вилоят ҳокими
қабулига
ёзилиш
Шаҳар ва туман
ҳокимларига
мурожаат
Интерактив
давлат
хизматлари
01.05.2018 15:38:58
Юртимизда амалга оширилаётган бунёдкорлик ишлари жойларда аҳоли учун қулайликлар яратилишига хизмат қилмоқда. Вилоятимизда янги-янги объектлар қад ростлаётгани шаҳар ва туманлар файзига ўзгача шукуҳ бағишламоқда. 20 апрель куни воҳамизда 4 та замонавий объект фойдаланишга топширилди. Кенг жамоатчилик, корхона-ташкилотлар раҳбарлари ҳамда журналистлар иштирок этган тантанали тадбирларда вилоят ҳокими К. Турсунов қатнашиб, халқаро андозадаги муассасалар, уларда яратилган шарт-шароит ва имкониятлар, қулайликлар борасида сўз юритди ҳамда барчани қутлади.
Кўркам боғча — болажонларнинг севимли маскани
Навоий шаҳрининг "Жанубий" маҳалла фуқаролар йиғинида "Profi education" масъулияти чекланган жамияти директори, тадбиркор Бектош Ҳотамов ташаббуси билан "Янги давр фарзандлари" нодавлат таълим муассасаси ташкил этилди. 6,5 миллиард сўмдан зиёд маблағ сарфланган маскан 360 ўринга мўлжалланган бўлиб, айни кунда 60 нафарга яқин бола таълим-тарбия олишни бошлади. Яқинда Австрия давлатида бўлиб қайтган тадбиркор Б. Ҳотамов у ердаги мактабгача таълим йўналиши бўйича ўрганган тажрибасини ўзимизда ҳам жорий этиш ҳаракатида.
— Ҳозирги замон болаларига бундан яхши туҳфа бўлмайди, — дейди Саудия Арабистонидан келиб вилоятимизда фаолият юритаётган мутахассис Ҳ. Тожимуҳаммад. — Янги муассасанинг кўриниши ва ичидаги шароитларидан ҳайратга тушдим. Менинг ўғлим ҳам боғчанинг илк тарбияланувчиларидан бўлмоқда ва бундан жуда хурсандман.
Қулайликлар барчага манзур
Кармана тумани "Сардоба" маҳалла фуқаролар йиғинида "Қалдирғоч" нодавлат мактабгача таълим муассасаси қуриб битказилди.
120 ўринга мўлжалланган МТМ жами 2 миллиард 300 миллион сўм маблағ эвазига тадбиркор Мавлуда Мўйинова томонидан қурилиб, фойдаланишга топширилди. Замон талабидаги ушбу муассаса аҳолига ҳар томонлама қулайлик туғдирмоқда. Тадбиркор яқинда муассаса атрофидаги 10 сотих ерга қўшимча иссиқхона ташкил этишни ҳам ният қилган.
Таъкидлаш керак, айни кунда вилоятимизда 10 минг ўринга мўлжалланган 118 та нодавлат мактабгача таълим муассасаси фаолиятини йўлга қўйиш ишлари юзасидан амалий ишлар олиб бориляпти. Жумладан, бугунга қадар 80 нафар тадбиркорга туман ва шаҳар ҳокимлари қарорлари билан ер майдонлари ажратиб берилди.
Ҳозирда 23 нафар тадбиркор томонидан қурилиш-монтаж ишлари давом этмоқда. Ушбу муассасалар йил охиригача фойдаланишга топширилиши режалаштирилган.
Хусусий тиббий хизмат такомиллашмоқда
Навоий шаҳрида 2004 йилдан бери фаолият юритаётган "Vagus" хусусий даволаш масканида барча қулайликларга эга жарроҳлик бўлимининг очилиш маросими бўлиб ўтди.
— Президентимиз томонидан тиббиётда хусусий секторни ривожлантиришга кенг имконият ва имтиёзлар берилаётганлигидан фойдаланиб, замон талабларига тўла жавоб берадиган жарроҳлик бўлими қуриш учун "Асака" банкдан 7 йил муддатга 2 миллиард 400 миллион сўм кредит олдик, — дейди муассаса бош врачи А. Хирочева. — 50 ўринли марказимизга давлатимиз раҳбарининг ташаббуслари билан тузилган нодавлат тиббиёт муассасаларини ривожлантириш жамғармаси ҳисобидан 155 минг АҚШ долларига хориждан энг замонавий русумдаги тиббий жиҳозлар ўрнатдик.
Хориж технологиялари асосида замонавий тиббий асбоб-ускуналар билан жиҳозланган шифо масканида малакали жарроҳ, уролог, кардиолог, гинеколог, невропатолог ва стоматологлар иш олиб бормоқда.
Бундан ташқари, ушбу марказ Ҳиндистондаги малакали жарроҳлар ишлаётган "Life Care сompany" клиникаси билан ҳамкорликни йўлга қўйди. Тантанали маросимда сўзга чиққан ушбу компания директори Сунел Верманинг таъкидлашича, бу ерда ўтказиладиган мураккаб жарроҳлик амалиётларида ҳиндистонлик малакали врачлар ҳам мунтазам иштирок этишади.
Янги меҳмонхона иш бошлади
Нурота тумани туризм салоҳияти улкан ҳудудлардан бири саналади. Хусусан, "Чашма" тарихий мажмуасидан йил давомида сайёҳ ва зиёратчиларнинг қадами узилмайди. Айни пайтда ушбу маскан ёнида туристлар учун кенг имконият яратиш мақсадида 50 ўринга мўлжалланган меҳмонхона қад ростлади.
— Бинони бунёд этишда ҳудуднинг архитектура тарихи, ўзига хос меъморчилик андозалари пухта ўрганилди, — дейди "Буюк иморат қурилиш" масъулияти чекланган жамияти раҳбари Н. Арипов. — Республикамизнинг турли ҳудудларидан ўз ишининг устаси бўлган моҳир ҳунармандлар жалб этилди. Қўқонлик усталар девор ва пештоқларини безашган бўлса, бухоролик наққошлар шарқона нақшлар солишди. Меҳмонхонанинг ертўла қисмида спорт зали ҳамда дам олувчи зиёратчиларга намозхона ажратилган. Биринчи қаватда имконияти чекланган сайёҳлар учун махсус хоналар ҳам мавжуд.
Янги объектларни фойдаланишга топшириш маросимлари навоийликлар учун чинакам байрамга айланди. Воҳамиз санъаткорлари ва бадиий жамоаларининг чиқишлари тадбирларга ўзгача файз улашди.
Тендер савдолари
Тендерлар ва танловлар
Барча юридик ва жисмоний шахслар, чет эл инвесторлари диккатига!!!
Rental properties
The list of available empty and unfinished areas of the state
ҳокимлик билан Боғланиш
Тел.: 8 (436) 229-6206
info@navoi.uz
Ўзбекистон Республикаси,
Навоий вилояти, Навоий ш.,
Халқлар Дўстлиги кўчаси, 77а