номи баралла янграши учун ҳаракат қиламан.

Жаҳон чемпионатида йигирма бир нафар ўзбекистонлик ёш юрт шарафи учун майдонга чиқди. Уларнинг 16 нафари совриндор бўлиб ватанга қайтишди. Бу фахрланса арзигулик натижа! Қувонарлиси, Ўзбекистон шарафини ҳимоя қилишга отланган тўрт нафар навоийликнинг бари медаль билан вилоятимизга қайтди. Жумладан, Аббос Қодиров 2-, Фаррух Рашидов ҳамда Темур Тойировлар 3-ўринни эгаллади. Умумжамоа ҳисобида ватанимиз спортчилари Россия давлатидан сўнг 2-ўринни забт этди. Бунга вилоятдошларимизнинг муносиб улуш қўшгани фахр-ифтихор уйғотади кўнгилда.

Кеча қўл жанги федерацияси вилоят филиали залида ғолиб ва совриндорларни тақдирлаш маросими бўлиб ўтди. Унда Ўзбекистон Қаҳрамони, НКМК директори Қувондиқ Санақулов жаҳон чемпионати совриндорларини қизғин табриклади. Уларнинг улкан ютуғи фарзандлик бурчини шараф билан адо этиш эканлиги алоҳида таъкидланди. Шундан сўнгғолиб ёшларга эсдалик совғалари топширилди. Ватан байроғини мағрур ҳилпиратишни мақсад қилиб, бунга эришиб келаётган ёш спортчиларимиздан яна улкан ғалабаларни кутиб қоламиз!

Зулфия БОБОЕВА.