вилоят ҳокими
қабулига
ёзилиш

БАТАФСИЛ

Шаҳар ва туман
ҳокимларига
мурожаат

БАТАФСИЛ

Интерактив
давлат
хизматлари

БАТАФСИЛ

Бирдамликка чорлаган анжуман

20.09.2018 18:01:37

Аввал хабар қилинганидек, Президентимиз Шавкат Мирзиёев ташаббуси билан 6-10 сентябрь кунлари Шаҳрисабзда ўтказилган Халқаро мақом анжумани кўп сонли санъат ихлосмандлари қалбида унутилмас бўлиб муҳрланди. Унда Тожикистон Республикасининг "Мақом академияси" гуруҳи олий соврин — Гран-при билан тақдирланди.

Биринчи ўрин юртимиздаги "Сақил" ансамбли ва Озарбайжоннинг "Ҳайрати" гуруҳи аъзоси Нигор Шабановага насиб этди. Иккинчи ўринни эса, Эроннинг "Настар" жамоаси ва ҳиндистонлик санъаткор Устад Иқбол Аҳмат Хан эгаллади. Туркманистонлик мақом устаси Сухонберди Оразбердиев ҳамда Япониянинг "SPCP" ва Туниснинг "AL gharbi Twins" ансамбллари учинчи ўринга муносиб кўрилди.

Дунё давлатларининг мақом усталари, созандалар ва хонандаларини бир жойда жамлаган ушбу анжуман чин маънода мусиқа байрамига айланиб, унинг доирасида ўтказилган турли тадбирлар мусиқа шайдолари учун муҳим аҳамият касб этди.

Эътирофли жиҳати, халқаро тадбирда "Navoiyazot" акциядорлик жамиятига қарашли "Ширин" маданият саройининг "Истиқлол" халқ ансамбли ҳам қатнашди.

Жамоа анжуманда кўплаб чет эллик сайёҳларнинг ташриф буюришини инобатга олган ҳолда ўз дастурига турли миллатларнинг рақсларини киритиб, барчада қизиқиш уйғотишга эришди. Жумладан, улар ижросидаги испанча, юнонча, ҳиндча ва хитойча рақслар маҳаллий томошабинлар ҳамда чет эллик меҳмонлар томонидан олқишлар билан кутиб олинди.

— Миллий анъаналаримиз ва урф-одатларимиз асосида саҳналаштирилган "Интизор" деб номланувчи рақсимиз ижро этилганда, мухлислар кўзларидаги ҳайратни кўриб қувондик, — дейди ансамбль бош балетмейстери Н. Салимова. — Хорижликлар ҳам ўша ижро жараёнига шерик бўлганликлари бизга янада илҳом бағишлади. Миллий санъатимизнинг сеҳри эътирофга лойиқлиги билан фахрландик.

Мазкур маданият байрами нафақат мақом санъатини ривожлантириш, балки тинчлик, бирдамликни тарғиб қилгани, энг муҳими, бардавомлиги билан аҳамиятга моликдир.